Avropa İttifaqının Ermənistandakı missiyası məlumat yayıb ki, onların müşahidəçiləri hər gün Ermənistan və Azərbaycanın sərhədyanı rayonlarının 3800 km-ə yaxın ərazisində patrul xidməti aparır:
“Silahsız mülki AB missiyası olaraq bizim mandatımız təhlükəsizlik vəziyyəti haqqında hesabat vermək və cümə günü Arazdəyəndə olduğu kimi insidentlərdən sonra yerində yoxlanılmış məlumat toplamaqdır”.
Azərbaycanla Ermənistan arasında dövlət sərhədinin uzunluğu təxminən 1000 km civarındadır. Buna görə də AB müşahidəçilərinin “3800 km-ə yaxın” sərhəd ərazisini necə “patrul” etdiyi diqqət çəkib. Avropa missiyasının bu yanlışını nə ilə izah etmək olar?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, Avropa Birliyinin müşahidəçiləri əsasən fransızlardan, 30 nəfər isə alman polisdən ibarətdir: “Bildiyimiz kimi, həmin faransızlar və almanlar da birbaşa ermənilərin təsirindədir. Onlar beynəlxalq müşahidəçi kimi yox, ermənilərin tərəfdaşı kimi çıxış edirlər. Necə ki, Makron öz simasını itirərək, biz daima Ermənistanı dəstəkləyəcəyik kimi bəyanatlar verdi. Doğrudan da Ermənistanla bizim sərhədimiz 1007 km - dir. Onlar 3800 kilometri necə və hardan müşahidə edirlər, bəlli deyil. Bu məsafə üçün Avropa İttifaqından, Fransadan gələnlərin Ermənistanı bir neçə dəfə dövrə vurması gərəkir. Ancaq hər şeyin ölçüsü var. Ermənistanla Azərbaycan sərhədi 996 km - dən 1007 km arasında dəyişir. Onların bu hərəkətləri bir daha rəqəmləri şişirtdiklərini göstərir. Təbii ki, biz də bütün bunlara qarşı ciddi tədbirlər görməliyik. Qarabağda yaşayan ermənilərin sayının yalandan şişirdilib 120 min edilməsi özü ermənilərin xəstə təxəyyülündən xəbər verir. Ermənistanın 3800 km ərazisi dedikdə bəlkə də Rusiyanı da nəzərdə tuturlar və bu da çox gülüncdür. Ona görə də, mən hesab edirəm ki, Azərbaycanın irəli sürdüyü 5 prinsip əsasında sülh müqaviləsini imzalamağa Ermənistanı məcbur edəcəyik. Ondan sonra da Avropa Birliyinin müşahidəçilərinin dırnaqarası “3800 km ərazidə” müşahidə aparmalarına ehtiyac qalmayacaq. Eyni zamanda rus sülhməramlıları da müddətləri bitəndən sonra burdan gedəcək və ölkədə sabitlik, sülh, əminamanlıq yaranacaq. Bu səbəbdən də son Brüssel görüşündə mühüm nəticələr əldə edildi. Bir daha Ermənistan Azərbaycanın, Azərbaycan da Ermənistanın müstəqilliyini, Azərbaycan ərazisinin 86,6 min kv km, Ermənistanın isə 29,8 min kv km olduğunu tanıdıqları müəyyən olundu. Həmçinin Ərdoğan jurnalistin sualına cavab verərkən bildirdi ki, inşallah, rus sülhməramlıları vaxtı bitən kimi oranı tərk edəcək. Biz də buna inanırıq. Azərbaycanın apardığı diplomatik siyasət bunu açıq şəkildə göstərir”.
Avropa İttifaqının Azərbaycan və Ermənistana müşahidə missiyası göndərməsi təklifi Praqa görüşündə gündəmə gəlmişdi və o zaman Prezident İlham Əliyev ölkə ərazisində belə bir fəaliyyətə icazə verməsə də, Ermənistanın Azərbaycanla sərhəd bölgələrinə iki ay müddətinə 40 nəfərlik heyətin göndərilməsinə etiraz etməmişdi. Lakin sonrakı mərhələdə Fransanın qeyri-adekvat davranışları missiya ilə bağlı çərçivələri pozmağa başladı, daha çox sayda, daha uzun müddətə növbəti missiya göndərilməsi ilə bağlı məsələlər gündəmə gəldi və Azərbaycanın razılığını almadan Ermənistana iki illik missiya göndərmək qərara alındı.
Prezident İlham Əliyevin yerli televiziya kanallarına müsahibəsində də ifadə etdiyi kimi, "Növbəti missiyanın göndərilməsi, əlbəttə ki, çox xoşagəlməz bir haldır. Bu, təhlükəsizliyi artırmayacaq, əksinə, bizimlə olan bu danışıqlar formatı böyük sarsıntıya məruz qalacaq".
Azərbaycan Vətən müharibəsində və sonrakı dönəm ərzində ən azı 3 dəfə nümayiş etdirib ki, bizim üçün Ermənistanı kimin dəstəkləməsinin, erməni silahlı dəstələrinin hansı ölkənin və ya missiyanın arxasında gizlənməsinin heç bir əhəmiyyəti yoxdur – yaranacaq istənilən təhlükə, təhdid dərhal aradan qaldırılacaq. Prezident İlham Əliyevin ardıcıl məqsədyönlü səyləri ilə Azərbaycan Ordusunun gücü də, imkanları da Vətən müharibəsindən sonra qat-qat artıb, Azərbaycanın özünün siyasi imkanları da bütün dünyada, o cümlədən Avropada köklü şəkildə genişlənib.
Məhəmmədəli QƏRİBLİ
