Prezident İlham Əliyev Ukraynaya humanitar yardım göstərilməsi məqsədilə Azərbaycan Respublikasının Energetika Nazirliyinə vəsait ayrılması haqqında Sərəncam imzalayıb.
Sərəncamda deyilir ki, Azərbaycan Respublikası humanizm prinsiplərinə söykənərək, ikitərəfli və çoxtərəfli əsasda dünyanın bir çox ölkəsinə humanitar yardımlar göstərir:
"Ukraynada yaranmış son vəziyyətlə əlaqədar Azərbaycan dövləti tərəfindən Ukrayna xalqına da bir neçə dəfə humanitar yardım göndərilib. Azərbaycan Respublikası ilə Ukrayna arasında münasibətlər dostluq və tərəfdaşlıq zəminində müvafiq ikitərəfli sənədlər, o cümlədən 2000-ci il 16 mart tarixli “Azərbaycan Respublikası və Ukrayna arasında dostluq, əməkdaşlıq və tərəfdaşlıq haqqında Müqavilə”, 2008-ci il 22 may tarixli “Azərbaycan Respublikası və Ukrayna arasında dostluq və strateji tərəfdaşlıq haqqında Bəyannamə” və 2022-ci il 14 yanvar tarixli “Azərbaycan Respublikası Prezidentinin və Ukrayna Prezidentinin Birgə Bəyannaməsi” əsasında inkişaf edir".
Sərəncamla Ukraynaya humanitar yardım göstərilməsi məqsədilə elektrik avadanlığının satın alınması və göndərilməsi üçün Azərbaycan Respublikasının 2023-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Energetika Nazirliyinə 7,6 milyon (yeddi milyon altı yüz min) ABŞ dollarının manat ekvivalentində vəsait ayrılıb. Maliyyə Nazirliyi bu Sərəncamın 1-ci hissəsində göstərilən məbləğdə maliyyələşməni təmin etməli, Nazirlər Kabineti bu Sərəncamdan irəli gələn məsələləri həll etməlidir.
Bu addım Azərbaycanın tam müstəqil siyasət yürütdüyünə bir nümunə sayıla bilərmi?
Cümhuriyyət Xalq Partiyasının sədri Bədrəddin Quliyev “Bakı-Xəbər”ə açıqlamasında bildirdi ki, Energetika Nazirliyinin 7,6 milyon ABŞ dolları vəsaiti Ukraynaya yardım kimi ayırması müharibə başlayandan indiyə kimi Azərbaycan tərəfinin Ukrayna bölgəsinə humanitar yardım etdiyinin daha bir sübutudur: “Əvvəllər də təcili yardım maşınlarına istifadə olunmasına yanacaq yardımı olunmuşdu. Hazırda da bu dəstək davam edir. Azərbaycan ərazisində müharibə gedən zaman biz yardımın nə qədər zəruri olduğunu dərk etdik. Fakt ondan ibarətdir ki, rus qoşunlarının sülhməramlı adı altında bu bölgəyə hansı şərtlərlə gəldiyini Azərbaycan cəmiyyətində çox insanlar hələ bilmir. Bu dövrdə istər Türkiyə, istər Azərbaycan dünya şəraitində şərtləri nəzərə alaraq hərəkət etməyə çalışırdı. Qarabağda yarımçıq qalmış işlərimiz həll olandan, bütün məsələlər ortaya çıxandan sonra görünəcək ki, Ukraynanın müharibə dövründə yaşadıqlarının eynisini biz də yaşamışıq. Bütün bunların baş verdiyi bir zamanda dövlət başçısı da mövcud şəraiti nəzərə alaraq addımlar atır. Fakt ondan ibarətdir ki, Ukrayna müharibəsinin başlanması bölgədə böyük qüvvələrin yerləşməsinə səbəb oldu. Ona görə də, Ukrayna müharibəsinin daha da ciddiləşməsi xarici və daxili siyasətdə Türkiyə, Azərbaycan amilini ortaya çıxardır. Şuşa Bəyannaməsindən sonra Azərbaycan Türkiyə ilə hər zaman dövlət maraqları, xarici siyasət, təhlükəsizlik baxımından birgə addımlar atır. İsveçin NATO-ya qəbulu ilə bağlı Ərdoğanın atdığı addımlar yeni baxışlar, yeni strategiyaların olduğunu üzə çıxardı. Azərbaycan Ukraynanın ərazi bütövlüyünü tanıyır. Separatizmin nə olduğunu biz gözəl bilirik. Çünki özümüz də bundan əziyyət çəkmişik. Azərbaycanın belə müstəqil mövqe sərgiləməsi əsl cəsarət nümunəsidir”.
Məhəmmədəli QƏRİBLİ
