Sirr deyil ki, müsəlmanlara qarşı yönəlmiş ikili siyasət dünyada bir sıra ölkələrin əsas prinsiplərinə çevrilib. İslam peyğəmbərinin karikaturalarının çəkilməsi, müsəlmanlara qarşı təzyiqlər həmin ölkələrdə yeni vüsət alır. Məsələn, elə Fransaya nəzər salmaqla bunun konkret nümunələrini görmək olar.
Baş verənlər, artan islamofobiya və ksenofobiya halları bir müsəlman ölkəsi kimi Azərbaycanda da ciddi narahatlıq yaradır. Bakı Konqres Mərkəzində Qoşulmama Hərəkatının Əlaqələndirmə Bürosunun “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda nazirlər görüşündə bu məsələyə xüsusi diqqət olunması təsadüfi deyil. Xatırladaq ki, həmin tədbirdə çıxışı zamanı prezident İlham Əliyev bu məsələyə xüsusi toxunub: “Fikrimizcə, mədəniyyətlərarası və dinlərarası dialoqun təşviqi bizim gündəliyimizdə öndə duran məsələlər olmalıdır. Biz geniş vüsət alan islamofobiya və ksenofobiya hallarından, həmçinin İslamın zorakılıq və terrorla eyniləşdirilməsi cəhdlərindən narahatıq. Danimarkada, Niderlandda, İsveçdə müqəddəs Quranın yandırılması, təhqir olunması və buna ifadə azadlığı adı altında bəraət qazandırılması tamamilə məsuliyyətsizlikdir, qəbulolunmazdır və pislənilməlidir”. Türkiyənin xarici işlər naziri Hakan Fidan isə qeyd edir ki, Avropada islamofobiya sanki epidemiyaya çevrilib: "Müsəlmanlara, Afrika və Asiya əsilli vətəndaşlara, yəhudi və mühacirlərə qarşı kin və nifrət müasir dünyada çox yüksək həddə çatıb. Xüsusilə Avropada islamofobiya epidemiya halını alıb. Milyardlarla insanın müqəddəs kitabı olan Quranı-Kərimi yandırmaq, ifadə azadlığı adı altında bu hərəkətə icazə vermək milyardlarla insana qarşı açıq-aşkar təhqirdir". Xatırladaq ki, bu günlərdə İsveçdə Qurban bayramının ilk günü polis əməkdaşlarının qoruması altında Quranın yandırıldığı təxribat xarakterli aksiya həyata keçirilib. Halbuki, müsəlman ölkələrində, məsələn, elə Azərbaycanda xristianlar daim sülh içində yaşayıblar. Bu həm də İslam dininin mahiyyətindən irəli gəlir. Amma bu gün bir çox Qərb ölkəsində, xüsusilə Fransada müsəlmanlara qarşı qəddar siyasət həyata keçirilir. Ümumiyyətlə, tarixən fransızlar hər zaman müsəlmanlarla bu cür qeyri-insani rəftar ediblər. Misirdə, Əlcəzairdə edilən hərəkətlər buna sübutdur.
Araşdırmalar onu da üzə çıxarır ki, Fransada islamofobiya təkcə müsəlmanlara nifrət və ayrıseçkiliklə məhdudlaşmır, həm də yerli müsəlmanların gündəlik həyatına təsir göstərir. Fransada bir çox müsəlman məşğulluq və əməkhaqqı məsələsində ayrıseçkilik və ədalətsiz rəftarla üzləşir ki, bunlar da getdikcə daha çox yayılır. Xüsusilə müsəlman qadınlar hicabları və dini baxışlarına görə təhsil və iş sahəsində çətinliklərlə üzləşirlər. Bəzən bir sıra ölkələrdə demokratiyanın gücləndirilməsi adı altında qəbul edilən yeni qanunlar dini etiqad azadlığını ciddi şəkildə pozur. O da faktdır ki, əksər dövlətlər müsəlman ölkələrinin inkişafını və müsəlmanların güclü olmasını istəmir. Yenə burada Fransanı nümunə kimi göstərmək olar. Fransa son 10 il ərzində klassik irqçilikdən qanuni irqçiliyə gəlib çıxıb. Bu ölkədə Fransa Respublikası dəyərlərinə xas olmayan proseslər qeydə alınır. Bu hal Emmanuel Makron hakimiyyətinin siyasətinin konkret təzahürlərindən biridir. Emmanuel Makronun hakimiyyəti dövründə bu ölkədə islamofobiya daha da artıb. Müsəlmanlar polislər tərəfindən təqib edilir. Bu, Avropa dəyərlərinin və prinsiplərinin kobud şəkildə pozulmasıdır. Fransa bu gün, sözün həqiqi mənasında, dini müstəmləkə siyasətinin mərkəzi kimi çıxış edir. Fransanın milli azlıqlara qarşı əsas prinsipləri pozması, bu yöndə cinayətlərin törədilməsi geniş vüsət alıb. Makron hakimiyyəti müxtəlif adlar altında qanunlar qəbul edilməsinə nail olaraq, əslində islamofobiyanı təşviq edir. Məsələn, 2021-ci il 21 avqust tarixində qəbul olunan “Respublika prinsiplərinə hörmətin möhkəmləndirilməsi haqqında” Qanun açıq şəkildə müsəlman əhaliyə qarşı etimadsızlıq mühiti yaradılmasını təşviq edir. Onu da qeyd edək ki, Fransa əhalisinin 9 faizini müsəlmanlar təşkil etsə də, onların tamhüquqlu vətəndaş kimi cəmiyyətə inteqrasiya olunmasına, dini inanclarını həyata keçirmələrinə maneçilik üçün ən müxtəlif addımlar atılır. İslam dininə qarşı təhqirlər, etirazlar adi hala çevrilib. Anti-İslam əhval-ruhiyyəsi məqsədli şəkildə alovlandırılır və bunun üçün medianın gücündən istifadə edilir. Bu xüsusda “Charlie Hebdo” jurnalı hələ də ön plandadır. Bu fransız nəşrində dünya müsəlmanlarının hisslərinin təhqir olunması adi haldır. Müsəlmanlara qarşı ayrıseçkiliyi qanuniləşdirən Fransada demokratiya, insan hüquqları, ədalət, bərabərlik kimi dəyərlər aşınmaya məruz qalıb. Etnik, dini və digər azlıqların ölkə cəmiyyətinə inteqrasiyasına mane olaraq, onlara qarşı sistemli və davamlı ayrıseçkilik siyasəti həyata keçirən Fransa, ekspertlərin fikrincə, Avropada islamofobiyanın mərkəzinə çevrilib. O üzdən istər Fransada, istərsə də digər Avropa ölkələrində bu kimi hallara qarşı mübarizənin genişləndirilməsi artıq zərurət kimi çıxış edir.
Samirə SƏFƏROVA
