Erməni mediası yenə də öz ənənəsinə sadiq qalaraq qarışdırıcılıqla məşğul olur. Ermənilərə havadarlıq etməkdə ad çıxaran bəzi Amerika şirkətləri də onların təxribatlarına dəstək çıxırlar. ABŞ şirkətlərinin Arazdəyəndə metallurgiya zavodu tikməsi bu təxribatlara və ermənilərin həyata keçirdiyi ekoterrora dəstək verməsi deməkdir. “Armenpress”in yaydığı məlumata görə, Arazdəyəndə tikilməkdə olan metallurgiya zavodunun sahibi olan Amerika şirkətləri Bakıdan dəymiş ziyanın ödənilməsini tələb edəcək.
Erməni mediası yazır ki, Arazdəyəndə tikilməkdə olan metallurgiya zavodunun sahibləri olan Amerikanın “Virtual Funding” və “CSE Global Invests” şirkətləri Azərbaycanın “tikintini atəşə tutması” ilə bağlı bəyanat yayıb. Bu qondarma və saxtakarlıq əsasında qurulan bəyanatda şirkətlər Azərbaycanın göstərdiyi beynəlxalq konvensiyaların heç bir müddəasını pozmadığını iddia ediblər. Şirkətlər iddia edib ki, guya Azərbaycan onlara “ziyan vurub” və onlar da “beynəlxalq hüquqi platformalarda dəymiş ziyana və itirilmiş faydalara görə kompensasiya tələb etməyə hazırdırlar”. Erməni propaqandasının əlində oyuncağa çevrilən, Azərbaycanın haqlı addımlarına qarşı təxribat edən və Naxçıvana qarşı Ermənistanla birgə ekotəcavüz hazırlayan “Virtual Funding” və “CSE Global Invests” şirkətləri öz əməllərini və pis niyyətlərini ört-basdır etmək üçün Azərbaycana qarşı əsassız iddia irəli sürür. Azərbaycanın beynəlxalq miqyasda “Virtual Funding” və “CSE Global Invests” şirkətlərinin Arazdəyəndə metallurgiya zavodunun tikintisinin dayandırılması ilə bağlı başlatdığı və yerli vətəndaş cəmiyyəti institutunun təmsilçiləri ilə yanaşı xarici QHT nümayəndələrinin də yaxından iştirak etdiyi kampaniya, beynəlxalq ictimaiyyətə, beynəlxalq qurumlara müraciətləri bu şirkətləri və onların erməni quyruqlarını əndişəyə salıb. Bu səbəbdən də onlar Azərbaycanın haqlı tələbinə ləkə yaxmağa çalışırlar və iddia edirlər ki, guya bu siyasi motivli addımlardır. Öz ekoloji terror hərəkətlərini gizləmək üçün ölkəmizi hədəfə alırlar. Guya ki, bu zavod “ziyansızdır”, ekoloji problem yaratmır. İddia edirlər ki, guya iyunun 13-də Azərbaycan onların tikdilkəri zavodu “atəşə tutmağa başlayıb” və guya “atışma bugünə qədər davam edir”, bu müddət ərzində “iki əməkdaşları xəsarət alıb, traktor, kran və şirkət yük maşını xarab olub, sıradan çıxıb”. Guya bütün bunlar foto və videoya çəkilərək tərəflərindən dərc olunub. Yuxarıdakı faktlar müxtəlif ölkələrdən olan səfirlər, diplomatik nümayəndələr, beynəlxalq müşahidəçilər və jurnalistlər tərəfindən də qeydə alınıb. Əlbəttə, bu bəyanatda əks olunanlar yalandır və onlar özləri ağılda olanları torlarına sala biliblər. Deyirlər ki, guya 40-a yaxın ölkənin diplomatik nümayəndələri də onları dəstəkləyir.
Bu şirkətlər tamamilə erməni toruna düşüblər və o diplomatları da öz qondarma əməllərinə şərik edirlər. Özləri də yaxşı bilirlər ki, Azərbaycan ordusu onlara atəş açmayıb və Azərbaycan haqlıdır, beynəlxalq aləm də Azərbaycanın ədalətli mövqeyinin yanında dayanmalıdır, qondarma iddialarla beynəlxalq məhkəməyə üz tutub Azərbaycana qarşı iddia qaldırmaqla, əslində özlərini ifşa etdiklərinin fərqlində olmalıdırlar.
Sosial-iqtisadi sahə üzrə ekspert İlqar Hüseynli baki-xeber.com-a şərhində bildirdi ki, Ermənistan özünün terror siyasətinə başqalarını da qatır. ABŞ şirkətlərinin üzdən iraq bəyanatı barədə danışan İ.Hüseynli “Burada bir neçə faktor ola bilər. Əvvəla, bizim ekoloqlar, vətəndaş cəmiyyəti institu və Azərbaycan hökuməti həmin zavodun tikintisinin birdəfəlik dayandırılması ilə bağlı ortaya iradə qoyub. ABŞ-ın ölkəmizdəki səfirliyinə, qurumlarına bununla bağlı konkret tələblər irəli sürüb. Lakin ABŞ şirkətləri Arazdəyəndə o zavodun tikintisini davam etdirir. Sözsüz ki, Amerika şirkətləri deyilərkən burada ABŞ dövlətinə bağlı hansısa şirkətlərdən, şəxslərdən söhbət getmir. Yəqin ki, burada Amerikada yaşayan erməni əsilli diaspora və konqresmenlərə yaxın olan erməni kökənli iş adamları bu fəaliyyətlə məşğuldurlar. Azərbaycana qarşı əsassız iddia irəli sürən şirkətləri ABŞ-da qeydiyyatdan keçməsinə baxmayaraq biz erməni şirkətləri kimi qəbul etməliyik. Çünki onların sahibi ermənilər ola bilər. Onlar özləri qəsdən belə təxribatlar yarada, o qədər də böyük ziyanı olmayan partlayışlar törədə bilərlər ki, guya bunu “Azərbaycan edib”. Sabah da bu əsassız iddianı beynəlxalq məhkəmə müstəvisinə çıxara bilərlər. Tutaq ki, onlar mülkiyyət məsələsi ilə bağlı, mülkiyyətə dəyən “ziyanla”la əlaqədar iddia ilə beynəlxalq məhkəmələrə müraciət edə bilərlər. Amma Azərbaycanın da burada tam haqlı olduğu bir məqam var”-deyə bildirdi.
İ.Hüseynli qeyd etdi ki, bu “atəş”in Azərbaycan tərəfindən açıldığı barədə iddia tamamilə əsassızdır. O hesab edir ki, iddia edənlərin məqsədinin gerçəkləşməsi mümkünsüz bir şey olacaq. “Eyni zamanda da Azərbaycanın ekoloji cəhətdən əsaslandırılan faktları var. Bu zavodun fəaliyyətindən həm bizim Araz çayına, eləcə də ölkəmizin bütün ekologiyasına dəyəcək ziyanla bağlı ciddi fikirlər var. Bu baxımdan Azərbaycan da qarşılıqlı olaraq iddia qaldırmalıdır.
Bu şirkətlərin bizə qarşı iddiası tikintinin qarşısını almağımızı əngəlləmək üçün həyata keçirdiyi təxribat hərəkətləridir”-deyə müsahibimiz vurğuladı.
İradə SARIYEVA
