“Biz saxlanılanlar məsələsini də müzakirə etdik. Liderlər alicənablıq anlayışına sadiqliklərini bir daha təsdiqlədilər və bununla da ehtiyatsızlıqdan qarşı tərəfə keçən əsgərlərin azad olunması asanlaşacaq”.
Bu fikirləri Avropa İttifaqı Şurasının Prezidenti Şarl Mişel iyulun 15-də Brüsseldə Azərbaycan Prezidenti İlham Əliyev və Ermənistan Baş naziri Nikol Paşinyan ilə keçirilmiş görüşün yekunlarına dair mətbuata açıqlamasında bildirib.
“Mən hər iki tərəfdən saxlanılanların azad edilməsinin tərəfdarı olduğumu bildirdim. İtkin düşmüş şəxslərin taleyinin müəyyənləşdirilməsi və minatəmizləmə üzrə əməkdaşlığın genişləndirilməsinin vacibliyi də müzakirə olundu. Mən bir daha tərəfləri mümkün qədər çox məlumat mübadiləsi aparmağa çağırdım”, - deyə Şarl Mişel bildirib.
“Razılaşma imkan verəcək ki, qondarma ittihamlarla azadlıqdan məhrum edilən əsgərlər Azərbaycana təhvil verilsin”
Məsələ ilə bağlı “Bakı-Xəbər”ə açıqlama verən hərbi ekspert Ramil Məmmədli hesab edir ki, bununla bağlı razılşmanın əldə olunması önəmli məqamdır: “Məsələ ondadır ki, müxtəlif səbəblərdən əsgərlərimiz azaraq Ermənistan ərazisinə keçib. Ancaq Ermənistan bundan sui-istifadə edərək həmin əsgərlərlə bağlı qondarma məhkəmə təşkil edir. Daha sonra qondarma sübutlarla əsgərlər uzun müddət azadlıqdan məhrum edilir. Razılaşma imkan verəcək ki, qondarma ittihamlarla azadlıqdan məhrum edilən əsgərlər Azərbaycana təhvil verilsin. Bu isə o deməkdir ki, onlar Azərbaycana təhvil veriləndən sonra dərhal azad oluunacaq. Düzdür, bizdə də erməni diversantlar var ki, bir neçə il azadlıqdan məhrum edilib. Ancaq biz onları dəyişməklə əsgərlərimizi erməni əsirliyindən xilas etmiş olacağıq. Bütün bunlar, əlbəttə ki, Avropa İttifaqının prinsipial mövqeyi sayəsində mümkün olub. Ermənistandan olsaydı, bununla bağlı üzərinə öhdəlik götürməzdi. Aİ rəhbərliyinin prinsipiallığı və bizdə olan diversantlar Ermənistanı bununla bağlı üzərinə müəyyən öhdəliklər götürməyə məcbur edib. O cümlədən, Ermənistan Birinci Qarabağ müharibəsində itkin düşən 4 min nəfərə yaxın azərbaycanlının taleyinə aydınlıq gətirmir. Həmçinin işğal dövründə ərazilərimiz başdan-başa necə gəldi kütləvi şəkildə minalanıb. Bu vaxta qədər verilən xəritələrin çoxu saxta olub. Hesab edirəm ki, beynəlxalq qurumlar çərçivəsində Ermənistana təzyiqlər artırılmalıdır. Bütün sübut və vasitələrdən istifadə etməklə, Ermənistana bu yöndə təzyiqləri artırmalıyıq. Sonuncu Brüssel görüşündə Mişel tərəfindən sadalanan məsələlərin qeyd edilməsi, artıq bu yöndə ciddi proseslərin getməsindən xəbər verir. Yoxsa Ermənistanı öz insafına buraxsaq, onlar heç vaxt nə mina xəritələrini təqdim edər, nə də itkin düşənlərlə bağlı əməkdaşlıq edərlər. Ona görə də ermənilərlə yalnız güc dilində danışmaq və təzyiqlərlə onları buna məcbur etmək gərəkdir”.
Vidadi ORDAHALLI
