Oyuncaq “prezident” Arayik Arutyunyan başını o qədər itirib ki, nə edəcəyini bilmir. Xankəndidə yaşayan ermənilərin Azərbaycan cəmiyyətinə reinteqrasiyasının aktuallaşdığı bir vaxtda Araikin özünü yuyulmamış çömçə kimi ortaya atması və yekə-yekə “bəyanatlar” verməsi diqqəti çəkir.
Kukla “prezident” Xankəndidə təşkil olunan süni “oturaq aksiyaya” qoşulduğunu elan edib. Guya Xankəndidə vəziyyət “ağırdır” və “humanitar fəlakət” mövcuddur, bu səbəbdən də separatşıbaşı “aksiyaya” qatılır. Deyib ki, Xankəndinin İntibah meydanında “oturaq aksiyaya”ya qoşulur.
Bütün bunları separatçı “prezident” yaydığı videomüraciətində bildirib. “Oturaq aksiya” məsələsi ilə kifayətlənməyən separatçıbaşı ona çörək verən, arxa-dayaq duran dövlətlərə qarşı da çıxıb.
Arayik deyib ki, Rusiya, Ermənistan, Fransa, ABŞ, ATƏT, Avropa İttifaqı və s Azərbaycana dəstək siyasətinə son qoymalıdır. Göründüyü kimi, bu uzdəniraq ünsür bütün dünyaya, Rusiyaya, Fransaya, Ermənistana belə “müharibə” elan edir.
Bu onu göstərir ki, artıq Arayikin nəfəsi kəsilir, orada boğulur və artıq nə danışdığını bilmir. Bu cür məntiqsiz bəyanatlar verir. İkincisi də, deyir ki, bir həftə vaxt veririk, nəticə olmasa daha kəskin addımlar atacağıq.
Arayik və separatçılar nə kəskin addım atasıdır ki? Orada dörd divar arasında sıxılıb qalmış vəziyyətdə Arayik kimə nə edə bilər?
“...Separatçılar “oturaq aksiya”dan o yana keçə bilməzlər”
Azad Vətən Partiyasının sədri Akif Nağı “Bakı-Xəbər”ə açıqlamasında bildirdi ki, Qarabağdakı erməni terrorçularının başçısı Araik küncə sıxılmış meymun balası vəziyyətindədir. “O başqa çıxış yolu axtarır, tullanıb düşür, hər dəfə də özünü daha gülünc vəziyyətə salır. Bunun başqa adı yoxdur. Azərbaycan öz qanuni haqlarını həyata keçirir. İstər Laçın yolunda nəzarət buraxılış keçid məntəqəsi qurması, istər Xankəndi istiqamətində yüklərin daşınması, istər Bərdə-Ağdam marşurutunu təklif etməsi, istərsə də digər məsələlərdə Azərbaycan gərəyi olan addımları atıb. Xankəndi də Azərbaycan ərazisidir və orada da çox yaxın vaxtda hakimiyyət bərpa olunacaq. Araik bunu başa düşməli reallıqları qəbul etməlidir. Amma görsənir ki, ya başa düşmür, kütbeyindir, ya da başqalarının diqtəsi ilə hərəkət edir. Ora Azərbaycan ərazisidir”-deyə bildirən partiya sədri vurğuladı ki, ermənilər Qarabağ məliklərinin dövrünə “istinad etmək” istəyirlər, bu da 300 il əvvəl Nadir şahın dövründə olub, məliklərin isə ermənilərə heç bir aidiyyəti yoxdur. Qarabağda yaşayan ermənilərin o torpaq üzərində heç bir haqqı olmadığını deyən A.Nağı vurğuladı ki, onların orada tarixdə heç zaman siyasi quruluşları olmayıb. “Dünyaya salmaq istədikləri bu nə yalan səs-küydür? Araik orada terrordan başqa guya nə edə bilər ki? Araikin separatçılara daim havadarlıq edən ölkələrə “müharibə elan” etməsi onu göstərir ki, tamamilə gücləri tükənib və yalandan hay-küy salırlar. Rusiyaya, Ermənistana, ABŞ-a, Fransaya, ATƏT-ə, Avropa İttifaqına “verdiyi” bir həftə tamam olandan sonra guya nə edə bilər ki? Araikin əlindən heç nə gəlməz. Guya “aksiya”lar davamlı olacaq, özü də gedib ora qoşulub. Araik və separatçılar “oturaq aksiya”dan o yana keçə bilməzlər. Laçın yoluna doğru hərəkət etdilər, amma sülhməramlılar cavablarını verdilər ki, gedin yerinizdə oturun, biz burada asayişi qoruyuruq, başqa missiyamız yoxdur. Onlar bu gün hansısa hərəkətlənmə ilə özlərinə ziyan vuracaqlar”.
A.Nağı qeyd etdi ki, separatçıların hər hansı bir hərəkəti Azərbaycanın Xankəndini nəzarətə götürməsinə səbəb olacaq.
Partiya sədri hesab edir ki, Araikin Fransanı, Rusiyanı, Ermənistanı, ABŞ-ı, ATƏT-i, Avropa İttifaqını “hədələməsi” iki məsələ ilə bağlı ola bilər. O vurğuladı ki, ehtimala görə, ya Araik fitnə təşkil edib oturaq aksiya keçirib adamları öldürüb suçu Azərbaycanın üzərinə atmağı, ya da yenə separatçıların bizim mövqelərə atəş açmasını planlayıb, məqsəd də dünyanı aldatmaq və beynəlxalq ictimai rəyi çaşdırmaqdır. “Araikin bu “bəyanatı” ola bilər ki, elə adları çəkilən ölkələr tərəfindən onun dili ilə ortaya atılıb. Separatçılardan çox şey gözləmək olar, onlar öz uşaqlarını da öldürüb Azərbaycanın üzərinə yıxa bilər...
Bütün hallarda Azərbaycan haqlıdır və dövlətimizin mövqeyi ədalətlidir”.
A.Nağı hesab edir ki, Araik Xankəndidə yalnız hansısa təxribatlar törədə bilər, çünki onun hansısa böyük məsələlərə nə gücü, nə də nəfəsi çatar.
Leyla QARAXANLI
