DİN Astara Pedaqoji Kollecində “İnsan alverinə qarşı mübarizə” tədbiri keçirdi
Həyatımıza təsirsiz ötüşməyən bəzi problemlərin, zərərli vərdişlərin acı nəticələri özünü göstərir. İndiki zamanda leksikonumuzda özünə yer alan “insan alveri” də belə amillərin sırasında durur. Doğrudur, milləti bu bəladan qorumaq, daha doğrusu törədilə biləcək cinayətin qarşısını vaxtında almaq məqsədilə hüquq-mühafizə orqanları tərəfindən ardıcıl zəruri tədbirlər görülür. Etiraf edək ki, bütün bunlar olan yerdə, yenə də insan alveri respublikamızın qlobal problemlərdən biri kimi qalır. Nəticədə zaman ona qarşı mübarizənin yeni istiqamətlərin, metodların tətbiqini istəyir. Bunların içərisində maariflənmək də önəmli rol oynayır. Məhz Astara Pedaqoji Kollecində təşkil olunmuş “İnsan alverinə qarşı mübarizə” mövzusunda tədbir bu məqsəddən irəli gəlirdi.
Əhəmiyyəti maarifləndirmək olan tədbirdə Astara Pedaqoji Kollecinin müəllim və tələbə heyəti, Daxili İşlər Nazirliyinin İnsan Alverinə Qarşı Mübarizə Baş İdarəsinin baş əməliyyat müvəkkili Vamiq Naməndzadə, Astara rayon Polis rəisinin müavini Amil Seyfullayev, Kibercinayətkarlığa Qarşı Mübarizə İdarəsinin baş əməliyyat müvəkkili Bəhruz Həsənov iştirak edirdi.
Tədbiri açan kollecin direktoru, professor Kamran Kazımov qonaqları salamlayaraq ümumbəşəri problem olan insan alverinə qarşı mübarizə məqsədilə maarifləndirmə işlərinin vaxtaşırı aparılmasının vacibliyi və onun cəmiyyətə verdiyi əhəmiyyəti haqqında danışdı.
Daxili İşlər Nazirliyinin İnsan Alverinə Qarşı Mübarizə Baş İdarəsinin baş əməliyyat müvəkkili Vamiq Naməndzadə mövzu ilə bağlı ətraflı məlumat verərək qeyd etdi ki, Azərbaycan insan alverinə qarşı mübarizə sahəsində böyük nailiyyətlər əldə edib. Son illər respublikamızda insan alverinə qarşı mübarizə tədbirləri gücləndirilib, ölkəmizdə bu sahədə mükəmməl qanunvericilik bazası, eyni zamanda düzgün maarifləndirmə sistemi mövcuddur.
Həmçinin natiq çıxışı zamanı onu da xüsusi olaraq vurğuladı ki, insan alverinə qarşı mübarizədə əldə edilən uğurların cəmiyyətə düzgün çatdırılmasında, maarifləndirmə işinin aparılmasında beynəlxalq və yerli qeyri-hökumət təşkilatlarının, mətbuatın tərəfdaşlığının rolu hər bir dövlətdə insan hüquqlarının, eləcə ailə institutunun qorunmasında, onun düzgün formalaşmasında ən önəmli məsələdir.
Daha sonra söz alan Kibercinəyətkarlığa Qarşı Mübarizə İdarəsinin baş əməliyyat müvəkkili Bəhruz Həsənov dedi: - Kibertəhlükəsizlik mobil cihazların, serverlərin, kompüterlərin, elektron sistemlərin, şəbəkələrin və məlumatların zərərli hücumlardan qorunmasıdır. Kiber təhlükəsizlik olmadan, şəxsi məlumatlar, maliyyə məlumatları, dövlət və ya korporativ sirlərin oğurlanması və ya məhv edilməsi kimi ciddi təhlükələrlə üzləşə bilərik.
Qarşılıqlı diskussiya şəraitində keçən tədbirdə tələbələri düşündürən suallar da öz düzgün cavablarını tapdı.
Zəfər ORUCOĞLU
Azərbaycan Jurnalistlər Birliyinin üzvü
