470-dən çox Avropa QHT və assosiasiyası Avropa Birliyi və Avropa Şurasının liderlərinə məktub göndərərək, onları guya “Artsax”ın Azərbaycan tərəfindən davam edən qeyri-qanuni blokadasına son qoymaq üçün təcili və təsirli addımlar atmağa çağırıb.
Məktub Avropa Şurası, Avropa Komissiyası və Avropa Parlamentinin rəhbərlərinə, həmçinin Avropa Şurasına üzv dövlətlərin başçılarına ünvanlanıb. Məktub müəllifləri Azərbaycanın Qarabağdakı erməniləri Ermənistanla birləşdirən yeganə yolu guya 7 aydan artıq müddət ərzində qəsdən blokadaya alması nəticəsində 120 min erməninin “dözülməz” həyat şəraitinə işarə edir.
Bəlli məsələdir ki, bütün bunlar ermənilərin apardıqları yalan təbliğat nəticəsində ortaya çıxıb. Ancaq bizə maraqlı olan odur ki, xaricdə Azərbaycanda QHT-lərə Dövlət Dəstəyi Agentliyinin xəttilə maliyyələşən QHT-lər var. Maraqlıdır, ermənilərin bu aksiyasının qabağında bizim həmin o QHT-lərdən səs çıxdımı? Onlardan bu baş verənlərə reaksiya yoxdursa, bunun səbəbi nə ilə bağlıdır?
“Ayrı-ayrı QHT-lər də məlum müraciətdə yer alan yalan fikirləri təkzib edəcəklər”
Sözügedən məsələyə aydınlıq gətirən Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü Zaur İbrahimli “Bakı-Xəbər”ə açıqlamasında qeyd etdi ki, belə müraciətlərə QHT-lərin reaksiyası olacaq və onsuz da ümumən erməni təbliğatına qarşı fəaliyyət var: “Əvvəla onu qeyd edim ki, 470-dən çox Avropa QHT-sinin müraciəti tamamilə qərəzlidir və reallığı əks etdirmir. Çünki bu, erməni diasporunun diqtəsi altında həyata keçirilmiş bir aksiyadır. Ona görə də sözügedən müraciət obyektiv deyil, həqiqəti əks etdirmir. Ən azından bütün dünya görür ki, Laçın yolu blokadada deyil, orada gediş-gəliş var. O üzdən, bütün bunlar həmişəki kimi, Azərbaycana qarşı qarayaxma və həqiqətləri gizlətməyə xidmət edir. Ona görə də təəssüf edirəm ki, Avropa QHT-ləri bu tip yalan kampaniyasının altına imza atırlar. Çünki bu, vətəndaş cəmiyyətinin fəlsəfəsinə, missiyasına ziddir. Yaxşı olardı ki, yalana imza atan həmin o Avropa QHT-ləri mövcud vəziyyəti obyektiv araşdırsınlar. Onlar kiçik bir araşdırma aparsalar görəcəklər ki, imza atdıqları müraciət həqiqəti əks etdirmir. Əlbəttə ki, bütün bunlar Avropadakı erməni lobbisinin həmin QHT-lərə təsirindən irəli gəlir. Bir çoxlarına yalan məlumatlar verilir və onlar bunun təsiri altına düşürlər. Digər qrup QHT-lərin buna imza atması isə maraqdan doğur. Hesab edirlər ki, sözügedən yalan kampaniyasına qoşulsalar bunun müqabilində erməni iş adamlarından, lobbisindən faydalanacaqlar. Bu amilin də rolu var. Azərbaycan QHT-ləri son aylarda erməni yalanlarının ifşası istiqamətində ciddi təşəbbüslərlə çıxış edirlər. Məsələn, Azərbaycan QHT-lərinin təşəbbüsü ilə həm Gürcüstan, həm də Avropa QHT-lərinin Ermənistanın bütün Cənubi Qafqazın ekosisteminə ziyan vurması barədə müraciət yayıldı. Onun ardınca Azərbaycan QHT-ləri Ermənistanın baş nazirinə müraciət etdilər. Ermənistan hakimiyyətini ətraf mühit məsələlərində məsuliyyətli olmağa çağırdılar. Gürcüstan QHT-ləri də bu müraciətə qoşuldu. Azərbaycan QHT-lərinin qaldırdığı məsələlər sübutlara əsaslanırdı. Ancaq Avropa QHT-lərinin məlum müraciəti sübutlara, faktlara əsaslanmır. Bizim QHT-lərinin qaldırdığı məsələlər beynəlxalq akreditasiyadan keçmiş mərkəzlərin təsdiqlədiyi nəticələri açıqladı. Çünki heç kim Oxçu çayın Ermənistan tərəfindən ciddi şəkildə çirkləndirildiyini inkar edə bilməz. Həmin çayda ağır metalların həcmi normadan dəfələrlə çoxdur. Bu gün Araz çayı çirkləndirilir və bu proses davam edir. Bütün bunlarla yanaşı, Azərbaycan QHT-ləri BMT-nin ixtisaslaşmış qurumlarına, Ümumdünya Səhiyyə Təşkilatına, Avropa İttifaqına, Avropa Komissiyasına, Avropa Parlamentinə və ətraf mühiti qorumaqla məşğul olan beynəlxalq təşkilatlara müraciət etdilər. Hazırda sözügedən müraciət müzakirə olunur. Bizim QHT-lərin bu səyləri artıq müəyyən rezonans yaradıb. Azərbaycan QHT-lərinin bu müraciəti Avropa və MDB məkanındakı QHT-ləri də hərəkətə gətirəcək. Bütün bunlar bütövlükdə erməni yalanlarının ifşasını özündə ehtiva edir. Ona görə də yalnız ermənipərəst fikirləri, müraciətləri müzakirə etmək doğru olmaz. Azərbaycan QHT-lərinin bu təşəbbüsləri əslində həm də Avropa QHT-lərinin məlum müraciətinə bir cavabdır. Deməyim odur ki, bizim QHT-lər erməni yalanlarının ifşası məsələsində prinsipial mövqe tuturlar. Ayrı-ayrı QHT-lər də məlum müraciətdə yer alan yalan fikirləri təkzib edəcəklər. Bunu dəlillərlə sübut edəcəklər. Deməyim odur ki, sözügedən təşəbbüslər davamlıdır”.
Vidadi ORDAHALLI
