Tehran rejiminin əlində olan media resursları anti-Azərbaycan mövqeyindən çıxış etməkdən əl çəkmək istəmir. Xüsusən də bu ilin yanvar ayının 27-də İran polisinin gözləri qarşısında Azərbaycanın Tehrandakı səfirliyinə terror hücumu edən İran vətəndaşı Yasin Hüseynzadə ilə bağlı məsələni fərdiləşdirməkdə, şəxsiləşdirməkdə davam edirlər.
Molla rejimi çalışır ki, Y.Hüseynzadənin törətdiyi terror aktını “şəxsi məsələ” kimi qələmə verib ona cəza kəsməkdən canını qurtarsın. Bir zamanlar rejim rəsmiləri Y.Hüseynzadənin psixi xəstə olduğunu, ondan əvvəl onun bizim səfirliyə həyat yoldaşını “axtarmaq” məqsədilə daxil olduğunu iddia edirdi. İndi də tamamilə yeni iddia ortaya atıblar.
Belə ki, Telegramda yayılan məlumatlara görə, İranın "Vətən yolu" qəzeti “Tehrandakı Azərbaycan səfirliyinə hücum edən Yasin Hüseynzadənin arvadı Gülnar Əliyeva xüsusi xidmət orqanlarının əməkdaşıdır və basqının əsas təhrikçisi odur” iddiası ilə çıxış edib. Molla rejimi indi də dolayısı ilə Y.Hüseynzadənin həyat yoldaşını casusluqda suçlayır və onu “xüsusi xidmət orqanlarının əməkdaşı” kimi qələmə verməyə çalışır. Onu da vurğulayaq ki, indiyə qədər onlar gətirdikləri arqumentlərin heç bir əsaslı olmayıb və hər dəfə mollaların simasını, məqsədini bir az da ifşa edib. Mollalar öz aləmlərində guya səfirliyə hücumun “motivlərini üzə çıxarıblar”.
Qeyd edək ki, 27 yanvar 2023-cü ildə, yerli vaxt ilə səhər saat 08:00 radələrində Azərbaycan Respublikasının İran İslam Respublikasının paytaxtı Tehran şəhərində yerləşən səfirliyinə silahlı hücum olub. Hücum edən şəxs, İran vətəndaşı Yasin Hüseynzadə "Kalaşnikov" markalı avtomat silahla mühafizə postunu yararaq, səfirlik əməkdaşlara atəş açıb. Bu zaman səfirlik əməkdaşları onu zərərsizləşdirməyə cəhd göstərib. Basqın nəticəsində diplomatik nümayəndəliyin mühafizə xidmətinin rəhbəri Orxan Əsgərov həlak olub, iki mühafizəçi yaralanıb.
Yasin Hüseynzadə çox keçməmiş, İran hüquq-mühafizə orqanları tərəfindən saxlanıb. Hücum aktı ilə bağlı Azərbaycan Dövlət Təhlükəsizliyi Xidmətində cinayət işi başladılıb. Hadisəni törədən Hüseynzadə istintaqa cəlb olunub. Azərbaycan Prezidenti İlham Əliyev hücumu qınayıb, Azərbaycan tərəfi məsuliyyətin İranda olduğunu vurğulayıb və hücumu "terror aktı" kimi qiymətləndirib. Azərbaycan Xarici İşlər Nazirliyi hücumun Azərbaycanın İrandakı səfirliyinin əməkdaşlarının evakuasiya ediləcəyini açıqlayıb. 30 yanvarda Azərbaycan səfirliyin əməkdaşları Tehrandan evakuasiya edilmiş və səfirliyin fəaliyyətini dayandırılmışdır.
İran rəsmilərinin bəyanatlarında hücumun siyasi motivli olduğuna dair heç bir əlamət yoxdur. İran hüquq-mühafizə orqanları hücumun şəxsi zəmində törədildiyini, Hüseynzadənin əraziyə iki azyaşlı uşaqla gəldiyini iddia edib. Buna baxmayaraq, təhlükəsizlik kameralarının lentə aldığı görüntülərdə onun tək olduğu müşahidə edilir.
BMT Baş Katibi Antoniu Quterreş, Avropa İttifaqı, NATO, GUAM, 60-dan çox ölkənin dövlət başçısı, xarici işlər nazirləri və səfirləri hadisəni terror aktı kimi pisləyib.
“Bu əsassız iddia Tehran hakimiyyətindən qaynaqlanır”
Mollaların yeni uydurmasına şərh verən Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan “Bakı-Xəbər”ə şərhində “Bu yeni versiya deyil, bu İran hakimiyyətinin rəsmi mövqeyidir. Terror hadisəsi baş verən günün səhəri İranın xarici işlər naziri, bu ölkənin müxtəlif KİV-ləri bu versiyanı təbliğ etməyə başladılar. Hətta xaricdəki paniranist qüvvələr də, monarxistlər də, yəni Rza Pəhləvinin təmsil etdiyi siyasi mətbuat da bu versiyanı təbliğ etdi. Paniranist qüvvələr İran hakimiyyətinin mövqeyindən çıxış edir, Azərbaycanın Tehrandakı səfirliyinə hücumu terror aktı kimi qiymətləndirməkdən yan keçirlər”-deyə vurğuladı.
S.Soltan qeyd etdi ki, Azərbaycan dövlətinin irəli sürdüyü terror hücumu məsələsi Azərbaycanın rəsmi mövqeyidir, İran hakimiyyəti bu mövqe ilə hələ də razılaşmır. “Adını çəkdiyiniz “Vətən yolu” qəzetinin yazdıqları da İran hökumətinin istintaq başa çatmadan elan etdiyi mövqedir, bu mövqenin təbliğidir. Yəni bu əsassız iddia Tehran hakimiyyətindən qaynaqlanır və bu hakimiyyətin daxildə və xaricdə olan təbliğat ruporları da bu yalan xəbəri yayıb istintaq bitmədən ictimai rəy formalaşdırmağa cəhd göstərirlər”-deyə S.Soltan əlavə etdi.
Əli TURABOV
