Rusiya Bakı ilə konstruktiv dialoq aparır və problemli məsələləri birbaşa müzakirə edir. Bizə vasitəçi lazım deyil.
Bunu Rusiya XİN nümayəndəsi Mariya Zaxarova erməni jurnalistinin Rusiya-Ukrayna müharibəsi ərzində Bakının dəfələrlə Kiyevə iqtisadi, siyasi və informasiya dəstəyi göstərməsi, eləcə də Ukrayna ordusunda Azərbaycan silahlarının olması iddiası ilə bağlı sualını cavablandırarkən deyib.
Görünən budur ki, ermənilər Azərbaycanın Ukraynaya 7 milyon dollar son yardımını Rusiya əleyhinə fakta çevirmək istəsələr də, buna müvəffəq ola bilməyiblər.
Politoloq Elşən Mustafayev “Bakı-Xəbər”ə açıqlamasında bildirdi ki, Rusiyadakı ermənipərəst qüvvələr və erməni lobbisi Rusiya-Azərbaycan münasibətlərini korlamağa çalışır: “Rusiyada ermənipərəst qruplaşmalar var. Onlar narahatdırlar ki, Rusiya-Türkiyə əlaqələri inkişaf edir və əməkdaşlıq güclənir. Halbuki, onlar istəyirdilər Rusiya-Türkiyə münasibətləri gərgin olaraq qalsın. Bu alınmadı. Ona görə indi çalışırlar ki, Rusiya-Azərbaycan əlaqlərinə zərbə endirsinlər. Həmin qüvvələr Azərbaycan tərəfini provokasiyaya çəkməyə çalışırlar. İstəyirlər ki, Rusiya-Azərbaycan əlaqələri pozulsun. Bunun üçün ermənipərəst qüvvələr təxribat dolu bəyanatlar verirlər. Məqsəd odur ki, Azərbaycan tərəfi təxribata uysun və bunun əsasında iki ölkə arasındakı əlaqələr pozulsun.
Əgər Rusiya-Azərbaycan əlaqələrinin mahiyyətinə baxsaq görərik ki, nə Rusiya, nə də Azərbaycan bu münasibətlərin korlanmasında maraqlıdır. Bu, ermənipərəst dairələrin birinci cəhdi deyil. Hesab edirəm ki, bu cür cəhdləri Azərbaycan tərəfi ifşa etməlidir. Azərbaycan müstəqil siyasət yürüdür. Ukrayna ilə Rusiya arasındakı müharibə başlayan kimi Azərbaycan Ukraynanın ərazi bütövlüyünü dəstəklədiyini bəyan etdi. Bununla yanaşı, Azərbaycan Rusiya ilə strateji müttəfiqlik haqqında saziş imzaladı. Bu, balanslı siyasət deməkdir. Azərbaycan artıq neçənci dəfədir ki, Ukraynaya humanitar yardım edir. Bunu da heç kimdən çəkinmədən açıq şəkildə, şəffaf həyata keçirir. Bu cür faktorlardan istifadə etməklə, ermənilər nəyəsə nail ola bilməzlər. Azərbaycan siyasətini elə bu tempdə də davam etdirməlidir.
Aydındır ki, Rusiya və Azərbaycanın Qarabağ məsələsində mövqeyi tam eyni deyil. Xəzərlə və bəzi məsələlərlə bağlı anlaşılmazlıqlar var. Amma məncə, bunların hamısının kifayət qədər öhdəsindən gəlmək olar və müsbət proseslərin sayı mənfi olanlardan qat-qat çoxdur. Ona görə də, ermənilərin bu cür araqatmaq cəhdləri fayda verən deyil. Sevindirici haldır ki, Rusiya rəsmisi onların cavabını lazımi şəkildə verə bilib.
Rusiya və Azərbaycan prezidentləri 22 fevral 2022-ci ildə Moskvada “strateji müttəfiqlik” haqqında 44 maddəlik bəyanat qəbul ediblər. Bəyanatın bəndlərindən biri belədir: “Tərəflər öz ərazilərində təşkilatların və şəxslərin digər tərəfin dövlət suverenliyinə, müstəqilliyinə və ərazi bütövlüyünə qarşı yönəlmiş fəaliyyətinin qarşısını qətiyyətli surətdə alırlar”. Yaxşı olardı ki, Rusiya bütün istiqamətlər üzrə öz öhdəliklərinə əməl etsin. Belə olan təqdirdə, tərəflərin arasını heç bir üçüncü qüvvə vura bilməyəcək”.
Məhəmmədəli QƏRİBLİ
