Ermənistan bir sıra ölkələrlə hərbi əməkdaşlığını rəsmiləşdirir. Kipr Respublikasında Ermənistan-Yunanıstan-Kipr üçtərəfli müdafiə məsləhətləşmələri keçirilib. Erməni tərəfdən məsləhətləşmələrdə Ermənistan Müdafiə Nazirliyinin Müdafiə siyasəti və beynəlxalq əməkdaşlıq idarəsinin rəisi Levon Ayvazyanın başçılıq etdiyi nümayəndə heyəti iştirak edib.
Məsləhətləşmələr zamanı bir sıra təhlükəsizlik məsələləri və üç ölkənin maraqları çərçivəsində əməkdaşlıq məsələləri müzakirə olunub. Tərəflər üç ölkənin müdafiə qabiliyyətinin və hərbi təhlükəsizliyinin gücləndirilməsi üçün birgə addımlar atmağa hazır olduqlarını təsdiqləyiblər. Müzakirələr nəticəsində Ermənistan, Yunanıstan və Kiprdə bir sıra tədbirləri özündə əks etdirən üçtərəfli hərbi əməkdaşlığın illik proqramı imzalanıb.
Guya Ermənistan öz aləmində Azərbaycan-Türkiyə ittifaqına qarşı bir blok yaradır. O baxımdan bunun perspektivsizliyi nədədir?
Sözügedən məsələni “Bakı-Xəbər”ə şərh edən siyasi şərhçi Azər Həsrət hesab edir ki, Ermənistan dövlət olaraq öz seçimində sərbəst olsa da, Yunanıstanın bu üçlükdə yer alması anlaşılan deyil: “Çünki Avropanın enerji təchizatı məsələlərində Azərbaycan Yunanıstanla çox yaxından əməkdaşlıq edir. O üzdən, bu məsələlərə görə Yunanıstan Azərbaycanı buraxıb Ermənistanla tərəfdaşlıq etməməlidir. Düşünürəm ki, Azərbaycan dövləti hər halda Yunanıstanın müvafiq qurumlarına bununla bağlı öz fikirini çatdıracaq. Ümumilikdə isə götürəndə bu üçlünün bir araya gəlməsi hərbi baxımdan heçnəyi dəyişə bilməyəcək. Bu, sıfır üstəgəl sıfır bərabərdir sıfırdan başqa bir şey deyil. Yəni, Azərbaycan-Türkiyə ittifaqının qarşısında Ermənistan-Yunanıstan-Yunan Kipr birliyi heçnədir. Bu, bizi narahat etmir və qorxutmur. Ona görə ki, onların potensialı, Azərbaycan-Türkiyə potensialı ilə müqayisə edilməyəcək dərəcədə aşağıdır. Söhbət hərbi potensialdan gedirsə, bu üçlünün potensialı sadəcə Türkiyədən qat-qat aşağıdır. Ermənistanın özünün potensialı Azərbaycanla müqayisədə qat-qat aşağıdır. Ona görə də Ermənistan-Yunanıstan-Kiprin hərbi müstəvidə əməkdaşlığı bizim üçün hansısa təhlükə yarada bilməz. Sadəcə, Yunanıstanın buna getməsi təəssüf doğurur. Həmçinin müəyyən suallar yaradır. Azərbaycan Yunanıstanın qazla təmin olunmasına töhvə verir, rəsmi Afina isə Ermənistanla hərbi əməkdaşlığa gedir. Onu da qeyd edim ki, hardasa 24 il əvvəl Yunanıstanın Ermənistanla hərbi sahədə bir yaxınlaşması olub. Ancaq sonradan anlayanda ki, bu bir NATO ölkəsidir və Ermənistan Rusiyanın orbitindədir, Yunanıstan bunun səhv olduğunu anlayıb geri çəkilib. İndinin özündə də Yunanıstanın bir NATO ölkəsi olaraq Ermənistanla hərbi sahədə iş birliyinə getməsi yanlış addımdır. Hər halda bunu anlayacaqlar”.
Vidadi ORDAHALLI
