Ermənistan Təhlükəsizlik Şurasının katibi Armen Qriqoryan ABŞ Prezidentinin milli təhlükəsizlik üzrə müşaviri Ceyk Sallivanla görüşüb. Görüşdə Azərbaycan və Ermənistan arasında sülh müqaviləsi müzakirə olunub.
Ermənistanın “İravunk” nəşri qeyd edir ki, ABŞ tərəfindən Qriqoryana yeddi tələb təqdim olunub:
- Sülh müqaviləsi ilin sonuna qədər və yalnız Vaşinqtonda imzalanmalıdır;
- Ermənistan cənub rayonlarında 65 min azərbaycanlı qaçqını qəbul etməyi öhdəsinə götürməlidir;
- Zəngəzur bölgəsində Ermənistandakı azərbaycanlıların təhlükəsizlik problemlərini həll edəcək struktur Bakı tərəfindən açılmalıdır;
- Ermənistan 2026-cı ilə qədər Rusiya bazasını öz ərazisindən çıxarmağı və onu Şərq Tərəfdaşlığı proqramı çərçivəsində NATO-nun təlim bölmələri ilə əvəz etməyi öhdəsinə götürməlidir;
- Ermənistan SSRİ-nin xəritələrində qeyd olunan anklavları Azərbaycana qaytarmağı öhdəsinə götürməlidir;
- Zəngəzur dəhlizi beynəlxalq gömrük təşkilatının iştirakı ilə, yəni Rusiyanın iştirakı olmadan açılmalıdır;
- Ermənistan Qarabağdan tamamilə imtina etməlidir.
ABŞ-ın belə prinsipial mövqe sərgiləməsi inandırıcı sayıla bilərmi və belə olarsa, Ermənistan bu tələblərin qarşısında hansı addımları atacaq?
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistan Təhlükəsizlik Şurasının rəhbəri ABŞ qanunvericiliyində kök atan və həmin ölkədəki ümumi erməni lobbisinin Ermənistan hökumətindəki nümayəndəsidir: “Onların iki nümayəndəsi var. Biri xarici işlər naziridir. Digəri isə dediyimiz adamdır. Ermənistan hakimiyyəti bu istiqamətdə bir bölgü aparıb. Nikol Paşinyanın şəxsən özü belə təsnifatda maraqlıdır. Bu baxımdan da, Qriqoryanla ABŞ-da belə bir görüşün keçirilməsi təsadüfi deyil. Bundan bir müddət əvvəl Azərbaycan xarici işlər naziri də ABŞ-da Salivanla görüşmüşdü. Azərbaycan tərəfi sülhü neçə gördüyü ilə bağlı fikirlərini həmin görüşdə izah edib. Biz əvvələki müsahibələrimizdə də demişik ki, ABŞ-ın sülh haqda təsəvürü bizim üçün daha məqbuldur və milli maraqlarımıza uyğundur. Avropa Birliyinin də mövqeyində bizə yaxınlıq var. Blinkenlə keçirilən görüşdə də tərəflər öz təkliflərini irəli sürürdü. Çox güman ki, bu məlumatı Ermənistanın özü dövriyyəyə buraxıb. Mənim qənaətim budur ki, məlumat reallığı əks etdirir. Çünki bunun bir neçə izahı var. Şimal və Cənub kanallarında astronomik yükdaşıma qeydə alınır və bu istiqamətdə təhlükələr mövcuddur. Dünyada hər gün bahalaşma izlənilir. Belə olan təqdirdə Asiya ilə Avropa arasındakı daşımaların təhlükəsizliyinə böyük ehtiyac var. Qalır bizim üzərimizdən keçən kanal. Buna da Qarabağdakı təhlükəsizliyin tam təmin olunmaması mane olur. Bu bizimlə yanaşı, həm də onlara lazımdır. ABŞ başa düşür ki, aralıq dəhlizində sabitliyin əsası Rusiyanın Cənubi Qafqazdakı mövcudluğunu azaltmaqdan keçir. Bura artıq İran da qoşulub və ümumi prosesə mane olur. Bu nizamı yaratmaq missiyası həm də bizim üzərimizə düşür. ABŞ başa düşür ki, bunun yolu Ermənistanın şərtləri qəbul etməyindən keçir, ya da ki, Azərbaycan Ordusu özü prosesi sona çatdıracaq. İrəli sürülən şərtlər çox doğrudur. Sülhün əldə olunması üçün ən optimal reseptdir”.
Məhəmmədəli QƏRİBLİ
