15 oktyabr 2023-cü ildə Prezident İlham Əliyevin Xankəndidə Azərbaycan Bayrağını qaldırması və separatçıların uzun müddət istifadə etdikləri binanı gəzməsi erməni mediasında da reaksiya doğurub. Lakin gözlənildiyinin əksinə olaraq, erməni sosial şəbəkələrində bəzi şəxslərin çılğın reaksiyası istisna olmaqla, proses geniş əks-səda doğurmayıb.
Əksinə, Ermənistan mediası İlham Əliyevin Xankəndi və ətraf ərazilərə, o cümlədən Kərkicahan və Malıbəyliyə səfərini geniş işıqlandırıb.
Erməni cəmiyyətinin bu reaksiyasını necə dəyərləndirə bilərik?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Ermənistan cəmiyyəti artıq yaxşı başa düşür ki, işğalın, separatçılığın və terrorun kökü kəsilib: “Azərbaycan dövləti ermənilərin xəstə təfəkkürünün məhsulu olan “böyük Ermənistan” xülyasını darmadağın edib. Erməni xalqı da ard-arda ağır məğlubiyyətlərin acısını dadıb, Ermənistanın ictimai-siyasi həyatı sanki dərin depressiyaya uğrayıb. Onlar Azərbaycanın qüdrətini, dünyadakı güclü möqeyini, Prezident İlham Əliyevin qətiyyətli siyasətinin uğurlu nəticələrini gördükcə mövcud reallıqları qəbul edirlər. Çünki buna məcburdurlar. Məğlubiyyətə məhkum toplum prosesləri sadəcə seyr edir. Ermənistan rəhbərliyindən tutmuş sadə vətəndaşlara qədər hamı anlayır ki, Azərbaycan Cənubi Qafqazda tam yeni realııqlar yaradıb, separatizm və işğalçılıq meylləri cəhənnəmə gedib. Xüsusilə də Azərbaycanın son antiterror tədbirləri, qanunsuz silahlı dəstələrin ləğvi, separatçıların həbsi, suverenliyimizin tam bərpası, Xankəndi və ətraf ərazilərin tam nəzarətə götürülməsi erməni cəmiyyəti üçün gözdağı oldu. Azərbaycan bir daha düşmənə dərs verdi. İndi erməni ictimaiyyətinin reallıqlarla barışmaqdan başqa çarəsi yoxdur. Digər tərəfdən, Azərbaycan dövlətinin Qarabağda sıfırdan ən müasir infrastruktur yaratmasını, sürətli yenidənqurma işlərini ermənilər böyük həsədlə izləyirlər. Bu faktorlar da mühim əhəmiyyət daşıyır. Cığallıq etməklə, Zəngəzur dəhlizinin açılışını yubatmaqla, mənasız addımlar atmaqla Ermənistan heç nəyə nail ola bilməyəcək və öz məğlubiyyətini, tənəzzülünü daha da dərinləşdirəcək.
Qarabağ torpaqlarının 30 illik işğalı dövründə də Ermənistan ən böyük ziyanı özünə vurdu, regional layihələrdən, kommunikasiyalardan kənarda qaldı, qlobal qınaqla üzləşdi, bütün dünyanın nifrətini qazandı. Halbuki, zamanında xalqının taleyini düşünən bir prezidenti, bir məntiqli idarəçisi, rəhbəri olsaydı vəziyyət bu yerlərə qədər gəlib çıxmazdı. Amma çıxdı. Çünki Ermənistan hər zaman səhv yolda oldu. Ermənistan tərəfdən qərarlar hər zaman yanlış verildi. Ən qəribəsi isə odur ki, tarixin verdiyi heç bir dərsdən bunlar nəticə çıxara bilmirlər. Yenə öz amplualarında qalıblar”.
Ermənilər arasında keçirilən sorğularda isə onların reallıqla hesablaşdıqları, həmçinin baş verənlərdə özlərini günahkar saydıqları görünür. Sorğu iştirakçıları “Azərbaycanlılar Qarabağı bizdən çox sevdikləri üçün o yerlərə sahib oldular” deyə münasibət bildiriblər.
Məhəmmədəli QƏRİBLİ
