Qələmə aldığı əsərləri, tarixi romanları təkcə Azərbaycanda deyil, eləcə də dünyanın əksər ölkələrində sevilən yazıçı-publisist, tarixi romanlar müəllifi Yunus Oğuza, xüsusilə Orta Asiya regionunda böyük maraq göstərilir.
Bu da səbəbsiz deyil. Belə ki, yazıçının "Əmir Teymur" romanı Özbəkistanda Azərbaycanda olduğu qədər sevilir. Elə bunun göstəricisidir ki, Özbəkistanın kütləvi informasiya vasitələri, müxtəlif qəzet və internet portalları müntəzəm olaraq yazıçı Yunus Oğuzdan müsahibə götürürlər. "OLAYLAR" xəbər verir ki, bu günlərdə Yunus Oğuzun Özbəkistanda nəşr olunan "Pravda vostoka" qəzetində növbəti müsahibəsi dərc edilib. Müsahibədə müəllif qeyd edir ki, Yunus Oğuz tanınmış azərbaycanlı yazıçı-türkoloq, tarixçi, publisist, politoloq və jurnalist olmaqla yanaşı, həm də bir sıra elmi və bədii əsərlərin müəllifidir. Ona xüsusi populyarlıq qazandıran isə dünyanın müxtəlif dillərinə tərcümə edilmiş tarixi romanlarıdır. Bundan başqa, bütün dünyada yazarın "Türkün gizli tarixi", "Əmir Teymur:Zirvəyə doğru", "Türkün tarixinə yeni bir baxış", "Qədim Anadolu və Azərbaycan türkləri" və sairə bu kimi tarixi-publisistik əsərləri məşhurdur. Müsahibədə daha çox müəllifi olduğu "Əmir Teymur" romanına diqqət çəkən yazıçı qeyd edib ki, bir zamanlar Əmir Teymuru neqativ tərəfdən təqdim etmək üçün hər şey edilib. Lakin həqiqətdə onun Mərkəzi Asiya regionunda dövlətçiliyin inkişafında qoyduğu misilsiz səyi danmaq olmaz: " Misal üçün, Cəlaləddin Məngübirdi Çingiz xanın dövründə yaşayıb və tarixdə ona qarşı mübarizə aparan bir şəxsiyyət kimi yadda qalıb. Çingiz xanın tarixindən yazarkən bu faktı görməzdən gəlmək olmaz. Bu bizim ümumi tariximizdir və insanlara bu həqiqətləri olduğu kimi çatdırmaq lazımdır ki, xalq öz qəhrəmanlarının tanıya bilsin. Tarixi mənbələrdə onların fəaliyyətilə bağlı təhrif olunmuş və ya onların xidmətləri haqqında ötəri yazılmış faktları oxuduqda çox təəssüflənirəm. Mənim əsas prinsipim hökmdarların həyatlarını obyektiv şəkildə araşdırmaqdan ibarətdir". Tarixi romanları qələmə alarkən tarixi mənbələrə daha çox diqqət yetirdiyini deyən Yunus Oğuz bildirib ki, hər zaman yazdığı qəhrəmanlar haqqında həmin dövrün orjinal materiallarına əsaslanıb: "Məsələn, "Nadir şah" romanını yazarkən, o vaxtın bütün ədəbiyyətını araşdırmışdım. Əmir Teymurun bioqrafiyası ilə tanış olarkən isə "Zəfərnamə"ni diqqətlə təkrar-təkrar oxumuşdum. Çalışırdım daha çox XIX və XX əsrlərin ədəbiyyatına müraciət edim. Birmənalı şəkildə obyektiv informasiya mənbələrini tapmaq çox vacibdir". Müsahibədə Əmir Teymur şəxsiyyətinə böyük hörmətlə yanaşdığını ifadə edən yazıçı qeyd edib ki, Əmir Teymur qanunlar məcəlləsini yaradaraq özü də həmin qanunlara əməl edirdi: "35 il ərzində bu dahi hökmdar bircə dəfə olsun döyüşdə uduzmayıb. Tarixdə bu kimi şeylərə nail olan çox az olub. Əmir Teymur qlobal düşünürdü. Əsl bir hökmdar kimi. O, gələcəyi görüb proqnozlar verərək, fəaliyyyət strategiyasını qururdu. Əgər həyat ona şans versəydi, Teymurun ordusu Afrikanı belə tutacaqdı. Burada Teymurun planlarına nəzər salaraq, onun hədəflərinin nə qədər böyük olduğunu görə bilərik. Məhz ona görə də xalqın qəhrəmanına çevriləcək şəkildə dahi sərkərdə və hökmdarın obrazı insanlarda heyranlıq yaratmaya bilməz". Gələcək planları barədə də söz açan Yunus Oğuz bildirib ki, hazırda elmi-fəlsəfi və tarixi işlər üzərində çalışır: "Bu yaxınlarda Çingiz xanın və Məngübirdinin ömür yolundan bəhs edən kitabı yekunlaşdırmışam. Növbəti hədəfim yeni əsər üzərində çalışmaqdır. İstərdim ki, bütün türk dünyasına dahi hömkdarlar haqqında əsl həqiqətləri çatdırım. Azərbaycanda ümumi təhsil proqramına Əmir Teymurun həyat və yaradıcılığına aid kitablar əlavə olunub. Məhz məktəblər sayəsində bizlər uşaqlara ümumi tarixi və türkün zəngin mədəniyyətini aşılaya bilərik. Əsərlərin ekranlaşdırılması və bütün dünyaya yayılması isə ayrıca bir müsbət hal olardı".
