Rusiya xarici işlər nazirinin müavini Andrey Rudenko Azərbaycan səfiri Polad Bülbüloğlu ilə görüşündə Moskvada keçirilməsi nəzərdə tutulan üçtərəfli görüşə toxunub:
“Rusiya tərəfi sülh müqaviləsinin razılaşdırılması mövzusu, ardınca Rusiya, Azərbaycan və Ermənistan liderlərinin Moskvada keçiriləcək sammitində imzalanacaq sözügedən sənədin, razılaşmaların həyata keçirilməsi yollarının müzakirəsi üçün yaxın vaxtlarda Moskvada xarici işlər nazirlərinin üçtərəfli görüşünü təşkil etməyə hazır olduğunu təsdiqləyib”.
Rusiya Xarici İşlər Nazirliyi bir tərəfdən Azərbaycan və Ermənistanın Moskvada görüşünü təşkil etməyə, sazişin imzalanması üçün gərəkli addımların atılmasına hazır olduğunu bildirir, o biri tərəfdən elə bəyanat yayırlar ki, bu bəyanat yaxın vaxtlarda Azərbaycan-Ermənistan-Rusiya rəhbərlərinin yüksək səviyyəli görüşünün keçirilməsini praktik olaraq mümkünsüz edir. Yəni Rusiya XİN-in məlum bəyanatından sonra nə dərəcədə etimad göstərmək, inanmaq olar ki, tezliklə Moskvada üçtərəfli görüş baş tutacaq? Əslində Rusiya XİN-in o bəyanatı Moskvada üçtərəfli görüş perspektivlərinə zərbə vurmadımı?
“Biz Moskvanın pozuculuq fəaliyyətini neytrallaşdırmaq üçün bütün vasitələrdən istifadə etməliyik”
Məsələ ilə bağlı “Bakı-Xəbər”ə açıqlama verən Böyük Azərbaycan Partiyasının sədri Elşad Musayevin fikrincə, Brüssel görüşü zamanı Rusiya XİN-i qəbuledilməz bəyanat yaydı: “Məlum bəyanat faktiki olaraq Rusiyanın sülhpərvər missiya yerinə yetirmədiyini bir daha ortaya qoydu. Biz əvvəldən mövqe bildirmişdik ki, Rusiya sülhməramlı missiyası adı altında Qarabağa daxil olsa da, əslində işğalçılıq siyasətindən əl çəkmək niyyətində deyil. O cümlədən, Azərbaycanla Ermənistan arasında barışıq mühiti yaratmaq niyyətində deyil. Əksinə, problemin dondurulmuş şəkildə saxlanılmasında maraqlıdır və regiondan çıxmaq istəmir. Rusiya hələ də Cənubi Qafqazı öz nəzarətində saxlamaq istəyir. Ona görə də Rusiya XİN-in bəyanatı sırf pozuculuq məqsədi daşıyır. Yaxşı ki, Azərbaycan Xarici İşlər Nazirliyi dərhal Rusiya XİN-ə cavab bəyanatı verdi. Həmin cavab bəyanatında da qeyd edildi ki, məlum bəyanat Rusiya ilə Azərbaycan arasında imzalanan sənədlərə ziddir. Söhbət ərazi bütövlüyündən gedir. Bizim XİN-in bəyanatında açıq göstərildi ki, Azərbaycan 10 noyabr 2020-ci ildə imzalanan üçtərəfli razılaşmada öz öhdəliklərini yerinə yetirib. Ermənistan isə öhdəliklərinin bir çoxunu yerinə yetirmir. Rusiya da faktiki olaraq Ermənistanla bağlı öz öhdəliklərini yerinə yetirmir. Bütün bunlardan sonra Rusiya Azərbaycan və Ermənistan arasında görüş keçirilməsi niyyətini ortaya qoyub. Əlbəttə ki, Rusiyanın vasitəçilik təşəbbüsünə inanmaq, etimad göstərmək mümkün deyil. Çünki bu, Kremlin əsl siyasəti ilə üst-üstə düşmür. Eyni zamanda, Rusiyanın son vasitəçilik təklifində konkret heç nə yoxdur. Bütün bunlara baxmayaraq, keçirilən görüşlərdə iştirak etmək lazımdır. Çünki Rusiya qaba gücdür. Rusiya Ukrayna bataqlığında çabalasa da, köhnə imperiya ambisiyalarından hələ də əl çəkməyib. Bütün bunlara baxmayaraq, Azərbaycan 20-30 il əvvəlki dövrlə müqayisədə çox güclüdür. Azərbaycanın müttəfiqləri var, qardaş Türkiyə ilə birlikdə hərəkət edir. Azərbaycan həm hərbi sahədə güclüdür, həm də diplomatik müstəvidə Ermənistandan üstün mövqedədir. Ona görə də biz Moskvanın pozuculuq fəaliyyətini neytrallaşdırmaq üçün bütün vasitələrdən istifadə etməliyik”.
Vidadi ORDAHALLI
