Elşən Qafarov: “Bu cür qərarları verənlərin pedaqogikadan, istedadlı uşaqla iş təcrübəsindən anlayışları varsa, yaxşı bilməli idilər ki…”
Məlum olduğu kimi, lisey və gimnaziyalara qəbul hər ilin aprel-may aylarında həyata keçirilirdi. Əvvəlki illərdə 4, 5, 6 və 7-ci siniflərdən şagirdlər lisey və gimnaziyalara qəbul olub, tədris ilini davam etdirə bilirdilər. Ancaq iki gün öncə çıxan qərara görə, qəbul 6-cı sinifdən etibarən həyata keçiriləcək.
Əlbəttə ki, bu qərar öncədən vəsait sərf edən, hazırlaşan şagird və valideynlərin haqlı etirazına, həmçinin minlərlə valideyn, müəllim və şagirdin ciddi narahatlığına səbəb olub.
Qeyd edək ki, liseyə qəbul olmaq istəyənlər uzun müddət kurslara, repetitor yanına hazırlığa gedib. Valideynlər uşaqlarının qeyd edilən təhsil müəssisəsinə qəbul olması üçün böyük vəsaitlər sərf edib. Qəbula bir neçə gün qalmış belə qərarın verilməsi ictimaiyyət arasında narazılığa və böyük səs-küyə səbəb olduğundan, bu səhər (29 may) məlum qayda dəyişdi. Təhsil İnstitutunun yaydığı məlumatda qeyd edilir ki, şagirdlərin lisey və gimnaziyalarda təhsil almağa böyük maraqları və tədris ili boyunca imtahan prosesinə hazırlıqları nəzərə alınaraq, 2025-2026-cı tədris ilində istisna olaraq 5, 6 və 8 siniflər üzrə də qəbul prosesi həyata keçiriləcək.
Maraqlıdır, təhsil sistemində bu kimi düşünülməmiş qərarlar niyə qəbul olunur?
“Düşünülməmiş qərarların verilməsi təhsil sisteminin qeyri-peşəkar və qeyri-ciddi insanlar tərəfindən idarə olunmasının göstəricisidir”
Təhsil eksperti Elşən Qafarov “Bakı-Xəbər”ə şərhində bildirdi ki, lisey və gimnaziyaların bir qisminə mərkəzləşdirilmiş qaydada bir neçə ildir imtahan keçirilir: “Lisey və gimnaziyalar ümumorta və tam orta təhsil səviyyəsi üzrə qurulur. 5-11-ci sinifləri əhatə edir. Artıq iki ildir, 9-cu sinfə qəbul dayandırılmışdı. 5, 6 və 8-ci siniflərə qəbulun ləğv edilməsi, yalnız 6-cı siniflər üzrə qəbulun aparılması barədə qərarın sənəd qəbuluna bir həftə, imtahana isə 20 gün qalmış açıqlanması yolverilməzdir. Bu, bir daha təhsil sisteminin qeyri-peşəkarlar və qeyri-ciddi insanlar tərəfindən idarə olunmasının təzahürüdür.
Nəzərə almaq lazımdır ki, 5-ci sinfə sənəd verəcək məktəblilər 4-cü sinifdə oxuyan 10 yaşlı uşaqlardır. 6-cı sinifə sənəd verənlər isə 11 yaşlı. Bu uşaqlar bir-iki ildən artıq müddətdə xüsusi proqramlar vasitəsilə üç fənn üzrə hazırlaşıblar. Bu qərarı ən azından oktyabrda elan etmək olardı ki, növbəti il lisey və gimnaziyalara qəbul olmayacaq. Düşünülməmiş qərarların verilməsi təhsil sisteminin qeyri-peşəkar və qeyri-ciddi insanlar tərəfindən idarə olunmasının göstəricisidir. Belə insanların qəbul etdikləri qərar, təbii ki, bu olacaq. Artıq heç nə etmək mümkün deyil. Bir də utanmadan elan edirlər ki, “biz 5-ci sinfə qəbulu buna görə ləğv etmişik ki, istedad imtahanı beynəlxalq təcrübədə məhz 12 yaşdan götürülür”. Yalan deyirlər. Doğrudan da bunların pedaqogikadan, istedadlı uşaqla iş təcrübəsindən anlayışları varsa, yaxşı bilməli idilər ki, istedadlı uşaqlarla işin təşkili 3-6 yaşdan, yəni erkən yaş dövründən başlayır. İstedadlı uşaqların seçimində də problem var. Bir az nəticələr var idi, amma son illər bu da sürətlə aşağı düşdü. Reallıq budur ki, hər şey pul qazanmağın üzərinə düşür. Təhsilə bazar gözü ilə baxılır. Bu da öz acı nəticələrini verməkdədir”.
Günel CƏLİLOVA
