Həm sosial media, həm ənənəvi KİV-lər mənə kömək edir ki, məsələlərdən xəbərdar olum və dərhal onlara reaksiya verim. Bu sözləri Prezident İlham Əliyev “4-cü Sənaye İnqilabı dövründə Yeni Media” mövzusunda Şuşa Qlobal Media Forumunda çıxışında söyləyib.
Ona görə gələcək fəaliyyətində də mediadan istifadə edəcəyini bildirən dövlətimizin başçısı deyib: “Mən, əlbəttə, istədiyim qədər fəal deyiləm, çünki məşğulam. Ancaq müəyyən narahatlıq doğuran, cəmiyyətdə narahatlıq doğuran məsələlərə gəldikdə, mən dərhal təmasdayam. Mənim ailəm də mənimlə təmasdadır, qohumlarım təmasdadır və belə görüşlər də çox vacibdir”.
Prezident ölkədəki real vəziyyəti hansı mənbələrdən öyrəndiyini ilk dəfədir ki, açıq bəyan edir. Bu mənbələrin sırasında ənənəvi və sosial medianın olduğunu da deyirsə buradan nə nəticə çıxarmaq olar?
Media eksperti Müşfiq Ələsgərli “Bakı-Xəbər”ə açıqlamasında bildirdi ki, Şuşada keçirilən tədbirdə olduqca önəmli mesajlar verildi: “Öncə onu bildirim ki, qlobal media formunun Şuşada keçirilməsi çox böyük bir hadisədir. Çünki, xarici jurnalistlərin də bura gəlməsi, Qarabağda baş verən hadisələri öz gözləri ilə canlı şəkildə görməsi də vacib bir haldır. Bundan əlavə isə forumda medianın ciddi məsələləri də müzakirə olunur. Cənab Prezidentin burda iştirakı, verdiyi mesajlar da çox önəmli oldu. Bu mesajların içərisində cənab Prezidentin söylədiyi nitqdə mediaya ayırdığı hissə bizim üçün çox ciddi önəm daşıyır. Cənab Prezident bildirdi ki, o həm ənənəvi medianı, həm də sosial medianı çox diqqətlə izləyir və burdan informasiyalar alır. Təbii ki, Prezidentin informasiya aldığı mənbələr çoxdur. Bunun üçün dövlət qurumları var. Amma, ənənəvi və sosial medianı izləməsi onun üçün yeni imkanlar yaradır. İnsanların nə düşündüyünü, hansı problemlərlə qayğılandığını görmək üçün alternativ mənbə kimi sosial medianın imkanlarından istifadə edir. Bütövlükdə cənab Prezidentin nitqi onu göstərdi ki, o mediada baş verən prosesləri diqqətlə izləyir. Həmçinin medianın yazdıqlarını, özündə baş verən prosesləri nəzarətdə saxlayır və operativ reaksiya verir. Bu da bizim üçün çox ciddi önəm daşıyır. Bu da onu göstərir ki, bizim yazdıqlarımız öz nəticəsini verir. Ölkə başçısının bu açıqlaması həm də bizim üçün əsl bayram hədiyyəsi oldu”.
Məhəmmədəli QƏRİBLİ
