Fransa prezidenti Emmanuel Makronun rüşvət və korrupsiya ilə məşğul olduğu barədə məlumatlar az deyil. Erməni lobbisinin əlində oyuncaq olan Makronun indiyə qədər gizli qalan dəhşətli bir əməli ortaya çıxıb. Bu da onun korrupsioner olduğunu bir daha sübut edir.
Mətbuatda yayılan məlumata görə, Fransa prezidenti Emmanuel Makronla ABŞ-ın “Uber” şirkəti arasında gizli sövdələşmənin üstü açılıb. Bu barədə Fransa parlamenti komissiyasının hesabatında məlumata rast gəlinir. Məlumatda qeyd edilir ki, “Uber” Fransa hökumətində ən yüksək səviyyədə özünə müttəfiqlər tapıb. Bildirilib ki, bu, E.Makron və onun kabinetinin üzvləri arasında qeyri-şəffaf, ancaq imtiyazlı əlaqənin göstəricisi sayılır. Məlumata görə, şirkətlə əməkdaşlığa dair qərarlar dövlət səviyyəsində şəxsi maraqlar baxımından aparılıb. Orada E.Makronun Fransanın iqtisadiyyat naziri olduğu dövrdə “Uber”lə bağladığı gizli sövdələşmə sayəsində şirkətin sürücüləri üçün təlim saatlarını 250-dən 7-yə endirdiyi barədə hissəyə də rast gəlinir.
Xatırladaq ki, "Uber" ABŞ-ın taksi xidməti göstərən dünyaca məşhur şirkətidir.
Makron illər əvvəl Fransada mötəbər bir vəzifəni tutduğu dövrdə “Uber”lə gizli sövdələşməyə gedibsə, prezident olduğu bu illər ərzində nə qədər gizli işlər çevirdiyi şübhəsizdir.
“Bu, Fransa prezidentinin əməllərini ifşa edən çox ciddi ittihamdır”
“Müasir İnkişaf” Birliyinin sədri Mübariz Göyüşlü “Bakı-Xəbər”ə şərhində qeyd etdi ki, bu gün Fransaya rəhbərlik edən Makronun keçmişi ilə bağlı üzə çıxarılan faktlar onun əsl simasını, korrupsiyaya, rüşvətə meylli olduğunu göstərir. “Bu amil göstərir ki, Makron pul müqabilində siyasi və iqtisadi sövdələşmələrə gedib. Onun “Uber”lə sövdələşməsi faktı, yəqin ki, yeganə belə hal deyil. Bu baxımdan, Makronun və komandasının, ailə üzvlərinin, onun kabinetinə yaxın olanların rüşvət və korrupsiya ilə məşğul olması ilə bağlı yeni faktların ortaya çıxacağı gözləniləndir. Yəni istənilən vaxt belə hallarla qarşılaşma mümkün olacaq. Fransa prezidentinin bu əməlini Fransa parlamenti komissiyası öz hesabatında açıqlayıb. Bu, Fransa prezidentinin əməllərini ifşa edən çox ciddi ittihamdır”.
M.Göyüşlü hesab edir ki, baş verənlər Fransa dövlətinin həmişə əlində bayraq kimi tutduğu “demokratiya”, “azad rəqabət mühiti”, “azad bazar iqtisadiyyatı” və digər fikirləri quru sözdən, şüardan ibarət olduğunu göstərir, əməldə bunların heç biri yoxdur. O vurğuladı ki, Makron nazir olduğu vaxt rüşvət alıb və azad rəqabət mühitini boğub. “Hesab edirəm ki, bu özünü demokratiyanın beşiyi sayan böyük bir dövlətin başçısı üçün biabırçılıqdır. Bu faktın üzə çıxması onu pis vəziyyətə salacaq. Onsuz da Makronun həyata keçirdiyi siyasət, Fransada baş verən son dəhşətli hadisələr fransızlarda ona qarşı böyük narazılıq yaradıb. Belə bir gərginliyin yaşandığı dövrdə Makronun “Uber”lə sövdələşməsinin ortaya çıxması cəmiyyətdə narazılığa səbəb olacaq. Makron keçmişdə işlədiyi bu əməllə bağlı çıxıb açıqlama verməlidir” - deyə bildirən M.Göyüşlü hesab edir ki, o, fransız xalqının iqtisadiyyatı, maliyyəsi ilə özünə var-dövlət toplayan bir şəxsdir və onun sivil dünyadan, azad bazar iqtisadiyyatından, demokratiyadan danışmaq haqqı yoxdur.
Leyla QARAXANLI
