Tanınmamış "Dağlıq Qarabağ”ın “prezidenti” Araik Arutyunyan Rusiyanın vasitəçiliyi üzərinə götürəcəyi təqdirdə Azərbaycanla dialoqa başlaya biləcəyini deyib.
Bu barədə Ermənistan mətbuatı məlumat yayıb.
Arutyunyan bildirib ki, onlar öz konstruktiv mövqeyinə sadiq qalır və sivil dialoq vasitəsilə bütün problemləri sülh yolu ilə müzakirə edib həll etməyə hazırdırlar. Arutunyan “parlament”də deputatlarla görüşdə də demişdi ki, Bakı bizimlə yalnız bir mövzunu – inteqrasiyanı müzakirə edir, buna görə də onlar danışıqlardan imtina edir.
Erməni mediası yazır ki, Arayik Arutyunyanın Putinə məktubu nəzərə alınsa, ola bilsin ki, Bakı ilə danışıqlar Rusiyanın vasitəçiliyi ilə aparılacaq.
Rusiya Xarici İşlər Nazirliyi iyulun 6-da A.Arutyunyanın Vladimir Putinə məktubuna cavab verib.
Nazirliyin sözçüsü Mariya Zaxarova məktubla tanış olmadığını deyib: "Mən bu bəyanatlarla tanış deyiləm. Həmçinin dediyiniz şəxsin vəzifələri ilə də tanış deyiləm. Ona görə də bunları hətta şərh etməyəcəyəm”.
Bununla həm də Ermənistanın Qarabağla bağlı müzakirələri beynəlxalq formata keçirmək cəhdinin başqa yolla gündəmə gətirilməsidir. Ancaq Azərbaycanın mövqeyi belədir ki, bu, birmənalı olaraq ölkənin daxili işidir və heç bir kənar dövlət prosesə qarışa bilməz.
Politoloq Elşən Mustafayev “Bakı-Xəbər”ə açıqlamasında bildirdi ki, sülh sazişi üzrə danışıqlar prosesində Ermənistanın Azərbaycanın Qarabağ bölgəsində yaşayan erməni sakinlərin hüquq və təhlükəsizliyi üzrə beynəlxalq mexanizm yaradılması təşəbbüsü, bu barədə müddəanın Azərbaycanla Ermənistan arasında ikitərəfli sülh sazişi layihəsinə daxil edilməsi səyləri tamamilə əsassızdır və belə cəhdlərin heç bir nəticəsi olmayacaq: “Bu fakt bir daha sübut edir ki, Ermənistan Azərbaycana qarşı ərazi iddialarından hələ də əl çəkməyib. Bir daha xatırlatmaq istərdik ki, Qarabağ Azərbaycanın ayrılmaz tərkib hissəsidir və bu bölgədə yaşayan erməni əsilli əhalinin hüquqları və təhlükəsizliyi Azərbaycan Respublikası Konstitusiyasına uyğun olaraq təmin ediləcək. Ermənistanın və istənilən bir dövlətin Azərbaycanın daxili məsələsi olan erməni sakinlərin reinteqrasiya prosesinə müdaxilə etməsi qəbuledilməzdir. Azərbaycanın bu məsələdə mövqeyi qətidir ki, Qarabağdakı erməni icması Azərbaycan Konstitusiyasına uyğun olaraq bizim vətəndaşlarımız hesab ediləcək və ölkə sakinləri ilə eyni hüquqa malik olacaq. Amma onlara xüsusi imtiyaz və status versək, bu, ermənilərin separatçılıq meyllərinin artmasına gətirib çıxaracaq. Ümumiyyətlə Azərbaycan yalnız Konstitusiya çərçivəsində onların hüquq və azadlıqlarının tanınacağını bəyan edir. Bu, erməniləri qane etmədiyi üçün müxtəlif bəhanələrə əl atırlar. İndi də Moskvanı vasitəçi kimi bu prosesə soxmaq istəyi belə uğursuz cəhdlərdən biridir”.
Məhəmmədəli QƏRİBLİ
