Rusiya Xarici İşlər Nazirliyinin sözçüsü Mariya Zaxarova az qala Bakı ilə ultimatum dilində danışmağa cəhd edib:
“Moskva Bakını Laçın yolunu “açmağa” və “azad hərəkəti bərpa etməyə” çağırır. Rusiya atəşkəs rejiminin pozulması hallarının artması və Laçın dəhlizinin blokadaya alınmasından son dərəcə narahatdır… Bu, üçtərəfli razılaşmalara ziddir. Rusiya sülhməramlıları vəziyyətə yerdəki proseslərə uyğun olaraq və üçtərəfli bəyanatlar çərçivəsində cavab verəcəklər”.
Mariya Zaxarovanın bu ritorikasını necə dəyərləndirmək olar?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, sərhədin açılması ilə bağlı yalnız Azərbaycan qərar verə bilər: “Azərbaycan ərazisində heç vaxt dəhliz ola bilməz. Azərbaycan sərhədində yalnız keçid məntəqəsi ola bilər. Bu keçid məntəqəsinin hansı formada fəaliyyət göstərəcəyini isə yalnız Azərbaycanın gömrük və sərhəd xidmətləri haqqında qanunları müəyyən edə bilər. Rusiyanın təhdidləri davam edəcək. Son günlər Rusiyanın Azərbayacana qarşı təzyiqlərinin artdığı müşahidə olunur. Belə ki, Moskva ultimativ tonda Azərbaycandan Laçın yolunun açılmasını tələb edir, atəşkəsin pozulması hallarına Rusiya sülhməramlılarının reaksiya verəcəyi ilə hədələyir. Azərbaycanın beynəlxalq aləmdə kifayət qədər müttəfiqləri var. Biz həm öz gücümüz, həm də xarici dövlətlərin dəstəyi ilə bu təzyiqlərin qarşısını almalıyıq. Qarşıda bizi Rusiya ilə gərginlik gözləyir. Qərb ölkələrinin Ermənistan- Azərbaycan münasibətlərində vasitəçilik missiyası, danışıqların ABŞ və Belçikada aparılması Rusiyanı ciddi narahat edir. Ona görə də belə sərt ritorikanı seçir”.
Ekspertin sözlərinə görə, Zaxarova orada başqa bir mühüm açıqlama da verib:
“Erməni jurnalistin Qarabağdakı silahlı erməni quldur dəstələrinin başçısı Araik Arutunyanı “Arsaxın prezidenti” kimi təqdim edərək, bir neçə gün əvvəl onun adından yayılmış bəyanatda Laçın yolunun marşrutunun vaxtından əvvəl dəyişdirilməsinin Rusiyanın təklifi ilə baş verdiyi, Rusiyanın bu baş verməyəcəyi təqdirdə Azərbaycanın hərbi əməliyyatlara başlayacağı ilə bağlı çağırış etməsinə erməniləri pis vəziyyətə salan cavab verib:”Mən bu bəyanatlarla tanış deyiləm. Sizin dediyiniz vəzifələrlə də tanış deyiləm. Ona görə də, bunları şərh etməyəcəm”. Bununla da silahlı erməni quldur dəstələrinin başçısı Araik Arutunyanı və onun qondarma “prezident vəzifəsini” tanımadığını bəyan etmiş olub. Bu bir daha təsdiqləyir ki, Qarabağda hegemonluq etmək niyyəti ermənilətə görə deyil. Rusiya özü orada nəzarəti tam ələ almaq istəyir. Bununla da Azərbaycanın Qarabağda güclənməsini istəmir”.
Məhəmmədəli QƏRİBLİ
