Ukrayna Prezidenti Vladimir Zelenski Gürcüstanın keçmiş prezidentinin yayılan fotolarına münasibət bildirib.
Bu barədə o, sosial şəbəkə hesabında yazıb. Zelenski xatırladıb ki, Ukrayna hakimiyyəti dəfələrlə Gürcüstanı Saakaşvilini Ukraynaya köçürməyə çağırıb. Onun sözlərinə görə, xarici işlər naziri Dmitri Kulebaya Gürcüstanın Ukraynadakı səfirini çağırıb ona kəskin etirazını bildirməyi və rəhbərliyi ilə məsləhətləşmələr üçün ölkəni tərk etməyi təklif etməyi tapşırıb.
Qeyd edək ki, bir neçə gün əvvəl Ukrayna Prezidentinin fərmanına əsasən Rusiya Federasiyası ilə birbaşa uçuşları bərpa edən “Georgian Airways” şirkətinə qarşı da sanksiyalar tətbiq edilib. Aviaşirkətin təsisçisi Tamaz Qayaşviliyə də şəxsi sanksiyalar tətbiq olunub. Bildirilir ki, tətbiq olunan məhdudiyyətlər paketində aktivlərin bloklanması, ticarət əməliyyatlarının, uçuşların və Ukrayna ərazisindən tranzitin, iqtisadi və maliyyə öhdəliklərinin dayandırılması, lisenziyaların və digər icazələrin ləğvi nəzərdə tutulur.
Saakaşvili və digər məsələlər Ukrayna ilə Gürcüstan arasındakı münasibətləri barışmaz hala sala bilərmi? Belə olarsa, uduzan kim olar?
Politoloq Əhəd Məmmədli “Bakı-Xəbər”ə açıqlamasında bildirdi ki, onsuz da Ukrayna-Gürcüstan münasibətləri maksimum gərginlik fazasını yaşayıb: ”Düşünürəm ki, bu təkcə Saakaşviliyə görə belə deyil. Həm də müharibə başlayandan Ukrayna Gürcüstandan gözlədiyi dəstəyi almadı. Halbuki, 2008-ci ildə Ukrayna Gürcüstanın hava məkanını açmışdı, gürcülərə dəstək vermişdi. Amma Gürcüstan həmin dəstəyi vermədi və Rusiyaya qarşı sanksiyalara qoşulmadı. Gürcüstanda müharibə qısa oldu, Ukraynada uzun. Gürcülər də öz maraqlarını nəzərə aldılar, bildirdilər ki, onların Rusiya ilə öz ticarət maraqları var. Saakaşvili zamanında olmasa belə, hazırda Rusiya Gürcüstanla ən yaxşı münasibətlərini yaşayır. O ki qaldı Saakaşviliyə, o, Ukrayna vətəndaşıdır. Zelenski ilə Saakaşvilinin oxşar taleləri var idi. Mən onların ikisini eyni layihə hesab edirəm. Zelenski həm ona görə Saakaşviliyə dəstək verir, həm də daxili auditoriyanı da nəzərə almağa çalışır. Saakaşvili isə faciəvi bir personajdır. Bir çoxları üçün siyasətlə məşğul olan bir nümunə oldu həm də. Qərbyönlü böyük oyunçular öz xırda oyunçularını lazım olanda necə qurban verə bilirlər, onu gördük. Burda elə ola bilər ki, Saakaşvili yenidən siyasətə qayıtsın. Düzdür, bu az inandırıcı görsənir. Amma elə iddialar səslənə bilər. Sonda demək istəyirəm ki, mən Saakaşvili tipli siyasətçiləri heç vaxt bəyənməmişəm. Fərq etməz Qərb və ya Rusiya layihəsi olsun. Bu, balaca ölkələrə aiddir. Balaca ölkələrin siyasətçiləri xalqdan çıxmalıdır və xalqdan dəstək alıb hakimiyyətə gətirilməlidir. Amma unutmayaq ki, o, bir ölkənin prezidenti olub. Onun da xidmətləri olub ölkəsi qarşısında. Bir ölkənin eks-prezidentinə qarşı bu cür davranış doğru deyil. Ona görə də, mən də bu məsələdə Gürcüstanı qınayıram. Ölkəsinin vaxtilə prezidenti olmuş adamdan bu cür davranış qəbul etmirəm. Sivil, hüquqi dövlətə yaraşdırmıram. Burada Azərbaycan da nümunə göstərilməlidir. Qardaş Türkiyədə necə eks-prezidentə, ölkənin baş nazirinə sayın cumhurbaşkanı, sayın millət vəkili deyirlər? Bizlər də bu dövlətçilik institutunu mənimsəməliyik. Belə davranış dövlətin inkişaf etməsinə təkan vermir. Əksinə, qisasçılıq yaradır. İndiki Gürcüstan prezidenti, yaxud baş naziri hakimiyyətdən gedəndən sonra Saakaşvilinin bir tərəfdarı hakimiyyətə gəlsə, eyni davranışı onlarla sərgiləsə, nə olacaq o zaman? Bu Azərbaycana da, digər ölkələrə də aiddir. O zaman indiki iqtidarlar keçmiş iqtidarlardan qisas alaraq yaşasın? Bu da ümumi dövlətçiliyin inkişafına töhfə vermir, əksinə zərbə vurur”.
Məhəmmədəli QƏRİBLİ
