İran hakimiyyəti Güney Azərbaycanda yeni doğulan körpəyə türk mənşəli adın qoyulmasına icazə vermir. Bu barədə "Mouze İran" teleqram kanalı məlumat yayıb. Qeyd edilir ki, hökumət bu dəfə 5 aylıq Volkan adlı uşağa doğum haqqında şəhadətnamə vermir. Şəhadətnaməsi olmadığı üçün Volkan tibbi və sosial xidmətlərdən də məhrumdur.
İran rejimi Kuroş, Dariuş kimi İslam öncəsi fars adlarına şəhadətnamə verdiyi halda, türk adlarına “İran və İslam mədəniyyətinə zidd olması” səbəbindən şəhadətnamə verməkdən imtina edir. İran hakimiyyətinin yeni doğulan körpələrə türk adı qoymağa icazə verməməsi əhalinin narazılığına səbəb olur.
Qeyd edək ki, uzun müddətdir İran hakimiyyəti türk adlarını qadağan etmək siyasəti yürüdür. Güney Azərbaycan sakinləri türk adlarına görə övladlarına şəxsiyyət vəsiqəsi ala bilmədiklərini iddia edirlər. İran Vətəndaşlarının Qeydiyyatı üzrə Milli Təşkilatın hərəkətləri Güney Azərbaycanda ciddi etirazlara səbəb olub. Bir çox azərbaycanlı ailə onlara edilən təzyiqlərlə bağlı sosial şəbəkələrdə məlumat dərc etmək qərarına gəlib.
"İran hakimiyyəti Azərbaycan türkünün milli kimliyini tanımaq, bilmək istəmir, bu səbəbdən də ..."
Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan “Bakı-Xəbər”ə açıqlamasında qeyd etdi ki, İran hakimiyyəti Azərbaycana, türk adlarına, türk etnosuna qısqanclıqla yanaşır. İranda yeni doğulan körpəyə türk adının qoyulmasına icazə verilməməsi artıq ənənə halı alıb. Bu, türklərin assimilyasiyası, türklərin etnos olaraq tanınmaması üçün atılan addımdır. Həmçinin, türkü görməzdən gələn fars şovinizminin davranış formasıdır: “İran hakimiyyəti Azərbaycan türkcəsində olan yer, tarixi, coğrafi, şəhər adlarını dəyişməklə türklərin izini İran ərazisindən silmək istəyir”.
Həmsöhbətimiz onu da əlavə eydi ki, insanların öz ana dilində adının olması ona milli şüurun qayıtması kimi bir əlamət verir: “Məsələn, bu yaxınlarda İranda yeni doğulan körpəyə “Volkan” adı vermək istəyiblər. İran hakimiyyəti də bu adın əcnəbi, türk adı olduğunu əsas gətirərək uşağa kimlik verməyib. “Vulkan” türk sözüdür və bu adı daşıyacaq şəxslər öz milli kimliklərini qoruyacaq. İran hakimiyyəti isə Azərbaycan türkünün milli kimliyini tanımaq, bilmək istəmir. Bu səbəbdən də molla rejimi Azərbaycan türklərini assimilyasiya etməklə onları fars dilinin, mədəniyyətinin, etnosunun bir qolu saymağa çalışır. Bu, fars şovinist düşüncəsinin tərkib hissəsidir. Ona görə də Güney Azərbaycanda ana dilində adların qoyulması qadağan olunub. Buna qarşı çıxanlar molla rejimi tərəfindən cəzalandırılır”.
Günel CƏLİLOVA
