Ermənilər həmişəki kimi Azərbaycanın xoş məramları qarşısında namərd əməllər törətməkdə davam edirlər və rus sülhməramlıları da onlara kömək edir. Məlum olduğu kimi, Azərbaycan erməni sakinlərin ehtiyaclarının qarşılanması üçün Ağdam-Xankəndi yolunu təklif edib.
Bu dəfə Xocalı rayonunun Əsgəran qəsəbəsindəki ermənilər Azərbaycanın Ağdam-Əsgəran yolu vasitəsilə Qarabağdakı ermənilərə humanitar yardım çatdırılması təklifinə öz xislətlərinə uyğun cavab veriblər.
Belə ki, separatçılar “Ağdamdan keçən yolun açılması “Artsax”ı düşmən qapısına aparmaq deməkdir” söyləyərək Ağdam-Əsgəran yolunda barrikada qurmaq qərarına gəliblər. Son nəticədə ermənilər həmin yolu beton plitələrlə bağlayıblar və ərazidəki Rusiya sülhməramlıları buna mane olmayıb. Aydın məsələdir ki, bunda məqsəd erməni əhalisinin ərzaq təminatının Ağdam marşrutu vasitəsilə təmin edilməsinin qarşısını almaqdır.
“Moskva tərəfindən göndərilən emissarlar separatçıları təlimatlandıraraq onları bu kimi pozuculuq əməlləri törətməyə təşviq edirlər”
Məsələ ilə bağlı “Bakı-Xəbər”ə açıqlama verən media eksperti Yadigar Məmmədli hesab edir ki, bütün bu oyunlar Rusiya sülhməramlıları ilə erməni separatçıları tərəfindən müştərək şəkildə həyata keçirilir: “Məqsəd sülh prosesini baltalamaq, reintqrasiya prosesini tormozlamaqdır. Bütün bu oyunların arxasında separatçılarla birlikdə Rusiya sülhməramlıları dayanır. Moskva tərəfindən Qarabağa göndərilən emissarlar separatçıları təlimatlandıraraq onları bu kimi pozuculuq əməlləri törətməyə təşviq edirlər. Çünki Rusiya istəmir ki, Qarabağ Azərbaycana inteqrasiya olunsun. Ağdam-Əsgəran-Xankəndi yolu məsafə baxımından ən qısa yoldur. İstər sülhməramlıların, istərsə də Beynəlxalq Qırmızı Xaç Komitəsinin bu yoldan istifadə etməsi daha məqsədəuyğundur, nəinki Ermənistandan gəlib Laçını keçməklə Qarabağa getmək. Ancaq nümayşkaranə şəkildə onlar bu xoşməramlı təklifdən imtina edirlər. Bütün vasitələrlə çalışırlar ki, Azərbaycanla Ermənistan arasında yaxınlaşma olmasın. Rusiya mane olmasaydı, Vətən müharibəsində Qarabağda erməni separatizminin kökünü birdəfəlik kəsmək mümkün idi. Ancaq Rusiya məqsədyönlü şəkildə buna imkan vermədi. Çünki ermənilərin Qarabağda məskunlaşmasının, onlara 1923-cü ildə qondarma muxtariyyət verilməsinin arxasında Rusiya dayanır. O cümlədən, 1988-ci ildə Qarabağda erməni separatizmi baş qaldıranda, Ermənistan Azərbaycan ərazilərini işğal edəndə onları himayə edən Rusiya idi. Azərbaycanda hamı yaxşı bilir ki, məhz Rusiyanın dəstəyi hesabına Azərbaycan əraziləri işğal olundu. Məhz Rusiyanın himayəsi sayəsində ərazilərimiz 30 ilə yaxın işğal altında qaldı. Qarabağdakı son proseslərin də arxasında Rusiya sülhməramlıları dayanır. Ancaq nə etsələr də öz mənfur niyyətlərini sona qədər reallaşdıra bilməyəcəklər. Azərbaycan Qarabağ ermənilərinin reinteqrasiyasında qərarlıdır”.
Vidadi ORDAHALLI
