Ötənilki Frankofoniya sammitində Azərbaycana verdiyi dəstəyə görə mən cənab Prezidentə və Albaniya hökumətinə artıq öz minnətdarlığımı bildirdim. O vaxt Frankofoniya Təşkilatının üzv dövlətlərindən biri yekun sənədə bir bəndi əlavə etmək və qəbul etdirməyə cəhd göstərdi. Bu, anti-Azərbaycan mahiyyəti olan bənd idi. Məhz Albaniya həmin bəndin qarşısını alan ölkə oldu.
Bu fikirləri Prezident İlham Əliyev Albaniya Prezidenti Bayram Beqayla mətbuata bəyanatında deyib.
Həmin addım dostluğun, eləcə də ölkələrin ərazi bütövlüyü və suverenliyi kimi beynəlxalq hüququn əsas prinsiplərinə qəti sadiqliyin təzahürü olduğunu vurğulayan dövlətimizin başçısı deyib: “Hətta Azərbaycan özünü müdafiə etmək fürsətinə malik olmadığı təşkilatlarda belə bizim Albaniya kimi qardaş ölkəmiz var və o, bu dəstəyi verdi. Buna görə, biz çox minnətdarıq”.
Məlum olur ki, Frankafoniya Sammitində Azərbaycana qarşı sənədi məhz Albaniya bloklayıb.
Məsələ ilə bağlı baki-xeber.com-a açıqlama verən politoloq Tural İsmayılovun fikrincə, sözügedən tədbirdə Albaniyanın sərgilədiyi mövqe Azərbaycanın siyasi uğuru idi: “Həqiqətən də Albaniya Frankafoniya Sammitində Azərbaycana əleyhinə qurulan çirkin planların qarşısının alınmasında vacib və həlledici rol oynadı. Fransanın Azərbaycana qarşı məkirli siyasi planının qarşısı alındı. Çünki sözügedən tədbirdə Azərbaycana qarşı hər hansı bir qərar qəbul olunsaydı, bu, ölkəmizin beynəlxalq imicinə zərər vurardı. Məhz Azərbaycan-Albaniya münasibətlərinin yüksək səviyyədə olmasınən ən böyük səbəblərindən biri həm də bu ölkə rəhbərliyi ilə ölkəmizin Prezidenti arasında şəxsi dostluq əlaqələrinin daim inkişaf etməsidir. Həm Albaniyanın Baş naziri Edi Rama, həm bu ölkənin prezidenti Bayram Beqay hər zaman Azərbaycana yüksək münasibətləri ilə seçilən dövlət xadimləri olublar. Təbii ki, iki ölkə arasında münasibətlərin ruhu əlaqələrin inkişafına təkan verir. Bu, Azərbaycanla Mərkəzi və Cənubi Avropa ölkələri arasında əlaqələrin inkişafına təkan verir. Azərbaycanın Avropa üçün önəmini artırır. Bu gün Azərbaycanın Mərkəzi və Cənubi Avropa ölkələri ilə əlaqələrini genişləndirməsi, eyni zamanda bu coğrafiya ilə ölkəmiz arasında dərin bağların daha da sıxlaşması Azərbaycanın strateji uğurlarından biridir. Nəzərə almaq lazımdır ki, Albaniya mövqeləri güclü olan bir dövlətdir. Üstəlik, Albaniya ilə türk dünyası arasında tarixi və mənəvi bağlar var. Bu baxımdan Azərbaycan-Albaniya münasibətlərinin böyük perspektivləri və imkanları mövcuddur. Əminəm ki, iki ölkə arasında olan əlaqələr bundan sonra daha da inkişaf edəcək. Hər iki ölkənin mövcud potensialından səmərəli istifadə ediləcək”.
Vidadi ORDAHALLI
