Xudafərin körpüsü fars-molla rejimi üçün qorxulu yuxuya çevrilib. Bu səbəbdən də Xudafərinə kim yaxın gedirsə ona qarşı cinayət işi açılır. Rejim soydaşlarımızı Xudafərinə yaxın qoymaq istəmir.
MOUZE Teleqram kanalı məlumat yayıb ki, Xudafərin körpüsünü (Həsrət körpüsü) ziyarət edən soydaşlarımız həbs edilib.
Güney Azərbaycan Milli Azadlıq Hərəkatının 6 fəalı üzvü molla rejimi tərəfindən həbs olunub.
Onlar Mustafa Avadpur, Rəhim Sasani, Məhəmməd Mərdi, Cəfər Nuri, Sədullah Sasani, Məhəmməd Əlipurdur.
Milli fəallar Xudafərin şəhərindən Həsrət körpüsünə səfər edərkən saxlanılıblar.
Faktiki olaraq İran rejimi Xudafərindən də, onu ziyarət edən cənublulardan da qorxur.
Molla rejimi azərbaycanlıların Xudafərinə yaxınlaşmasından niyə əndişəyə düşür?
Ekspertlər vurğulayır ki, molla rejimi eyni mənfur qaydanı 44 günlük Vətən müharibəsi dövründə də tətbiq etmişdi, məqsədi soydaşlarımızın Şimali Azərbaycana dəstəyinin qarşısını almaq idi.
Ekspertlər deyir ki, soydaşlarımızın Xudafərini ziyarət etməsi rəmzi məna daşıyır və bu bütöv Azərbaycan ideyasına xidmət edir.
"Mollalar soydaşlarımızı məqsədli şəkildə Araz qırağına, Xudafərinə yaxın buraxmırlar"
BAO sədrinin müavini Babək Türkoğlu "Bakı-Xəbər"ə şərhində "Hazırda "Həsrət körpüsü" artıq Azərbaycanın Güneyindəki insanlarımız üçün bir təsəlli yeridir, ürəyi sıxılan, narahatlıq keçirən ora gedir. Sinəsi dolu olan şair, ozan, milli fəal ora üz tutur ki, xalqının harayını Xudafərinə çatdırsın. Xudafərin artıq "Həsrət körpüsü"ndən vüsal körpüsünə çevrilib, molla rejimini də bizim qovuşmağımız qorxudur. Xudafərin xalqımızın birlik rəmzinə çevrilib. 44 günlük Vətən müharibəsində bütöv Azərbaycan sevdalıları olan soydaşlarımız Xudafərinin kənarına gəlib Azərbaycan Ordusuna dəstək olur, bununla da birliyimizi nümayiş etdirdilər.
Tarixən qardaşı bacıya, qohumu qohuma, Güneyi Quzeyə birləşdirən körpü bu gün də yenə birləşdiricilik missiyasını daşıyır. Həsrətliləri bir-birinə qovuşdurur.
Bu körpü birləşdiricilik missiyasını daşıdığı üçün molla rejimi çox narahatdır. Azərbaycan torpaqları işğal altında olanda insanlarımız o tayda körpünün ətrafına toplaşıb bu tərəfə baxıb ağlayırdılar, ürəklərində həsrət, yanğı ilə geri evlərinə dönürdülər. Yəni soydaşlarımız hər zaman Xudafərinin kənarına gəlirdilər ordan talan olan ellərimizə baxıb xiffət çəkirdilər. Bu isə o ərazilər artıq işğaldan azad olunub, bu da soydaşlarımızın qəlbini inamla, ümidlə doldurur. Onlar bu gün o körpüdən sevinc, qürur hissi ilə boylanırlar. Bu da mollaları narahat edir. Farsların tarixindən də qədim olan körpümüzün qırağına insanlarımız gedəndə geriyə qürurla, fəxrlə, inamla dönürlər"-deyə bildirdi.
B.Türkoğlu qeyd edir ki, Xudafərini ziyarət edib qayıdan soydaşlarımızın mübarizə əzmi daha da güclənir. B.Türkoğlunun sözlərinə görə, onlar özlərini zəfər çalmış bir xalqın, bir dövlətin, bir ordunun mənsubu kimi qürurlu sayırlar. "Soydaşlarımız indi daha mətin dayanırlar. Bu da rejimi qorxudur.
Mollalar soydaşlarımızı məqsədli şəkildə Araz qırağına, Xudafərinə yaxın buraxmırlar. Ona görə də rejim sərhəd qoşunlarına xüsusi əmr verib ki, azərbaycanlıları ora buraxmasın, gedənlər də ağır cəzalandırılsın:" Bir aşıq Xudafərinə gedib sazını sinəsinə basıb bu taya baxıb yanıqlı havalar oxuyursa, onun oxuduqları da tez bir zamanda camaat arasında yayılır, bu da insanlara inanılmaz dərəcədə müsbət təsir göstərir, onların mübarizə əzmini gücləndirir. Yaxud milli fəallar gəlib ordan Azərbaycanın qüzeyinə bir mesaj göndərdiyi zaman istər-istəməz fars rejimi bundan narahat olur, taxtının silkələndiyini dərindən hiss edir".
Leyla QARAXANLI
