Qabil Hüseynli: “Bütün bunların fonunda Rusiyanın siyasi rəhbərliyi Qarabağın statusu ilə bağlı mənasız söhbətə görə münasibətləri korlamaqda maraqlı olmaz”
Rusiya Xarici işlər naziri Sergey Lavrov Azərbaycanın Qarabağ bölgəsinin statusu məsələsinə toxunaraq bildirib ki, 10 noyabr Bəyanatında bu barədə bənd yoxdur və gələcəkdə bu işlə Minsk Qrupunun həmsədrləri məşğul olacaq.
Sergey Lavrov Rusiya Xarici İşlər Nazirliyinin 2020-ci ildəki fəaliyyətinin nəticələrinə dair mətbuat konfransındakı açıqlamasında bildirib ki, status problemi mübahisəli olduğundan, bu məsələnin gələcəyə buraxılmasına qərar verilib: “Sülhməramlı missiyanın yerləşdiyi ərazi sülhməramlı kontingentin məsuliyyət zonasıdır. İrəvan və Bakı ilə təmaslarımızda biz bu nöqteyi-nəzərdən çıxış edirik. İndi nəqliyyat kommunikasiyalarının təşkili və humanitar yardımın təfərrüatları üzərində işlənilir”.
Dəfələrlə bəyan edilib ki, Qarabağın status ilə bağlı məsələ müzakirə mövzusu deyil. Ancaq Rusiya rəsmiləri, nədənsə, vaxtaşırı olaraq buna eyhamlar edirlər. Lavrovun həm sənəddə statusla bağlı məqamın olmadığını deməsi, həm də bunun gələcəkdə müzakirə edilə biləcəyinə işarə etməsi nəyin əlaməti sayıla bilər?
Politoloq Qabil Hüseynli “Bakı-Xəbər”ə açıqlamasında bildirdi ki, belə rəylərin ortaya çıxmasının səbəbi Rusiya hakimiyyətində Qarabağla bağlı fərqli fikirlərin olmasıdır: “Həmin tərəflərdən birinin də təmsilçisi Lavrovdur. Putin isə açıqlamalarında deyib ki, Qarabağ Azərbaycan ərazisidir. Özü də o, Dağlıq Qarabağ yox, məhz Qarabağ deyir. Siyasi status məsələsini daha çox qabartmaq istəyən ölkə Fransadır. Həmin ölkə bu məsələnin üzərinə tez-tez gedir. Azərbaycanın bu məsələyə münasibəti aydındır. Bunun müzakirə mövzusu belə olmadığını bəyan edir. Çünki bir millətin bir dəfə öz müqəddəratını təyin etmə hüququ var. Onu da ermənilər edib, özlərinə Ermənistan adlı dövlət yaradıblar. İkinci dəfə Azərbaycan torpaqlarında belə addımı atmağa onlara kimsə izn verməz. Uzaqbaşı, Azərbaycanın ərazisi daxilində hansısa mədəni muxtariyyət məsələsini tələb edə bilərlər. Türkiyənin özü də bu məsələdə olduqca həssasdır. Ərdoğan açıq şəkildə bəyan etdi ki, onlar üçün bu məsələ “qırmızı xətt” anlamını daşıyır. Hətta bildirdi ki, bu xətti keçən qarşısında Türkiyəni görəcək. Pakistan kimi ölkə də bu məsələdə prinsipialdır. Azərbaycanın mövqeyini dəstəkləyən ölkələrin sayı daha da artmaqdadır. Ermənilər yenidən bu məsələdə israr etsələr, Türkiyənin də razılığı ilə yeni “Dəmir yumruq” əməliyyatına başlaya bilərik. Rusiya ilə Türkiyə arasında ciddi layihələr icra edilir. Moskva Türkiyə vasitəsilə Avropaya qaz ötürməyə başlayıb. Rusiya bundan sonra S-400-lərin üst divizionunu Türkiyəyə göndərməlidir”.
Ekspertin sözlərinə görə, bütün bunların fonunda Rusiyanın siyasi rəhbərliyi Qarabağın statusu ilə bağlı mənasız söhbətə görə münasibətləri korlamaqda maraqlı olmaz. Bu yöndə hansısa qarşıdurma olarsa, Rusiya qarşısında ciddi güc görmüş olacaq”.
Məhəmmədəli QƏRİBLİ
