“Düzdür, vətəndaşların bir hissəsi təxribatçıların fitnəsinə uyaraq ədəbsiz hərəkətlər ediblər, qanunsuz hərəkətlər ediblər və bu da dözülməzdir, qəbuledilməzdir. O təxribatçıların bəziləri Azərbaycanda, bəziləri xaricdə gizlənir. Azərbaycandakılar artıq müəyyən edildi və bir neçəsi məsuliyyətə cəlb olunmuşdur. Xaricdəkiləri də biz məsuliyyətə cəlb edəcəyik”.
Bu fikirləri Prezident İlham Əliyev 2023-cü ilin 6 ayının sosial-iqtisadi yekunlarına həsr olunmuş müşavirədə Gədəbəydə baş vermiş hadisələrdən danışarkən söyləyib.
Azərbaycanda xaos, özbaşınalıq, təxribat xarakterli addımların 1993-cü ildə başa çatdığını qeyd edən Prezident Əliyev deyib: “Əgər kimsə unudubsa, biz xatırlada bilərik. Ona görə vətəndaşlar da həm mədəniyyət göstərməlidirlər, necə deyərlər, mərifət göstərməlidirlər, qanuna tabe olmalıdırlar, polisə daş atmamalıdırlar, polisə daş atmaq heç kimə şərəf gətirən hərəkət deyil. Bu, birincisi. İkincisi, bu cinayətdir. Əgər Azərbaycan polisi dözümlülük göstərirsə, o demək deyil ki, kim istəyir polisə daş ata bilər. Bu qətiyyən mümkün deyil. Mən hər kəsə deyirəm, burada biz kiminsə nazı ilə oynayası deyilik, necə lazımdır, əgər lazım bilsək, kimi lazımdır elə cəzalandırarıq ki, peşman olar”.
Prezident çıxışında Gədəbəy hadisələri fonunda polisə tam dəstək verdi və polisə qarşı hərəkətləri birmənalı pislədi, polisi şantajçıların qarşısında tək qoymadı.
“Polisi qaralamaq istəyib ona ləkə yaxmağa çalışanların niyyətləri iflasa uğradı”
Məsələyə şərh verən “Polisə Dəstək” İctimai Birliyinin sədri Şəmsəddin Əliyev”Bakı-Xəbər”ə “Polisi qaralamaq istəyib ona ləkə yaxmağa çalışanların niyyətləri iflasa uğradı. Onlar Prezidentin mesajından ciddi nəticə çıxarmalıdır. Bir Azərbvaycan vətəndaşı olaraq doğrudan da məmnunluğumu ifadə edirəm, cənab Prezidentə minnətdarlığımı bildirirəm. Prezidentin bu fikirləri çox böyük etimad və etibar mesajı idi. Əslində belədir ki, dövlət, hakimiyyət orqanları və sağlam düşüncəli insanlar cinayətkarlıqla mübarizə aparan qurumun yanında olmasa insanlar cinayətkarlarla üz-üzə qalar və cinayətkarlıq geniş miqyas alar.
Bir neçə həftə əvvəl Gədəbəydə baş verən məlum olayla bağlı sosial şəbəkələrdə, hətta bəzi xəbər portallarında polislərin ünvanına söylənilən həqarətlər, aşağılayıcı ifadələr təbii ki, yerində olmadı, bu yolverilməz idi. Gədəbəydə baş verən olayların ilk günlərində polisə qarşı şantajçı ifadələr, fikirlər yayılanda şəhr vermişdim ki, bu hadisəni təşkil edənlərin bir oyunudur, onlar polisi ləkələmək istəyir. Təbii ki, baş verənlərə Azərbaycan polisi biganə qala bilməzdi, əgər laqeyd yanaşsaydı başqa hallar baş verərdi. Polisdə də bununla bağlı məlumat olduğu üçün məlumat əsasında lazımı şəkildə polis ora getdi. Bu belə də olmalı idi. Sahə müvəkkili ilə patrul xidməti ora getsəydi bəlkə də acı nəticələrin şahidi olardıq. Düşünürəm ki, ölkə Prezidentinin bu mesajından sonra vətəndaş cəmiyyəti də, bəzi KİV-lər də, ayrı-ayrı şəxslər də öz davranışlarını qəlibə salmalıdırlar. Qanuna tabe olmamaq halları arzuedilən məsələ deyil. Bütövlükdə polis orqanlarına dövlət tərəfindən verilən səlahiyyət spesifik səlahiyyətdir, o heç bir dövlət qurumuna verilmir. Bunu ola bilsin, cəmiyyətin həssas qrupu anlamasın, bilməsin, amma bu barədə cəmiyyətə hər hansı mesajın da verilməsi düzgün deyil. Düşünürəm ki, ölkə başçısının belə mükafat xarakterli yüksək etimada və etibara söykənən mejasları hər bir Azərbaycan vətəndaşı üçün görk olmalıdır”-deyə Ş.Əliyev qeyd etdi.
Ş.Əliyev əlavə etdi ki, ölkədə, cəmiyyətdə sabitlik, əminamanlıq, sabitliyin dayanıqlı olması polisin yuxusuz və narahat gecələrinin hesabınadır ki, bunu cəmiyyət də, ölkə vətəndaşları da, ölkəmizdə yaşayan xaricxi vətəndaşlar da, xarici diplomatik korpusların, səfirliklərin təmsilçiləri böyük məmnunluqla ifadə edir. O qeyd etdi ki, Azərbaycan polisinin fəaliyyəti bütün dünya üçün nümunədir.
Leyla QARAXANLI
