Prezident İlham Əliyev “4-cü Sənaye İnqilabı dövründə Yeni Media” mövzusunda Şuşa Qlobal Media Forumunda çıxışında iki xalq arasında hansı halda barışığın olacağını belə dəyərləndirib: “Bəlkə bu acı məğlubiyyət, İkinci Qarabağ müharibəsindəki acı məğlubiyyət onlara dərs olacaq və onlar oturub fikirləşəcəklər ki, bundan sonra bu bölgədə necə yaşasınlar, öz günahlarını etiraf edəcəklər, öz cinayətlərini etiraf edəcəklər, cinayətkarları məsuliyyətə cəlb edəcəklər. Artıq bu proses başlayıb. Ermənistanda əli Azərbaycan xalqının qanına batmış cəlladlar erməni hakimiyyəti tərəfindən cəzalandırılır. Bu, ədalətlidir və bunun davamı olmalıdır”.
Dövlət başçısı ancaq bu təqdirdə xalqlar arasında real barışığın ola biləcəyini qeyd edib. Bildirib ki, sülh müqaviləsi imzalana bilər, ancaq əsas məsələ ondadır ki, ictimai müstəvidə barışığa doğru addımlar atılsın, onlardan birincisi ermənilərin öz günahlarını etiraf etməsidir.
Məsələ ilə bağlı baki-xeber.com-a açıqlama verən politoloq Tural İsmayılov hesab edir ki, Prezident İlham Əliyevin bununla bağlı şərtləri haqlı tələbdir: “Prezident haqlı olaraq vurğuladı ki, bu gün Ermənistanda əli Azərbaycan xalqının qanına batmış adamlar, bu ölkənin ictimai-siyasi həyatında gözə dəyirlər. Təəssüflər olsun ki, bu günə qədər Ermənistan tərəfindən real sülhlə bağlı heç bir doğru-düzgün addımlar atılmayıb. Təbii ki, bu addımların atılmamağı da Ermənistanın Azərbaycanla sülhü sabotaj etməsindən əlavə bölgədə daim gərginlik yaratmasına səbəb olub. Məsələ ondadır ki, bu günə qədər Srebrenitsa və başqa qətliamları törədənlər beynəlxalq hüquq, siyasi sistem qarşısında layiq olduqları cəzanı alsalar da, Ermənistana münasibətdə bunlar yoxdur. Yəni, Azərbaycan xalqına qarşı həyata keçirilən soyqırım proseslərində təəssüflər olsun ki, o cavab indiyə qədər verilməyib. Ermənilər Xocalıda və digər yaşayış məntəqələrində törətdikləri kütləvi qətliamlara görə üzr istəməyiblər. Bu baxımdan hesab edirəm ki, Cənab Prezidentin Şuşada verdiyi mesajlar Azərbaycanla Ermənistan arasında həm də real sülhün şərtlərini özündə ehtiva edir. Eyni zamanda ölkə başçısı İlham Əliyev həm də Azərbaycan ictimai rəyində möhkəm olan bir fikri bir daha səsləndirdi ki, bu da azərbaycanlılara qarşı cinayət törətmiş istənilən adamların hüquqi məsuliyyətə cəlbi məsələsini bir daha aktuallaşdırır. O baxımdan tarixin elə bir dövrü gələcək ki, Ermənistandakı cəlladlar törətdikləri qətliamlara görə cavab verəcəklər”.
Vidadi ORDAHALLI
