Ermənistanda 10 noyabrdan başlayan gərginlik getdikcə daha da artır. Baş nazir Nikol Paşinyan ölkədəki etirazçıları əzmək üçün Dağlıq Qarabağdakı hərbçiləri Yerevana çağırıb.
Paşinyan “divar dibində ulayan” adlandırdığı rəqibləri ilə məsələni həll etmək üçün Qarabağdakı hərbçiləri Yerevanda gözlədiyini açıqlayıb.
Ermənistanın baş naziri bu barədə özünün "Facebook" səhifəsində yazıb: "Cəbhə bölgəsindən hərbi qulluqçuların onlarla videosunu izlədim. Uşaqların dərin düşüncəsindən heyrətləndim. Uşaqlar, siz haqlısınız. Divarlar altında ulayanlarla bağlı məsələləri tamamilə həll etmək üçün sizi Yerevanda gözləyirəm".
Qeyd edək ki, ermənilərin istefa tələbləri ilə üzləşən Paşinyan məhkəmələrdə siyasi rəqiblərinə qarşı mübarizədə də uğursuzluğa düçar olub. Ermənistan məhkəmələri istintaq orqanlarının müxalifət liderlərinin cinayət məsuliyyətinə cəlb edilməsi barədə qərarlarını ləğv edib.
Sonuncu dəfə Paşinyana sui-qəsd hazırlamaqda günahlandırılan Milli Təhlükəsizlik Xidmətinin keçmiş rəisi Artur Vanetsyan məhkəmə zalından azadlığa buraxılıb.
Vanetsyan etmədiyi cinayətlərdə ittiham edildiyini bildirib: "Məni etmədiyim cinayətlərdə ittiham etdilər. Siyasi proseslərdən uzaqlaşdırmaq istəyirlər".
Ermənistan Ali Məhkəməsinin sədri Ruben Vardazaryan isə respublika hakimlərini hakimiyyət və müxalifət dairələrinin təzyiqlərinə boyun əyməməyə çağırıb. Vardazaryan “Heç bir güc, müxalifət, siyasi dairələr və vətəndaş cəmiyyəti səlahiyyətlərimizə müdaxilə və təsir edə bilməz. Hər hansı bir müdaxilə mənim güclü müqavimətimlə qarşılaşacaq”, – deyə bildirib.
Vardazaryan baş nazirin hakimlər barədə “divar altında ulayan” ifadəsinə də cavab verib: “Əsaslı və qəti cavab veriləcək - “biz divar dibində ulayan hakimlərik, yoxsa vətəninə sadiq vicdanlı peşəkarlarıq”.
Bütün bunların fonunda Paşinyanın Qarabağdakı hərbçiləri Yerevana çağırması və onları siyasi proseslərə müdaxiləyə cəlb etmək niyyəti ölkənin vətəndaş müharibəsinə doğru ilk addım kimi dəyərləndirilir. Qeyd edilir ki, baş nazir özünə sadiq hərbi birləşmələri Yerevana çağıraraq etirazları onların vasitəsilə yatırmağa çalışır.
Ermənistanın Ombudsmanı Arman Tatoyan da Paşinyanın vətəndaş toqquşmalarına çağırış etdiyini deyib. Tatoyan "Facebook" səhifəsində yazıb ki, Paşinyanın cəbhədə olan əsgərlərin çağırışı ilə əlaqədar sözləri hazırkı dövrdəki məsuliyyətli, həssas günlərdə son dərəcə təhlükəlidir. Faktiki olaraq vətəndaş toqquşmalarına çağırış edilir.
"Bu paylaşım son günlərdə yayılan nifrət, zorakılıq və ölüm təhdidlərinin səsləndirildiyi və hərbi fomada olan silahlı şəxslərin yer aldığı videoların fonunda xüsusilə pislənilməlidir.
Aydındır ki, cəbhədəki əsgərlər silahlıdırlar və bu paylaşım bu çağırışların və təhdidlərin həyata keçirilməsini nəzərdə tutur.
Hamını təmkinli olmağa çağırıram. Hüquq-mühafizə orqanları qanuna uyğun olaraq hərəkət etməlidirlər. Bu, hər hansı bir qarşıdurmanın və ya özbaşına cəzalandırma cəhdinin qarşısını almaq üçün zəruridir" A.Tatoyan bildirib.
Paşinyanın çağırışı hakim partiyada da parçalanmalara səbəb olub. "Mənim adımım" parlament fraksiyasından olan deputat Lusine Badalyan istefa verəcəyini açıqlayıb. Deputat bildirib ki, "Mənim addımım" dərhal fəal addımlar atmırsa, o mandatından imtina edir. Bundan başqa, Paşinyanın paylaşımından sonra "Mənim adımım" parlament fraksiyasından Qayane Abramyan mandatından imtina etmək, Taqui Tovmasyan fraksiyada üzvlüyünü dayandırmaq, "Vətəndaş razılaşması" partiyasından Serj Varaq Siseryan istefaya getmək və partiyada üzvülüyünü dayandırmaq niyyətlərini bildiriblər.
TAHİR
