Avropa Parlamentində oturub Azərbaycana daş atan deputatlardan biri Fabio Massimo Castaldodur ki, öz “Tvitter” mikrobloqunda saxtakarlıqla məşğul olur. Öz aləmində Azərbaycan hakimiyyəti qarşısına “tələb” qoyduğunu iddia edən Avropa Parlamentinin üzvü, muzdlu Fabio Massimo Castaldo saxta blokadadan danışır.
Avropa parlamentinin deputatı Azərbaycana saysız böhtan atır. Birincisi, Laçın yolundakı vəziyyəti saxtalaşdırır, ikincisi, Azərbaycanı "genosid" hazırlamaqda ittiham edir, üçüncüsü, Azərbaycanın hərəkətlərini "vəhşilik" adlandırır. Bu açıq-aşkar Azərbaycana qarşı böhtandır. Azərbaycan Avroparlamentin deputatına qarşı hüquqi-siyasi müstəvidə hansı addımları ata bilər və atmalıdır?
“Dövlətimiz ilkin olaraq o deputatı arzuolunmaz şəxs elan etməlidir”
Siyasi və Hüquqi Strateji Araşdırmalar Mərkəzinin rəhbəri Xəyal Bəşirov “Bakı-Xəbər”ə şərhində “Əvvəla qeyd edim ki, bu, Avropa Parlamentinin ermənipərəst deputatlarının ilk addımları deyil, onlar Laçın yolu məsələsindən əvvəlki dövrdə də Azərbaycana qarşı çıxışlar edib, ermənipərəst mövqelərini sərgiləyiblər. Bu gün də əllərinə bir mövzü düşüb. Məlumdur ki, deputatın “Laçın yolunun Azərbaycan tərəfindən bağlanması”, “Qarabağda yaşayan ermənilərin blokadaya salınması” və digər iddiaları tamamilə absurddur, gerçəyi əks etdirmir. Azərbaycan dəfələrlə bununla bağlı mövqeyini bildirib. Avropa İttifaqının prezidenti Şarl Mişelin dəstəyi ilə Brüssel platforması çərçivəsində 6 görüş keçirildi. Bu gün Avropa Parlamentinin də aid olduğu Avropa İttifaqı Şurasının prezidenti Şarl Mişel həmin görüşdən sonra mətbuatda səsləndirdiyi bəyanatda ermənilərin Qarabağda “blokada şəraitində yaşadığı”na dair fikir səsləndirdimi, dedimi onlar orada “pis vəziyyətdə yaşayır”? Təbii ki, yox, belə fikirlər səsləndirmədi, tamamilə fərqli mövzulara toxundu.
Bu məsələ ilə bağlı onların iddia etdiyi ifadələri kənara qoysaq, Qarabağ ərazisində yaşayan erməni əsilli Azərbaycan vətəndaşları olacaq şəxslərin “blokada”da saxlanılması ilə bağlı iddalar tamamilə əsassızdır. İlk öncə Avropa Parlamentində olan ermənipərəst deputatlar da daxil olmaqla bu kimi əsassız iddiaları səsləndirən bütün qüvvələrin əsas hədəfi, onları narahat edən məsələ Xankəndidəki mülkü ermənilər deyil, separatçı cinayətkar ünsürlərdir ki, bu gün erməni diaspor və lobbi təşkilatları ilə sıx əlaqədədirlər və kənardan idarə olunurlar. O deputatın da, başqalarının da narahatlığı məhz separatçılardan yanadır. İkinicisi, əgər iddia edildiyi kimi Azərbaycan həmin ərazini “7 aydır blokadada” saxlayırsa (bu fikir 12 dekabr 2022-ci ildə Azərbaycan vətəndaş cəmiyyətinin aktivləri Laçın qolu ərazisində Ermənistanın qanunsuz addımlarına, ekoloji terroruna, faydalı qazıntı yataqlarımızın qanunsuz istismarına qarşı etiraza başladığı gündən səsləndirilir-X.B), onları ilkin “tibbi yardımdan”, “qida”dan, “humanitar yardımdan” və orada yaşayan ermənilərin həyatı üçün mühüm əhəmiyyət daşıyan digər məsələlərdən, yardımlardan məhrum edibsə, niyə indiyə qədər bu mərhumiyyətlərdən doğan hansısa fəsad ortada yoxdur? Bütün bunlar absurddur, yalandır. Biz Xankəndidə baş verən prosesləri də görürük, insanlar orada normal yaşayırlar. Təbii ki, onlar oradakı cinayətkar ünsürlərin boyunduruğu, nəzarəti altında yaşayırlar, əl-qol aça bilmirlər. Bütün hallarda onların əməllərinin bizim adımıza yazılması yolverilməzdir və onların iddia etdiklərinin heç biri gerçək deyil”.
X.Bəşirov qeyd etdi ki, orada konsertlər, tədbirlər, hətta Azərbaycana qarşı süni aksiyalar təşkil edilir, Qarabağdakı ermənilərin blokadada yaşamasına dair bir fakt belə yoxdur. Bu da ondan xəbər verir ki, deyilənlər yalandır, absurddur: “Azərbaycan Laçın yolunda nəzarəti təmin etməklə orda insanların narahatlığına səbəb olan heç nə etməyib, Qırmızı Xaç Komitəsinin, humanitar yardımın qarşını almayıb. Azərbaycan ora mina, silah daşınmasının və başqa çirkin əməllərin qarşısını alıb. Bu da revanşist qüvvələrin, separatçıların və onların havadarlarının, Avropa Parlamentində oturan bəzi deputatların marağına ziddir, bu onları ciddi şəkildə narahat edir.
Avropa Parlamentinin bu ermənipərəst deputatının səsləndirdiyi əsassız iddialar, anti-Azərbaycan mövqeyi, dezinformasiyası bizdə heç bir təəccüb doğurmur. Biz zaman-zaman bunun şahidi olmuşuq. Amma bu kimi fikirləri səsləndirən şəxslərin dairəsi getdikcə daralır. Azərbaycana qarşı, Azərbaycanın Cənubi Qafqazda diqtə etdiyi yeni reallıqlara qarşı mövqe tutan insanların, təşkilatların, dövlətlərin sayı günü-gündən azalmaqdadır. Bu da ondan xəbər verir ki, artıq Azərbaycan döyüş meydanında olduğu kimi, siyasət və diplomatiya meydanında, informasiya cəbhəsində də Ermənistanın o yalan maşınına qarşı uğurlu addımlarını atır və bu proses bizim xeyrimizə davam etməkdədir. Biz bu cür insanlara qarşı siyasi və hüquqi müstəvidə hansı addımlar ata bilərik? Biz siyasi və diplomatik olaraq bütün gərəyi olan addımları atırıq. Bizim Brüssel platforması çərçivəsində keçirdiyimiz görüşlər zamanı müzakirə edilən məsələlər və o müzakirədə Azərbaycanın haqlı mövqeyinə dəstək verilməsi, Ermənistanın və ermənipərəst qüvvələrin müzakirəyə çıxarmaq istədikləri məsələlərin rədd edilməsi, müzakirəyə çıxarılmaması ondan xəbər verir ki, Azərbaycan bu istiqamətdə lazımı addımı atıb. Rəsmi Moskavanın təşkil etdiyi görüşlərdə də, Vaşinqton görülərində də ermənipərəst qüvvələrin müzakirəyə çıxarmaq istədiyi məsələlər rədd edilir. Hesab edirəm ki, siyasi və diplomatik baxımdan bu sahədə kifayət qədər uğurlu addımlar atırıq”.
Avropa Parlamenti üzvünə qarşı hüquqi müstəvidə görüləcək işlərə gəlincə, X.Bəşirov “Avropa Parlamentinin ermənipərəst deputatına qarşı Azərbaycan hüquqi müstəvidə addımlar atmalıdır. Dövlətimiz ilkin olaraq o deputatı arzuolunmaz şəxs elan etməlidir və onun Azərbaycanın istənilən yerinə, o cümlədən ayrılmaz tərkib hissəsi olan Xankəndiyə daxil olmasına yasaq qoyulmalıdır. Vaxtilə rahatlıqla gəlib-getdiyi Qarabağa gələ bilmirlər, onları da narahat edən bu məqamlardır. Təkcə o deputatın deyil, onun kimi Azərbaycana qarşı şər-böhtan atan digər deputatların da, rəsmi şəxslərin də Azərbaycan ərazisinə daxil olmasına qadağa qoyulmalıdır. Azərbaycanla bağlı saxta informasiyalar yayan, ölkəmizi qaralayan deputatın təmsil olunduğu Avropa Parlamentinin sədr müavini və bir neçə şəxs rüşvət qalmaqalı ilə həbs olundu. Düşünürəm ki, rüşvət qalmaqalında bu deputatın da böyük rolu var, Avropa Parlamenti sədrinin keçmiş müavininin və onunla həbs olunanların başa çatdıra bilmədiyi işləri bu deputat davam etdirir. Biz Fabio Massimo Castaldo ilə bağlı beynəlxalq səviyyədə məsələ qaldırmalıyıq ki, bu deputatın da fəaliyyəti yoxlanılsın. Rüşvət qalmaqalında onun hansı rola malik olduğunu, hansı addımlar atdığını və rüsvət qalmaqalına hansı “töhfə verdiyi”ni araşdırmaq məsələsini gündəmə gətirə bilərik. Hesab edirəm ki, biz bu cür ermənipərəst mövqe səsləndirənlərə, anti-Azərbaycan mövqeyi sərgiləyən, əsassız ittihamlar, saxta fikirlər səsləndirən bu kimi şəxslərə qarşı dərhal mövqe bildirməliyik. Biz bütün istiqamətlərdə, o cümlədn də hüqiqi müstəvidə addımlar atmalıyıq ki, bu kimi şəxslər öz məsuliyyətlərini dərk edib bu yanlış mövqelərindən əl çəksinlər” - deyə vurğuladı.
İradə SARIYEVA
