Azərbaycan dövlətinin azad ərazilərdə apardığı bərpa, quruculuq-tikinti işləri bütün dünyaya sübut etdi ki, bütün səylər birləşdirilərsə və qarşıya aydın məqsəd qoyularsa, çox qısa müddətdə kəndləri də, şəhərləri də ayağa qaldırmaq, yenidən qurmaq, burada yaşayışı təmin etmək mümkündür. Azərbaycan bu istiqamətdə dünyaya konkert örnəklər təqdim edib.
Məlum olduğu kimi, Ermənistan işğalı dövründə Qarabağ və Şərqi Zəngəzurda həyata keçirilmiş dağıntıları, urbisidi, ekosidi və minalanma təhlükəsini nəzərə alaraq bir çox ekspertlər qayıdış üçün uzun illər tələb olunacağını qeyd edirdilər. Lakin cənab Prezidentin Qarabağ və Şərqi Zəngəzurdakı bərpa-quruculuq işlərinə diqqəti nəticəsində Zəngilanın Ağalı kəndinə qayıdış 44 günlük müharibədən cəmi il yarım sonra baş tutdu. Qeyd edək ki, Ağalı kəndində innovativ tikinti materiallarından istifadə olunmaqla tam izolyasiya olunmuş 200 fərdi ekoloji ev, ikimərtəbəli 4 qeyri-yaşayış binası, 360 şagird yerlik məktəb və 60 yerlik uşaq bağçası tikilib. Növbəti mərhələ çərçivəsində 150 evin tikilməsi nəzərdə tutulur. Dünyanın bəzi ekspertlərinin proqnozları Ağalı kəndində alt-üst oldu və cəmi ilyarımda 200 ev, bağça və başqa tikintilər gerçəklşdfirildi.
Azərbaycan cəmi ilyarımda buna necə nail olub, Ağalı kəndində bu işlər necə görülüb?
“Onların proqnozları özünü doğrultmadı, dünya Ağalı kəndinin timsalında tamam fərqli bir hadisənin şahidi oldu”
Məsələyə münasibət bildirən siyasi elmlər üzrə fəlsəfə doktoru, Beynəlxalq Münasibətlərin Təhlili Mərkəzinin aparıcı məsləhətçisi Mətin Məmmədli “Bakı-Xəbər”ə şərhində bildirdi ki, Qarabağ və ətraf rayonlar işğaldan azad olunduqdan sonra Azərbaycan dövlətinin qarşısında duran ikinci strateji hədəf vaxtilə işğal olunmuş regionun yenidən bərpası idi. “Torpaqlar işğaldan azad olunduqdan sonra müəyyən ekspertlər belə bir fikir səsləndirirdilər ki, hələ uzun müddət azərbaycanlılar öz torpaqlarına qayıda bilməyəcəklər. Əsas səbəb kimi də minalanmanı, ekosid, urbisid kimi ciddi problemləri qeyd edirdilər. Lakin onların proqnozları özünü doğrultmadı, dünya Ağalı kəndinin timsalında tamam fərqli bir hadisənin şahidi oldu. Ağalı kəndi çox qısa müddət ərzində quruldu, burada yeni evlər, məktəb və digər obyektlər tikilib istifadəyə verildi. Bundan sonra insanların Ağalıya köçürülməsi prosesi başladı, orada məskunlaşdırma oldu. Eyni zamanda nəzərə almaq lazımdır ki, təkcə yaşayış məskənləri deyil, Qarabağda və ətraf ərazilərdə infrastruktur layihələri həyata keçirilməkdədir. Yəni yollar, dəmir yolu xətləri çəkilir, digər infrastruktur layihələri gerçəkləşdirilir. Bu layihələr çox sürətlə yerinə yetirilir. Bu fakt bir daha onu göstərir ki, Azərbaycan dövləti və Azərbaycan Prezidenti regionun bərpası ilə bağlı böyük siyasi iradə ortaya qoyub. Hesab edirəm ki, məhz bu siyasi iradənin və məqsədyönlü yanaşmanın nəticəsində vaxtilə darmadağın, talan edilmiş region tam bərpa olunacaq”.
M.Məmmədli hesab edir ki, azad ərazilər gözlənildiyindən də tez bərpa olunacaq, çünki yüksək templə görülən işlər, təcrübə bunu deməyə əsas verir.
M.Məmmədli əlavə etdi ki, xarici ekspertlərin necə düşünməsindən asılı olmayaraq, orada işlər görülür və dövlətimiz bərpa işlərini tezliklə başa çatdırıb əhalini öz el-obasına qaytarmaqda maraqlıdır.
İradə SARIYEVA
