Belarus prezidenti Aleksandr Lukaşenko bildirib ki, Zelenski nəhayət başa düşüb ki, bu müharibədə qalib gəlməyəcək. Onun sözlərinə görə, bu əks-hücum minlərlə insanın ölümü istisna olmaqla, onun üçün heç bir nəticə verməyəcək:
"Zelenski tədricən Ukraynanı bu müharibəyə sövq edənlərə qarşı iddialar irəli sürməyə başlayıb. Bunlar ilk növbədə pul və yeni silah formasında iddialardır. O, artıq bu vəziyyətdən çıxmaq üçün addımlar atır".
Belarus lideri həmçinin hesab edir ki, Ukraynada mübarizə daha da artacaq, çünki Ukraynanın hələ də kifayət qədər strateji ehtiyatları var: “İyulun 11-nə qədər onlar nəsə nümayiş etdirməlidirlər. Əgər onlar (Ukraynanın hərbi rəhbərliyi ) indi ən yaxşı birləşmələri döyüşə atsalar, nəhayət, Ukraynanın döyüş qabiliyyətini dəfn edəcəklər”.
Lukaşenko Zelenskinin Rusiyaya münasibətini düzmü izah edir?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Lukaşenko bu məsələdə tam obyektiv ola bilməz: “Çünki Rusiyanın ən yaxın müttəfiqidir. Ancaq dediklərində həqiqət var. Bu müharibənin Rusiya ilə NATO arasında getdiyi hamıya gözəl məlumdur. Zelenskinin özü şəxsən bir neçə dəfə Qərbdəki müttəfiqlərindən publik olaraq şikayət edib ki, ona lazımi silahları vermirlər. Ukrayna prezidenti Vladimir Zelenski ukraynalı pilotlara F-16 qırıcılarını idarə etmək üçün təlimlərin gecikdirilməsindən şikayətlənərək, Qərbdəki tərəfdaşlarına sualları olduğunu deyib. Kiyevə səfər edən İspaniyanın baş naziri Pedro Sançesə “şikayətçi düşən” Vladimir Zelenski Ukraynanın nə vaxt “F-16”-lar alacağı ilə maraqlanıb. Zelenski Ukrayna pilotları üçün məşqə başlamağa hazır olduqlarını bəyan edən Qərb ölkələrinin hələ ki, təlim missiyalarının olmamasından gileylənib. Bəzi Qərb tərəfdaşlarının bunu təxirə salmalarından narahatlıq keçirdiyini dilə gətirən Ukrayna prezidenti onların niyə belə etdiklərini bilmədiyini də deyib. Etiraf edək ki, NATO bu müharibənin maksimum uzanmasında maraqlıdır. Bu üsulla Rusiyanı tam zəiflətməyi düşünürlər. Ən çox itirən də onlar yox, məhz Ukraynadır. Müharibənin uzadılması Ukrayna prezidentinə də sərf etmir. Ancaq bu heç də o anlama gəlmir ki, Rusiyanın vəziyyəti daha yaxşıdır. Üzücü müharibə kənar oyunçulardan başqa heç bir tərəfə sərf etmir. Bu baxımdan da Lukaşenkonun real vəziyyətlə bağlı açıqlamasını obyektiv saymaq olar. Ancaq o, acınacaqlı vəziyyətdə olan ölkə kimi yalnız Ukraynanı göstərib. Rusiyanın vəziyyəti heç də ürəkaçan deyil. Belə getsə, tərəflər kənar vasitəçilər olmadan da sülh danışıqlarına getməli olacaqlar”.
Məhəmmədəli QƏRİBLİ
