“Financial Times” nəşri yazır ki, Ermənistan Rusiya üçün sanksiya altında olan malların ixrac məntəqəsi olub.
Qeyd olunur ki, Ermənistan avtomobil istehsalçısı deyil, lakin bu kiçik ölkədən Rusiyaya avtomobil ixracı Ukraynanın işğalından sonra artıb: 2022-ci ilin yanvarında 800 min dollar dəyərində avtomobildən bu ilin eyni ayında 180 milyon dollar dəyərində avtomobilə qədər. Rusiyada bütün avtosalonlar bağlanıb, BMW, Audi və digər məşhur avtomobil markalarının Rusiya bazarına girişi yasaqdır. Bununla belə, Gümrü gömrük terminalından onlarla avtobilin son dayanacağı məhz Rusiyadır.
“Rusiyaya təkrar ixrac” adı ilə Ermənistandan Rusiyaya digər malların ixracı da artıb və bu, 2022-ci ildə ikiqat həcmə çatıb. Rusiya istehlakçıları Qərb sanksiyalarına görə üçüncü ölkələrə üz tutublar. Ermənistan onlardan biridir. Ermənistan üçün 2022-ci ildə ümumdaxili məhsulun (ÜDM) rekord 13 faiz artması qeydə alınıb. Lakin bu, Qərb paytaxtlarını məyus edib. ABŞ rəsmiləri mart ayında Ermənistanı Rusiyaya “qadağan olunmuş malları qaçaqmalçılıq yolu ilə keçirən” dövlətlər sırasına daxil edib. Aİ-nin son sanksiyalar paketində də Ermənistandakı qurumlar günahkarlar sırasında göstərilir.
“Təsadüfi deyil ki, məhz sanksiya altında olan Rusiyaya bir sıra məhsulların ötürülməsi hesabına...”
Məsələ ilə bağlı “Bakı-Xəbər”ə açıqlama verən ekspert Rəsul Cahangirli hesab edir ki, Rusiya Ukraynaya qarşı müharibə elan etdiyi gündən Ermənistan bu prosesin içindədir: “Məsələ ondadır ki, müharibə elan olunan kimi Qərb Rusiyaya qarşı kütləvi sanksiyalar qəbul etməyə başladı. Zamanla sanksiya paketlərinin sayı artırıldı. Ancaq sanksiyalar genişləndirildikcə, Ermənistan qadağan olunmuş məhsulların Rusiyaya gizli ötürülməsində daha fəal iştirak etməyə başladı. İlk vaxtlar Paşinyanın Qərbə yaxın olduğunu düşünüb, Ermənistanın belə addım atacağını gözləmirdilər. Ancaq bir müddət sonra birdən-birə Ermənistan kimi iqtisadiyyatı kiçik ölkədən Rusiyaya ixracın kəskin şəkildə artması bütün oyunların üstünü açdı. Məlum oldu ki, Ermənistan İran və Gürcüstan üzərindən bir sıra məhsulları idxal edir, sonra ixrac adı ilə həmin məhsulları Rusiyaya ötürür. Üstəlik, Ukrayna müharibəsindən sonra Ermənistanda fəaliyyət göstərən Rusiya şirkətlərinin sayı artıb. Ukrayna müharibəsindən sonra Ermənistana 3,2 milyard dollar daxil olub. Ermənistan kimi ölkə üçün bu kifayət qədər böyük vəsaitdir. Təsadüfi deyil ki, məhz sanksiya altında olan Rusiyaya bir sıra məhsulların ötürülməsi hesabına Ermənistanda son bir ildə iqisadi artım əhəmiyyətli dərəcədə yüksəlib. Bütün bunları Qərbdə yaxşı bilsələr də, nədənsə Ermənistana qarşı sanksiyalar gündəmə gətirilmir. Nəticədə Ermənistan Rusiyaya qarşı sanksiyalardan yayınmağa davam edir”.
Vidadi ORDAHALLI
