Azərbaycanda terror aktı törətməyi planlaşdıran xarici ölkə vətəndaşı saxlanılıb.
Dövlət Təhlükəsizliyi Xidmətinin (DTX) məlumatına əsasən, Əfqanıstan İslam Respublikasının vətəndaşı, 1990-cı il təvəllüdlü Favzan Musa Xanın (Fawzan Mosa Khan) digər şəxslərlə qabaqcadan əlbir olaraq Azərbaycan Respublikası ərazisində ictimai sabitliyi pozmaq, əhali arasında vahimə yaratmaq, dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə partlayış, yanğın və ya digər bu kimi hadisələrlə müşayiət olunacaq, insanların həlak olması, onların sağlamlığına zərər yetirilməsi, əhəmiyyətli əmlak ziyanının vurulması və başqa ictimai təhlükəli halların baş verməsi ilə nəticələnəcək terror aktı törətməyi planlaşdırması müəyyən edilib.
Məlum olub ki, adıçəkilən əcnəbi qeyd olunan cinayət əməllərini törətmək niyyəti ilə xarici ölkədən Azərbaycan Respublikasına gəlib, Bakı şəhərində yaşadığı müddətdə üçüncü dövlətin ölkəmizdəki Səfirliyinin yerləşdiyi ərazinin koordinatlarını müəyyənləşdirmək və terror aktını planlaşdırmaq məqsədilə səfirliyin binasının ətrafında müşahidə aparıb, terror aktında iştirak edə biləcək şəxslərin müəyyən edilərək bu fəaliyyətə cəlb olunması, odlu silah və partlayıcı maddələrin əldə edilməsi, bu məqsədlərlə maliyyə dəstəyinin alınması üçün digər şəxslərlə əlaqəyə girərək sövdələşib.
Faktla bağlı Favzan Musa Xan DTX-nin İstintaq baş idarəsində Azərbaycan Respublikası Cinayət Məcəlləsinin 28, 214.2.1 və 28, 214.2.3-cü (qabaqcadan əlbir olan bir qrup şəxs halında odlu silah və silah qismində istifadə olunan predmetlərdən istifadə etməklə terrorçuluq hərəkətlərinin törədilməsinə hazırlıq) maddələri ilə başlanmış cinayət işi üzrə cinayət başında saxlanılaraq təqsirləndirilən şəxs qismində məsuliyyətə cəlb olunub və barəsində məhkəmənin qərarı ilə həbs qətimkan tədbiri seçilib.
Maraqlıdır, bu əməlin arxasında hansı ölkə dayanır və hədəf olaraq hansı ölkə seçilib?
Təhlükəsizlik qurumlarının sabiq əməkdaşı Elşən Həsənov “Bakı-Xəbər”ə açıqlamasında bildirdi ki, bu məsələdə proqnoz vermək doğru olmazdı: “Bəli, DTX yuxarıda qeyd etdiyiniz məzmunda rəsmi bəyanatla çıxış edərək, Əfaqanıstan vətəndaşının adı çəkilməyən ölkənin səfirliyinə qarşı terror aktı törətmək məqsədilə Azərbaycana gəlişi ilə əlaqədar məlumat yayıb. Gəlin nəzərə alaq ki, bu məzmunlu bəyanat, heç də yayılmış ilk Bəyanat deyil. Keçən onilliklər ərində ölkəmizin ərazisində yerləşən istər səfirliklərə, istər beynəlxalq təşkilatlara qarşı, istərsə də Bakıda keçirilən müxtəlif səpgili tədbirlər zamanı təxribat və terrora cəhd hallarının şahidi olmuşuq və bütün hallarda bu cəhdlərin qarşısı önləyici tədbirlərlə zamanında alınaraq bu və ya digər şəkildə ictimaiyyətin diqqətinə çatdırılıb.
Bu məsələdə terror məqsədilə ölkəmizə göndərilən şəxsin vətəndaşlıq mənsubiyyəti önəmli rol oynamır. Yəni indiki halda terrorçunun Əfqanıstan vətəndaşı olması bu əmələ məhz Azərbaycan – Əfqanıstan münasibətləri kontekstindən baxmaq kimi yanlış fikir yaratmamalıdır. Sadəcə, Əfqanıstan vətəndaşının üçüncü ölkə tərəfindən əməkdaşlığa cəlb edilərək təlimatlandırılması və ölkəmizin ərazisinə məlum məqsədlə göndərilməsi istiqamətində də versiyalar üzərində düşünmək lazımdır.
Aktın törədilməsində hansı kənar qüvvələrin marağı ola bilər kimi suala cavab vermək, daha doğrusu, proqnoz vermək indiki halda doğru olmazdı. Qarşıda istintaq tədbirləri adlı prosedura var ki, həqiqət də yəqin o zaman üzə çıxarılacaq. Ölkəmizə qarşı çoxvektorlu basqıların olduğunu nəzərə alsaq, bu əməlin məhz hansı ölkə və yaxud qüvvə tərəfindən sifariş ehtimalını da qətiyyətlə söyləmək çətindir.
İndiki halda terror aktına qərar verilməsi, ilk növbədə psixoloji basqı amili ilə bağlıdır. Həmçinin, əməl baş tutacağı təqdirdə baş verənlər dövlətin və onun təhlükəsizlik orqanlarının imicinə zərbə vurmuş olardı ki, əlbəttə bu da xoşagələn hal deyil.
Bakıda törədilməsi nəzərdə tutulan terror aktının qarşısının vaxtında alınması Azərbaycan təhlükəsizlik qüvvələrinin fədakar əməyinin məhsuludur ki, buna görə biz onlara təşəkkür edirik. Hədəf kimi seçilən ölkənin adı rəsmi bəyanatda açıqlanmırsa, biz də təxminlərə əsaslanıb ad çəkib, istintaqın gedişinə mane olmayaq”.
Məhəmmədəli QƏRİBLİ
