44 günlük Vətən müharibəsində Ermənistan məğlub olsa da, ondan sonrakı dövrdə prosesləri uzatmaq üçün müxtəlif vasitələrə əl atır. Müharibədən sonra ilk dövrlərdə Ermənistan rəhbərliyi belə görüntü yaratdı ki, 10 noyabr 2020-ci ildə imzalanan üçtərəfli Bəyanatın bütün bəndlərini yerinə yetirəcək.
Daha sonra 2021-ci ilin yanvarında Moskvada həmin formatda növbəti görüş keçirildi. Ondan sonra Avropa İttifaqının və ABŞ-ın vasitəçiliyi ilə görüşlər təşkil olunsa da, son nəticədə Ermənistan hər dəfə bir bəhanə gətirərək prosesi tormozlayır. Gah Qarabağda ermənilərin blokadaya salınmasını, gah da status və digər məsələləri bəhanə edərək 3 ilə yaxındır konkret real addımların atılmasından yayınır.
Ermənistan gah beynəlxalq məhkəmələrə, gah da digər qurumlara müraciət edərək sülh sazişinin imzalanmasını, kommunikasiyaların açılmasını yubadır. Bu arada Avropada Təhlükəsizlik və Əməkdaşlıq Təşkilatının (ATƏT) Daimi Şurası Ermənistanın xahişi ilə növbədənkənar iclas keçirib. Bəlli məsələdir ki, Ermənistan Azərbaycana qarşı belə bir iclasın keçirilməsini xahiş edib. Belə vəziyyətdə Azərbaycan nə etməlidir? Ermənistanın təşəbbüsü ilə keçirilən belə müzakirələrin bizə nə ziyanı ola bilər?
“Nəticə çıxarmasalar, prosesi uzatsalar Azərbaycan antiterror əməliyyatları keçirəcək”
Sözügedən məsələ ilə bağlı fikirlərini “Bakı-Xəbər”lə bölüşən millət vəkili Ceyhun Məmmədovun sözlərinə görə, Ermənistan bu kimi təşəbbüslərlə çıxış etməklə daha çox imitasiya ilə məşğuldur: “Bir tərəfdən sülh istədiyini bildirən Ermənistan, digər tərəfdən davamlı olaraq Azərbaycana qarşı təxribatlar törədir. Həmçinin beynəlxalq müstəvidə bu təxribatları davam etdirməyə çalışır. Son proseslər bir daha onu göstərir ki, Ermənistan həqiqətən də sülhdə maraqlı deyil. Gah Azərbaycandan Beynəlxalq Ədalət Məhkəməsinə şikayət edir, gah da ATƏT çərçivəsində müəyyən tələblərlə çıxış edir. Azərbaycanı Qarabağda yaşayan ermənilərə qarşı humanitar böhranda günahlandırır. Ermənistanın təşəbbüsü ilə ATƏT Daimi Şurasının növbədənkənar iclasının keçirilməsi də bunun tərkib hissəsidir. Hesab edirəm ki, Ermənistanın apardığı bu ədalətsiz kampaniyanın heç bir perspektivi yoxdur. Azərbaycan öz mövqeyini dəyişməyəcək. Çünki ortada cənab Prezidentin qətiyyətli mövqeyi var. Qarabağdakı etnik ermənilər ya reinteqrasiya olmalıdılar, ya da bu əraziləri tərk etməlidilər. Onlara heç bir xüsusi güzəşt olunmayacaq. Azərbaycan bütün bu işləri özünün beynəlxalq hüquqla təsbit olunmuş ərazilərində həyata keçirir. Həmin ərazilər beynəlxalq hüquqa əsasən Azərbaycan torpağıdır. Laçın yolunun başlanğıcında nəzarət-buraxılış məntəqəsinin qurulması Azərbaycanın tam haqqıdır. Yəni Azərbaycan öz ərazisində istənilən addımı ata bilər. Ona görə Ermənistan da anlamalıdır ki, bu cür təxribatların heç bir nəticəsi olmayacaq. Yaxşı olardı ki, Ermənistan daha çox sülh barəsində düşünərək prosesə töhfə verməyə çalışsın. Hesab edirəm ki, sözügedən proseslərin sonu Ermənistan üçün daha ağır nəticələrə səbəb olacaq. Nəticə çıxarmasalar, prosesi uzatsalar Azərbaycan antiterror əməliyyatları keçirəcək”.
Vidadi ORDAHALLI
