Bakı şəhərində yerləşən 207 nömrəli tam orta məktəbin direktoru Yaqut Müseyiblinin (Y.Müseyibli işdən çıxarılıb-İ.S) yayılan səs yazısından sonra indi də Bakı şəhəri 201 nömrəli tam orta məktəbin direktoru Afaq Əliyevaya məxsus olduğu iddia edilən səs yazısı yayılıb.
Sosial şəbəkələrdə paylaşılan səs yazısında direktor vəzifə səlahiyyətlərindən sui-istifadə etməklə məktəbin müəllimi Lalə Şəfaqətovanı təhdid edərək, keçmiş direktor müavini Svetlana Hüseynovaya qarşı yalançı şahidlik etməyə məcbur edir.
Məsələ ilə əlaqədar Bakı Şəhəri üzrə Təhsil İdarəsindən bildirilib ki, səs yazısı ilə bağlı araşdırma aparılır. Qeyd olunub ki, araşdırmanın nəticəsi barədə ictimaiyyətə məlumat veriləcək.
Mətbuatda gedən məlumata görə, Svetlana Hüseynova 2023-cü ildə işdən çıxarılıb və işgüzar nüfuzuna xələl gətirilməsi iddiası ilə direktor Afaq Əliyevanı məhkəməyə verib.
Afaq Əliyeva 51 yaşındadır. Gəncə Dövlət Pedoqoji İnstitutu, Azərbaycan Respublikası Təhsil problemləri institutunu bitirib.
O, 2022-ci ildən məktəbə rəhbərlik edir.
Qeyd olunduğu kimi, məktəb direktoruna aid olduğu iddia edilən səs yazısı yayılıb. Səs yazısının mahiyyətinə görə, direktor məktəbin müəllimlərindən birini təşviq edir ki, keçmiş direktor müavininin əleyhinə yalançı şahidlik etsin. Yalançı şahidliyə vadar etmə cinayət tərkibli məsələdir, əməldir. Bununla bağlı Cinayət Məcəlləsində ayrıca maddə var. Bu mənada, bu məsələnin araşdırılması ilə Bakı şəhəri üzrə Təhsil İdarəsi niyə məşğul olmalıdır? Bu cinayət tərkibli məsələdir. Burda audivizual kriminalistik araşdırma getməlidir, o səs yazısının həqiqətən ona aid olub-olmadığı araşdırılmalıdır. Bakı Şəhəri üzrə Təhsil İdarəsinin nə kimi vəsaitləri var, nə qədər hüquqi inzibati imkanları var bu məsələni araşdırsın ki, doğrudan da bu səs yazısı Afaq Əliyevaya məxsusdur? Bəlkə kimsə quraşdırıb? İndi süni intellektlə hər şey edə bilirlər. Bunu müəyyənləşdirmək Bakı Şəhəri üzrə Təhsil İdarəsinin işi deyil, bunu müəyyənləşdirmək hüquq-mühafizə orqanlarının işidir, ona görə də bu cür məsələlərlə bağlı dərhal hüquq-mühafizə orqanlarına müraciət edilməlidir, bu barədə polis, prokurorluq apaşdırma aparmalıdır. Onların hər cür vəsaiti var ki, səs yazısını araşdırıb həqiqi, yoxsa qondarma olduğunu müəyyən etsin
Məzahir Məmmədli: “Bu məsələni hüquq-mühafizə orqanları araşdırmalıdır, səsin məktəb direktoruna aid olub-olmadığını müəyyən etməlidir”
Təhsil eksperti Məzahir Məmmədli “Bakı-Xəbər”ə bildirdi ki, ümumiyyətlə həm səsin yazılması, həm videonun çəkilməsi Cinayət Prosessual Məcəlləsinə görə razılaşdırılmalıdır: “Yox, əgər bu adam gizli səs yazıbsa, deməli o da cinayət edib. Bütün hallarda bu işlərin hər ikisi cinayət tərkiblidir”.
M.Məmmədli dedi ki, iddia olunduğu kimi, əgər məktəb direktoru məktəbin əməkdaşını yalançı şahidliyə vadar edirsə, burda da cinayət tərkibi var.
“Hesab edirəm ki, bu məsələni bütün hallarda hüquq-mühafizə orqanları araşdırmalıdır. Amma iddia sübut olunarsa, bu halda hər iki şəxsin cəzası verilməlidir. İndi elə tendensiya yaranıb ki, istənilən adam əlinə bir smart telefon alıb, cibinə gizli səsyazma qurğusu qoyub ya şantaj üsulu ilə, yaxud hansısa bir məsələni guya aydınlaşdırırmış kimi kiminsə səsini yazır. Bilirsiz ki, qanunvericilikdə bunun qadağan olunduğu nəzərdə tutulub. Yox, əgər bu məsələ ilə bağlı məhkəmənin qəraı varsa və bu razılaşdırılıbsa, bu da məhkəmə yolu ilə araşdırılmalıdır. Bu o səsi yazanın özü üçün də müəyyən məsuliyyət yaradır.
Bu, təhsil sistemi üçün çox pis, eybəcər bir tendensiya yaradır. Yəni bu cür tamaşaları, oyunları qurtarmaq lazımdır.
Əgər sənin problemin varsa əvvəlcə Bakı Şəhəri üzrə Təhsil İdarəsinə, sonra MÜTDA-ya və Elm və Təhsil Nazirliyinə müraciət etməlisən. Gördün ki, bu imkanların hamısı tükənib, o halda hüquq-mühafizə orqanlarına müraciət et və məsələnin araşdırılmasını istə. Yoxsa səs yazmaq, şantaj etməyin özü də bir cinayət əməlidir və buna görə tərəflərin hamısı qanun qarşısında cavab verməlidir.
Bir daha qeyd edirəm ki, bu məsələni hüquq-mühafizə orqanları araşdırmalıdır, səsin məktəb direktoruna aid olub-olmadığını müəyyən etməlidir. Burda cinayət tərkibi varsa, bu işlə hüquq-mühafizə orqanları məşğul olmalıdır” - deyə M.Məmmədli əlavə etdi.
Elyar İslamoğlu: “Hüquq-mühafizə orqanlarının belə məsələləri araşdırmaq üçün kifayət qədər resursları var, onlar bu işdə peşəkardırlar”
Filologiya üzrə fəlsəfə doktoru, tanınmış ictimai fəal Elyar İslamoğlu da “Bakı-Xəbər”ə bildirdi ki, sosial şəbəkələrdə o da həmin səs yazısını eşidib: “Əslində, belə hadisələr baş verən zaman dərhal Bakı Şəhəri üzrə Təhsil İdarəsi (BŞTİ) hüquq-mühafizə orqanlarına müraciət etməlidir. Bu məsələni hüquq-mühafizə orqanları araşdırmalıdır. Çünki indi ortaya xeyli sayda səs yazısı və videolar da çıxa bilir ki, onlar süni intellekt vasitəsilə düzəldilir. Səs yazısını, videonu elə düzəldirlər ki, hər kəs elə bilir doğrudan da video, səs yazısı hansısa bir şəxsə aiddir, amma sonradan onun süni intellektlə hazırlandığı məlum olur. Yaxşı olar ki, belə müraciətlər olanda BŞTİ özü araşdırma aparmasın, hüquq-mühafizə orqanlarına müraciət etsin. Çünki hüquq-mühafizə orqanlarının belə məsələləri araşdırmaq üçün kifayət qədər resursları var, onlar bu işdə peşəkardırlar. Bu həm müəllimin, direktorun nüfuzunun qorunmasına xidmət edər, həm də hansısa bir qurum özünə aid olmayan işlə məşğul olmaz”.
E.İslamoğlu qeyd etdi ki, BŞTİ təhsil məsələləri ilə bağlı məşğul olsa daha yaxşıdır, nəinki kriminalistlər kimi hansısa bir məsələnin araşdırılmasına vaxt sərf etsinlər. E.İslamoğlu hesab edir ki, belə hadisələr baş verən zaman həm məktəb rəhbərliyi, həm də BŞTİ hüquq-mühafizə orqanlarından dəstək istəməlidir.
İradə SARIYEVA
