Nikol Paşinyan hökumətin iclaslarında Azərbaycana qarşı cəsarətli çıxışlar səsləndirsə də, hökumət nümayəndələri onun tapşırığı ilə qapalı görüşlərdə reallıqlardan danışırlar: müqavimət təkcə faydasız deyil, həm də təsirsizdir. Azərbaycan istədiyini alacaq, Ermənistan isə müqavimət göstərərsə, itkiləri olacaq.
Bu barədə “Hraparak” nəşri yazır.
Nəşr qeyd edir ki, iki gün öncə hökumət nümayəndələri ekspertlərlə qapalı görüş keçirib və açıq, səmimi söhbət olub, lakin ictimaiyyətləşdirilməsi qadağan edilib.
İclasda iştirak edənlərdən biri nəşrə detalları açıqlayıb:
“Vitse-spiker, Ermənistan-Türkiyə münasibətləri üzrə nümayəndə Ruben Rubinyan Ankara ilə danışıqlardan bəhs edib, bildirib ki, Türkiyə Ermənistana Azərbaycanla münasibətləri tənzimləmək üçün bir ay vaxt verib, söhbət normallaşmadan gedir. Türkiyə ilə də münasibətlərin normallaşması bundan asılıdır. Ermənistan bu müddətdə Türkiyə və Azərbaycanın tələblərini yerinə yetirə bilməsə, o zaman Ermənistan-Türkiyə münasibətlərinin tənzimlənməsi unudula, arxivə göndərilə bilər.”
Türkiyənin verdiyi bir aylıq müddətdə Ermənistan lazımi addım atmasa nə baş verə bilər?
Siyasi şərhçi Elşad Həsənov "Bakı-Xəbər”-ə açıqlamasında bildirdi ki, torpaqlarımız işğal olunan gündən Türkiyə daima bizim yanımızda oldu, qapılarını Ermənistanın üzünə bağladı: “Türkiyə konkret şəkildə bildirdi ki, Azərbaycanla münasibətlər normallaşandan sonra qapılarını aça bilər. Apardıqları danışıqlar da bu yöndə davam etdirilir. Azərbaycanla münasibətlər formalaşmasa ermənilər Türkiyə ilə əlaqələrini lazımı səviyyədə qura bilməyəcəklər. Azərbaycan nə istəyir? Azərbaycan heç də qeyri-adi bir şey istəmir. Prezident İlham Əliyevin 6 ayın yekunlarına həsr olunmuş iclasda bildirdiyi kimi, Nikol Paşinyan keçən il bizim ərazi bütövlüyümüzü tanıdığını bildirib, bu isə Azərbaycanın 86,6 min km ərazisini qəbul etmək anlamına gəlir. Bu da Qarabağın bizim ərazimiz kimi tanınması deməkdir. İndi isə bizim onlardan tələbimiz odur ki, həmin səsləndirdikləri fikirlərin arxasında dursunlar və kağız üzərində sülh müqaviləsinin imzalanmasının vacibliyini anlasınlar. Başqa ölkələrin əlində alət olmaqdan qurtulmalıdırlar. Blokada şəraitində yaşamaqları bir kənara, əli-ayağı tutan gənclər Ermənistanı tərk edib Rusiyaya və digər başqa ölkələrə üz tutur. Çünki yaşayış səviyyəsi çox aşağıdır. İndiki hakimiyyət başa düşür ki, Azərbaycanın 5 prinsip əsasında irəli sürdüyü sülh müqaviləsinin bağlanması qaçılmazdır. Çünki bu, beynəlxalq hüquq normalarına uyğun olan maddələrdir. Sadəcə olaraq, Ermənistan bəzi dövlətlərin əlində oyuncaq olub. Ona görə də sülh müqaviləsini imzalamaqdan qaçır. Keçən ilin dekabrında da təyin olunan görüş baş tutmadı. Bu da Fransa prezidenti Makronun söhbətə qarışmasından sonra baş verdi. Yəqin ki, bütün bunları analiz edən, hər zaman Ermənistanın arxasında duran Rusiya, başı Ukrayna ilə müharibəyə qarışdığından, vəziyyəti ağır olduğundan artıq başa düşür ki, Türkiyə və Azərbaycanın sülh bağlama təzyiqlərinə qarşı dura bilməyəcəklər. Onlar bilir ki, Ermənistanın xilası bu ölkələrlə münasibətləri normallaşdırmaq, qonşuluq şəraitində yaşamaqdan keçir. Ona görə də, Türkiyənin verdiyi bir ay müddəti erməni siyasi rəhbərlərini dərindən düşündürəcək və onları Azərbaycanla münasibəti normallaşdırmağa vadar edəcək. Sülh müqaviləsi bağlanandan sonra da ermənilərin istədiyi kimu kommunikasiya yolları açılacaq, eyni zamanda Zəngəzur dəhlizindən böyük xeyir götürəcəklər. Biz artıq beynəlxalq hüquqlara söykənən tələblərimizi irəli sürmüşük: Azərbaycan respublikasının delimitasiya məsələsi, ərazilərimizdən 10 minə yaxın revanşist qüvvələrin çıxarılması, Zəngəzur dəhlizinin açılması. Ermənilər bütün bunların qaçılmaz olduğunu bilirlər”.
Məhəmmədəli QƏRİBLİ
