Sloveniyanın Aİ-yə göndərdiyi təhlükəli sənəd mətbuata sızdı – Bosniyanı parçalayıb xəritədən siləcəklər…

img

Sloveniyanın Baş naziri Yanez Yanşanın Avropa İttifaqı Şurasına Bosniya və Herseqovinanın parçalanmasını özündə əks etdirən sənəd göndərdiyi ortaya çıxıb.

Baki-xeber.com xarici mediaya istinadən xəbər verir ki, beş ölkənin sərhədlərinin yenidən çəkildiyi qalmaqallı sənəddə Bosniya və Herseqovinanın bir hissəsinin Serbiya və Xorvatiyaya verildiyi əks olunub.

Avropa İttifaqına sədrliyi üzərinə götürməyə hazırlaşan Sloveniyanın Baş naziri Qərbi Balkanlarda guya sabitliyi təmin etməyi nəzərdə tutan, əslində isə Bosniya və Herseqovinanın ərazi bütövlüyünü məhv etməyi hədəfləyən sənədi Avropa İttifaqı Şurasının prezidenti Şarl Mişelə göndərib.

“Reuters” agentliyi yazır ki, Y.Yanşa tərəfindən təqdim olunan, Qərbi Balkanlardakı etnik ayrılıqları aradan qaldırmaq üçün 5 ölkənin sərhədlərinin yenidən çəkilməsini nəzərdə tutan qeyri-rəsmi diplomatik sənəd, Bosniya və Herseqovinanın sərt reaksiyasına səbəb oldu. Y.Yanşa sənədi təkzib etsə də, həm Sloveniya mətbuatı, həm də Aİ diplomatları qalmaqallı xəritənin varlığını təsdiqləyiblər.

Sənəddə Bosniya və Herseqovinanın parçalanması, ölkə iki entitetindən biri olan Serb Republikasının Serbiyaya birləşdirilməsi, xorvatların çoxluq təşkil etdiyi kantonların Xorvatiyaya verilməsi və Kosovanın Albaniya ilə birləşməsi maddələri yer alır.

Balkan ölkələrinin Aİ-yə inteqrasiyasının etnik problemlər həll olunmadan çox çətin olacağı vurğulanan və ingilis dilində "Qərbi Balkanlar-Daha irəli" başlığı ilə hazırlanan sənəddə, bunların Böyük Serbiya, Böyük Xorvatiya və Böyük Albaniya ilə mümkün olacağı qeyd edilir.

Bosniya və Herseqovinanın Aİ üzvlüyündən çıxarılmasının vacib olduğu deyilən sənəddə, Türkiyənin bölgədəki boşluqdan faydalandığı iddia edilir, xüsusən Bosniya və Herseqovina və Şimali Makedoniyada daha çox təsir gücünə malik olduğu maddəsi yer alır.

Bosniya və Herseqovinanın xarici işlər naziri Bisera Turkoviç, "Pandoranın qutusunun açılması və Qərbi Balkanlarda sabitliyin pozulmasının istəndiyi açıqdır” deyib. Bosniya və Herseqovina Prezident Şurasının xorvat üzvü Zeljko Komsic isə sənədi “faciə” adlandıraraq “Sənəddə gördüyüm qədər Bosniya və Herseqovina adlı bir ölkə qalmır. Bunlar müharibədən əvvəl və hətta müharibə dövründə bizə təqdim olunan maddələrdir. Bütün bunların arxasında İslam əleyhdarları var" deyib.

Son xəbərlər