Azər Həsrət: “Aidiyyəti dövlət qurumları bu prosesləri nəzarətdə saxlamaqla kifayətlənməməli, ona qarşı dərhal tədbir görməlidirlər”
Torpaqlarımızın artıq bir neçə aydır işğaldan azad edilməsinə baxmayaraq, hələ də “Google maps”da azad olunan ərazilərin adları erməni dilində göstərilməkdə davam edir.
Baxmayaraq ki, Azərbaycan tərəfindən torpaqlar azad edildikdən sonra bütün beynəlxalq təşkilatlara məlumat göndərilib, bəzi elektron resurslarda, xəritələrdə ermənilərin əli ilə baş verən təxribatlar artıq aradan qaldırılıb, amma “Google maps” isə hələ də xəritələrdəki adları əsassız olaraq erməni dilində təqdim edir.
Ümumiyyətlə, biz hansı addımları atmalıyıq ki, bu təsisat qanunsuz təqdimatlarına son qoysun? Bunun üçün aidiyyəti dövlət qurumlarının üzərinə hansı vəzifələr düşür?
- “Bu cür yanlışlıqlara yol verilməməsi üçün “Google maps”la davamlı işləmək lazımdır”
Siyasi şərhçi Azər Həsrət baki-xeber.com-a bildirdi ki, “Google maps” və digər bənzər təsisatlar, bir qayda olaraq, dünyada mövcud olan ölkələrə, xalqlara qərəzsiz yanaşmağa çalışırlar, onların siyasəti heç bir siyasətə qarışmamağa yönəlib. “Yəni dövlətlərarası münasibətlər məsələsində neytrallığı qorusunlar və BMT çərçivəsində tanınan dövlət sərhədlərini, dilləri, mədəniyyətləri tanısınlar. Amma məlumdur ki, “Google maps” kimi xidmətlərdə 10 minlərlə insan işləyir, bunların arasında Azərbaycana qarşı qərəzli mövqeyi olanlar da yox deyil. Özəlliklə də ermənilər və ermənilərin dostları. Ona görə də əllərinə düşən hər fürsətdən istifadə edərək bizə qarşı bu cür təxribatlar həyata keçirirlər. Onlar çalışırlar ki, fürsətdən yararlanaraq ermənilərin xeyrinə nəsə etsinlər. Biz də boş durmamalıyıq. Sual verirsiniz ki, kimdir burada məsuliyyət daşıyan? Əlbəttə, Azərbaycanın aidiyyəti rəsmi dövlət qurumu - Nəqliyyat, Rabitə və Yüksək Texnologiyalar Nazirliyi var. Bu cür prosesləri Nəqliyyat, Rabitə və Yüksək Texnologiyalar Nazirliyi diqqətdə saxlamalıdır. Eyni zamanda, dövlətin digər strukturları var ki, bu kimi məsələləri nəzarətdə saxlamalıdırlar. Aidiyyəti dövlət qurumları bu prosesləri nəzarətdə saxlamaqla kifayətlənməməli, ona qarşı dərhal tədbir görməlidirlər. Təcrübədən deyirəm, “Google maps” kimi xidmətlərə bu kimi məsələlərlə bağlı irad bildirdikdə dərhal aradan qaldırırlar, yəni dirəniş göstərmirlər. Azərbaycan ərazisi, torpağı nə üçün erməni dilində yazılmalıdır? Erməni dili burada işlək deyil, bu dilin Azərbaycana, ümumiyyətlə, heç bir aidiyyəti yoxdur. Bu cür yanlışlıqlara yol verilməməsi üçün “Google maps”la davamlı işləmək lazımdır. Heç bir iş görmədən “bizə qarşı qərəzlidir, ikili standartlardan yanaşır” deməyimiz, əslində, bəhanədir. Bu təşkilatla işləməliyik. Nə qədər ki, bu məsələlərə diqqət çəkməyəcəyik, o qədər də bizə qarşı olanlar vəziyyətdən istifadə edəcəklər”.
A.Həsrət hesab edir ki, “Google maps” kimi beynəlxalq internet təsisatları ilə işləməyi bacaran mütəxəssisləri əl üstə tutmaq, onları prosesə cəlb etmək lazımdır. “Onların imkanlarından yararlanmaq lazımdır. Biz neçə ildi deyirik, Azərbaycanda yeni texnologiyalarla bağlı çox güclü kadrlar yetişib. Amma çox təəssüflər olsun ki, onların əksəriyyəti Azərbaycandan kənarda xarici ölkələr və xarici şirkərlər üçün işləyir. Səbəb nədir? Səbəb də odur ki, o mütəxəssislər Azərbaycanda hansısa bir dövlət qurumunda işləyəndə 300-500, ən yaxşı halda isə 1000 manat maaş alır, amma tanıdığım gənclərdən biri gedib Cənubi Koreyada “Samsung” şirkətinə işə düzəlib 10 min dollar maaş alır. İndi o gənc 10 min dolları qoyub niyə burada 500-1000 manata işləməlidir? Düşünürəm ki, dövlət bu məsələni tamamilə kökündən həll etmək üçün yeni texnologiya ilə işləyən kadrların maddi təminatını çox yüksəltməlidir. Çünki əldən gedən hər bir kadr bizim gələcək sərmayəmiz deməkdir. Biz o sərmayəmizi əldən veririk. Əgər yaxşı maaş versək, yaxşı şərait yaratsaq, o gənclər qalıb burada işləyər və “Google maps” kimi şirkətlər də bu kimi yanlışlıqlara yol verəndə dövlət əziyyət çəkmədən həmin yanlışı aradan qaldıra bilər” - deyən A.Həsrət hesab edir ki, biz bu şirkətə müraciətlərimizi davam etdirsək, o, yanlışlığı aradan qaldıracaq. “Biz də boş oturmayaq, uyğun qaydada müraciət edək, problemi aradan qaldıracaqlar. Məsələn, “Google maps”da Şuşanı “Şuşi” yazırdılar, şikayətlərdən sonra Şuşa yazırlar. Belə örnəklər var, özü də az deyil” - deyə ekspert bildirdi.
İradə SARIYEVA
