Məlum olduğu kimi, iyulun 15-də Brüsseldə Azərbaycan Prezidenti İlham Əliyev, Ermənistanın baş naziri Nikol Paşinyan və Avropa İttifaqı (Aİ) Şurasının rəhbəri Şarl Mişel arasında görüş keçiriləcək. Görüş zamanı Azərbaycanla Ermənistan arasında münasibətlərin normallaşmasına dair məsələlər müzakirə olunacaq.
Brüssel görüşü ərəfəsində Ermənistan rəhbərliyi yenə də beynəlxalq mexanizmli dialoqdan bəhs edir. Ermənistanın baş naziri Nikol Paşinyan hökumətin iclasında yenidən bu məsələni gündəmə gətirərək qeyd edib ki, Bakı ilə Xankəndi arasında dialoq vacibdir: “Bakı ilə Xankəndi arasında beynəlxalq mexanizmlər çərçivəsində Qarabağ erməniləri ilə bağlı dialoq son dərəcə vacibdir”.
Brüssel danışıqları ərəfəsində “beynəlxalq mexanizmlər çərçivəsində dialoq” məsələsini yenidən ortaya atmaq nə deməkdir?
“Ermənistan prosesləri uzatmağa və predmet üzrə danışıqların aparılmasından yayınmağa çalışır”
Sözügedən məsələ ilə bağlı fikirlərini “Bakı-Xəbər”lə bölüşən politoloq Tural İsmayılovun fikrincə, Ermənistan bu kimi məsələləri ortaya atmaqla prosesi uzatmağa çalışır: “Əvvəla, Azərbaycan öz vətəndaşları olan Qarabağda yaşayan ermənilərlə dialoqa hər zaman hazırdır. Daha əvvəl Xocalıda biz bu dialoqa start vermişik. Eyni zamanda Azərbaycan Prezident Adminstrasiyası tərəfindən bir neçə dəfə Qarabağdakı erməni icması danışıqlar üçün Bakıya dəvət olunub. Lakin Xankəndidəki separatçılar və onların himayədarları belə bir görüşə əngəl olmağa çalışıblar. Nümayişkaranə şəkildə Bakıya gəlməkdən imtina ediblər. Ona görə də Azərbaycanı hansısa danışıqlardan imtina etməkdə günahlandırmaq növbəti erməni həyasızlığının göstəricilərindən biridir. Xüsusən də Brüssel danışıqları ərəfəsində Ermənistandan bu tip pozucu açıqlamaların verilməsi siyasi riyakarlıqdır. Bununla belə hesab edirəm ki, Ermənistan prosesləri uzatmağa və predmet üzrə danışıqların aparılmasından yayınmağa çalışır. Etnik ermənilər danışığa dəvət edilirsə, beynəlxalq mexanizmlərə nə ehtiyac var? Belə tələblərlə çıxış etmək tamamilə absurddur. Ermənistan öz aləmində separatçıları danışıqlarda tərəf kimi sırımağa çalışır. Bu isə mümkün olan iş deyil. İşğal dövrandə Ermənistan bunu həyata keçirə bilməyibsə, bundan sonra ümumiyyətlə belə bir şey mümkün deyil. Çünki bütün dünya, böyük dövlətlər Qarabağı Azərbaycanın tərkib hissəsi hesab edir. Xüsusən də ABŞ və Avropa İttifaqı məsələnin tezliklə həllində maraqlıdır. Bu baxımdan Ermənistan ağlını başına yığmalı və həqiqətən də Azərbaycanla münasibətlərdə normal bir dəsti-xətt seçməlidir. Eyni zamanda Azərbaycanın Xankəndi erməniləri ilə danışıqlarını bloklamaq, bu prosesin qarşısını almaq üçün Ermənistanın müxtəlif manevrlər və çirkli oyunlar həyata keçirməsi bizim tərəfimizdən əsla qəbuledilən bir hal deyil”.
Vidadi ORDAHALLI
