Cari ilin 17 iyul tarixində Səfir Polad Bülbüloğlu Rusiya Federasiyasının xarici işlər nazirinin müavini Andrey Rudenko ilə görüşmüşdür.
Bu barədə Azərbaycanın Rusiyadakı səfirliyindən bildirilib.
A.Rudenkonun sözlərinə görə, bu gün Rusiyanın əsas məqsədinin Ermənistanla Azərbaycan arasında sülh sazişinin imzalanmasıdır ki, bunun üçün Rusiya tərəfi hərtərəfli dəstək göstərməyə, o cümlədən öz ərazisində görüşlər təşkil etməyə hazırdır.
Bundan əlavə, Andrey Rudenko Azərbaycanın ərazisində müvəqqəti yerləşdirilmiş Rusiya sülhməramlı qüvvələrinin fəaliyyətinə də toxunmuşdur.
Polad Bülbüloğlu Azərbaycan tərəfinin qəti mövqeyini rusiyalı həmsöhbətinə çatdıraraq bildirmişdir ki, Rusiya Federasiyası ilə Azərbaycan Respublikası arasında 1997-ci ildə imzalanmış “Dostluq, əməkdaşlıq və qarşılıqlı təhlükəsizlik haqqında” müqaviləyə əsasən Rusiya Federasiyası Azərbaycan Respublikasının ərazi bütövlüyünü birmənalı olaraq tanımış və heç vaxt ərazi bütövlüyümüzü şübhə altına almamışdır. Bu səbəbdən də Rusiya XİN-in 15 iyul tarixli bəyanatı Azərbaycanda, o cümlədən millət vəkillərimizin, ekspert və politoloqlarımızın narazılığına səbəb olmuşdur.
Bununla belə, ölkəmizin Səfiri Rusiya sülhməramlı kontingentin fəaliyyətinə toxunaraq vurğulamışdır ki, onun müşayiəti ilə ermənilər tərəfindən gizli dağ yolları ilə Xankəndinə müəyyən olmayan mallar daşınır, oradakı məktəblilərə hərbi təlimlər keçirilir ki, bütün bunlar da Azərbaycanda haqlı narazılığa səbəb olur, Rusiya-Azərbaycan münasibətlərinə kölgə salır.
Polad Bülbüloğlu onu da həmkarının diqqətinə çatdırmışdır ki, iyulun 14-də Şuşada olarkən orada atəşkəsin pozulduğunun şahidi olmuşdur.
Eyni zamanda Səfir Rusiya mətbuatında Azərbaycanın ərazi bütövlüyü ilə bağlı səslənən qərəzli fikirlərin də cəmiyyətimizdə, o cümlədən politoloq və ekspertlər arasında mənfi reaksiya doğurduğunu bildirmişdir.
Polad Bülbüloğlu Xankəndində Ruben Vardanyanın təxribat xarakterli fəaliyyətindən bəhs edərkən, onun mövcud vəziyyətin normallaşmasına əngəllər törətdiyini vurğulamış, cəmiyyətimizdə onun məhz Rusiya tərəfindən Xankəndinə göndərildiyi fikrinin formalaşdığını bildirmişdir.
Sülh müqaviləsinin Prezident İlham Əliyevin təşəbbüsü olduğunu deyən Azərbaycanın Səfiri, ölkəmiz üçün danışıqların harada aparılmasının əhəmiyyət kəsb etmədiyini, əsas məsələnin danışıqların davam etməsi və konkret nəticənin əldə edilməsinin olduğunu vurğulamışdır.
Hal-hazırda işğaldan azad edilmiş ərazilərimizdə aparılan geniş təmir-bərpa işləri haqqında danışarkən, orada yaşayan ermənilərin buna şahid olduqlarını bildirmiş, bunların isə onlar üçün Azərbaycanın tərkibində həyatın firavan olacağına əminliyini ifadə etmişdir.
Həmçinin görüşdə regionda baş verən hadisələr və qarşılıqlı maraq doğuran digər mövzular ətrafında ətraflı fikir mübadiləsi aparılmışdır.
MƏTLƏB
