İnsan Hüquqları üzrə Avropa Məhkəməsi Ermənistanın Laçın yolu ilə bağlı müvəqqəti təminat tələbini rədd edib. Bu barədə Azərbaycan Respublikasının İnsan Hüquqları üzrə Avropa Məhkəməsi yanında səlahiyyətli nümayəndəsi, Ali Məhkəmənin sədr müavini Çingiz Əsgərov bildirib.
2023-cü il 12 iyul tarixində Insan Hüquqları üzrə Avropa Məhkəməsi müvəqqəti təmin tədbirlərinin tətbiqi ilə bağlı Ermənistan Azərbaycana qarşı məhkəmə işi üzrə Ermənistanın 2023-cü il 21 iyun tarixli tələbini tamamilə rədd edib.
Beləliklə, Avropa Məhkəməsi Ermənistanın sərhəd nəzarət buraxılış məntəqəsinin aradan qaldırılması ilə bağlı tələbinin əsassız olduğuna dair qərar qəbul edib.
Avropa Məhkəməsi nəzarət-buraxılış məntəqəsinin Laçın yolu boyunca hərəkətə mane olduğunu və Azərbaycanın 2022-ci ilin 21 dekabr tarixli Qərarını pozduğunu müəyyən etməyib.
İnsan Hüquqları üzrə Avropa Məhkəməsi Ermənistanın Laçın yolu ilə bağlı müvəqqəti təminat tələbini rədd etdi və Azərbaycanın Laçında KPP qurmasını qanuni saydı. Necə deyərlər, bu dəfə də ermənilərin əli boşa çıxdı.
“İnsan Hüquqları üzrə Avropa Məhkəməsi də məsələyə hüquqi nöqteyi-nəzərdən yanaşıb və Ermənistanın iddiasını qəbul etməyib”
Məsələyə münasibət bildirən siyasi elmlər üzrə fəlsəfə doktoru, Beynəlxalq Münasibətlərin Təhlili Mərkəzinin aparıcı məsləhətçisi Mətin Məmmədli “Bakı-Xəbər”ə şərhində bildirdi ki, Ermənistan ölkəmizi İnsan Hüquqları üzrə Avropa Məhkəsinə də vermişdi, amma məqsədinə nail ola bilmədi: “Ölkəmizi o məqsədlə məhkəməyə vermişdi ki, məhkəmə Azərbaycanın Laçında Ermənistanla sərhədimizdə yaratdığı sərhəd nəzarət-buraxılış məntəqəsinin qurulmasına qarşı qərar qəbul etsin. Belə bir qərarın sözügedən məhkəmə və başqa beynəlxalq məhkəmə instansiyaları tərəfindən qəbul olunması ehtimalı yoxdur. Yaxud çox azdır. Çünki Azərbaycanın sərhədləri və ərazi bütövlüyü bütün beynəlxalq təşkilatlar, dövlətlər tərəfindən birmənalı olaraq tanınır, qəbul olunur. Yəni Azərbaycan vaxtilə BMT-yə 86.06 kv.kilometr ərazi ilə daxil edilib. Azərbaycanın öz daxilində, öz ərazisində sərhəd keçid məntəqəsi qurması ölkəmizin tam haqqı, hüququdur. Azərbaycanın öz suveren hüququnu reallaşdırmasına qarşı beynəlxalq məhkəmə hansı qərarı qəbul edə bilərdi? Məhkəmə Azərbaycana qarşı qərar qəbul etsəydi, bu tamamilə absurd olardı. İnsan Hüquqları üzrə Avropa Məhkəməsi də məsələyə hüquqi nöqteyi-nəzərindən yanaşıb və Ermənistanın iddiasını qəbul etməyib. Bunlar hamısı onun göstəricidir ki, Ermənistan həqiqətən də baş verənlərdən düzgün nəticə çıxarmır, dərs götürmür”.
M.Məmmədlinin sözlərinə görə, Ermənistan nə tarixi ədalət prinsiplərini, nə beynəlxalq hüquq normalarını qəbul etmək istəmir, İkinci Qarabağ müharibəsindən sonra regionda formalaşmış reallıqları qəbul edə bilmir, nəticədə də belə uğursuz cəhdlər edir. M.Məmmdəli qeyd etdi ki, bu ölkə bir tərəfdən məhkəmə iddiaları qaldırır, digər tərəfdən Ermənistan Silahlı Qüvvələri sərhəddə və Qarabağda təxribatlar törədir: “Yəni bütün bunlar təbii ki, həm də iki ölkə arasında danışıqlar prosesinə, sülhün əldə olunmasına mənfi təsir göstərir. Azərbaycanın mövqeyi isə qətidir, aydındır. Yəni həm ədalət prinsiplərinə, eyni zamanda da beynəlxalq hüquq normalarına əsaslanır. Qısa desək, biz həm haqlıyıq, həm güclüyük. Bu baxımdan düşünürəm ki, Ermənistan hökuməti, bütövlükdə Ermənistan toplumu nə qədər doğru-düzgün düşünüb rasional qərarlar qəbul etsə, regionda davamlı sülhə bir o qədər tez nail ola bilərik”.
İradə SARIYEVA
