Dağıstanın xalq şairi Azərbaycan xalqının yaddaşında “dost” kimi qalmayıb. Biz onu daha çox ermənipərəst mövqeyinə görə xatırlayırıq və yadımıza düşür ki, Qarabağ hadisələrinin başlanğıcında o, keçmiş mərkəzi mətbuatda ermənipərəst mövqe bildirirdi, bu da Azərbaycanda hamının hiddətinə səbəb olmuşdu.
Həmin dövrdə xalq şairi Nəbi Xəzri, görkəmli şairimiz Qasım Qasımzadə, xalq şairi Zəlimxan Yaqub və başqaları Rəsul Həmzətova ciddi etiraz dolu, açıq və qəzəbli məktub yazdılar. Azərbaycanın çörəyini yeyib, suyunu içib, şairləri ilə dostluq edib özünə isə xor baxan Həmzətovun bu gün ölkəmizdə təbliğatı narazılıq doğurur.
Məlum olduğu kimi, oktyabrın 8-də Beynəlxalq Muğam Mərkəzində Dağıstanın Xalq şairi Rəsul Həmzətovun anadan olmasının 100 illiyinə həsr edilmiş tədbir keçirilib. Tədbir Beynəlxalq Muğam Mərkəzi və Dağıstan Respublikası Mədəniyyət Nazirliyinin dəstəyi ilə Bakıdakı Rus evi tərəfindən təşkil olunub. Rəsul Həmzətovu "Azərbaycanın böyük dostu" adlandıranlar onun Qarabağ məsələsində tutduğu antiazərbaycan mövqeyini unudurlar. Məlumdur ki, R.Həmzətov, Azərbaycanın mövqeyini müdafiə etməməsi bir yana, hətta Şeyx Şamili də “türk casusu” adlandırmışdı və sair. Özü də milliyətcə avar olduğu halda.
Onun Bakıda yubileyinin keçirilməsi sosial şəbəkələrdə ictimai narazılıq da yaradıb. Hətta şair, tərcüməçi, şərqşünas alim, araşdırmaçı Nəriman Qasımoğlu da buna tənqidi yanaşıb, atası - şair, tənqidçi, ədəbiyyatşünas, tərcüməçi Qasım Qasımzadənin Rəsul Həmzətova açıq məktubunu yayıb. Bundan əlavə, N.Qasımoğlu “Azərbaycanda Rəsul Həmzətovun 100 illiyi təntənə ilə qeyd edilib, haqqında kitab yazılıb, sərgi təşkil edilib, konsert və s. keçirilib. Bu il 100 yaşı tamam olan Qasım Qasımzadənin arxivində avar şairinə ünvanladığı, məlum səbəbdən “Literaturnaya qazeta”da çapına izn verilməyən, bizim qəzetlərin birində öz dilimizdə dərc edilən açıq məktubunu xatırladım. R.Həmzətovun bizdəki yubiley tədbirlərini bilmirəm xalqımızın unutqanlığına yozum, yoxsa ürəyigenişliyinə…” - deyə qeyd edib.
Paytaxtımızda 100 illiyi qeyd edilən Rəsul Həmzətovun Qarabağ məsələsində tutduğu ermənipərəst mövqeni nə tez unutduq?
“O adam həqiqətən də ermənipərəst mövqe tuturdu, bu da Azərbaycanda birmənalı qarşılanmırdı, kəskin etiraza səbəb olurdu”
Əməkdar jurnalist Azər Həsrət “Bakı-Xəbər”ə şərhində “Bəli, təəssüflər olsun ki, Azərbaycanda bəzən bizim milli mənafemizə zidd adamların bu cür yübileylərini keçiririk. Xatırlayırsınızsa, bir neçə il əvvəl universitetlərdən birində Viktor Polyaniçko ilə bağlı bir inşa yazışması da keçirilmişdi. Halbuki, biz hamımız 20 Yanvar hadisələri zamanı, ümimiyyətlə o dövrdə Viktor Polyaniçkonun Azərbaycana qarşı necə mövqe tutduğunu xatırlayırıq. Rəsul Həmzətov Viktor Polyaniçko səviyyəsində olmasa da, amma şəxsən mənim yadımda antiazərbaycan mövqeyi ilə qalıb. 1988-ci ildən üzü bəri baş verən hadisələrin canlı şahidlərindən, müasirlərindən biri olaraq şəxsən mən onun tutduğu ermənipərəst mövqeyi xatırlayıram. O adam həqiqətən də ermənipərəst mövqe tuturdu, bu da Azərbaycanda birmənalı qarşılanmırdı, kəskin etiraza səbəb olurdu. Çünki insanlar düşünürdü ki, Rəsul Həmzətov bir müsəlman olaraq Azərbaycan xalqının haqq işini dəstəkləməlidir, dəstəkləməsə də belə, Ermənistan tərəfindən çıxış etməməlidir, yaxud onlara öz rəğbətini ifadə etməməlidir. Amma təəssüflər olsun ki, o adam onu edirdi və bu səbəbdən də bizim ona münasibətimiz uyğun şəkildə formalaşmışdı və bu gün də o formadadır” - deyə bildirdi.
Bakıdakı Rus Evinin bu tədbiri keçirməsinə gəlincə, A.Həsrətin sözlərinə görə, o təşkilatın, ümumiyyətlə Rusiyaya, ruslara bağlı təşkilatların Azərbaycanda fəaliyyətinə ciddi diqqət yetirilməlidir. A.Həsrətin fikrincə, onların öz gündəliyi var, bu gündəlik rəsmi Moskva ilə həmahəngdir və çox zaman da Moskva ilə Bakının ictaimi rəyi bir çox məsələlərdə üst-üstə düşmür, təbii ki, belə bir vəziyyətdə Azərbaycanda fəaliyyət göstərən o təşkilat, yaxud bənzər təşkilatlar ölkə ictimai rəyini nəzərə almalıdırlar. “Bu təşkilat tərəfindən Həmzətovun yubileyinin keçirilməsi, təşkil edilməsi bir tərəfdən qınanmalıdır. İkinci tərəfdən də, Azərbaycanın müvafiq dövlət qurumları niyə belə tədbirlərin keçirilməsinə şərait yaradır? Niyə araşdırmadan, bilmədən bu cür tədbirlərə imkan yaradırlar? Başa düşürəm, nazirlərimiz gəncdir, nazirliklərimizdə işləyənlər gəncdir, yeni nəsildir, onlar çox şeyi bizim kimi bilmirlər, xəbərləri yoxdur. Amma belə bir təklif təqdim olunanda, təşəbbüs irəli sürüləndə gərək araşdıraydılar ki, Rəsul Həmzətovun yubileyini Bakıda keçirmək olardı, yoxsa olmazdı. Çox təəssüflər olsun ki, bunu etməyiblər, meydan veriblər və Bakıda Həmzətovun 100 illiyinin keçirilməsi haqlı olaraq Azərbaycan ictimai rəyində narazılıq yaradıb. Şəxsən mənim özümün bununla bağlı çox ciddi narazılığım var, fikrimi də bildirmişəm, əlbəttə, bir də belə şeylər olduğu təqdirdə etirazımı bildirəcəm” - deyə A.Həsrət vurğuladı.
İradə SARIYEVA
