Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanası Səbail rayon Mərkəzi Kitabxanasında Nizami Məmmədov və Sevda Məmmədəliyevanın müəllifi olduqları “Ekoloji sivilizasiyanın astanasında: yaşıl enerjiyə keçid” kitabının müzakirəsinə həsr olunmuş “dəyirmi masa” keçirib.
Torpaqlarımızın azadlığı uğrunda gedən döyüşlərdə şəhid olmuş şəhidlərimizin və xalqımızın Ümummilli Lideri Heydər Əliyevin əziz xatirəsi bir dəqiqəlik sükutla yad edilib. Tədbiri giriş sözü ilə tarix üzrə fəlsəfə doktoru, Fəxri mədəniyyət işçisi, Yasamal rayon MKS-nin direktoru Lətifə Məmmədova açaraq “Ekoloji sivilizasiyanın astanasında: yaşıl enerjiyə keçid” kitabı haqqında qısa məlumat verib. Qeyd edib ki, kitab iki böyük alim - akademik Yusuf Məmmədəliyevə və türkiyəli professor Turhan Nejat Vəziroğluna ithaf edilib. Bildiyimiz kimi və bu ilin dekabr ayının 31-də nəhəng alim Yusuf Məmmədəliyevin anadan olmasının 120 illik yubileyidir. Üç dildə (Azərbaycan, ingilis, rus) nəfis şəkildə nəşr olan kitab müasir dövrdə mühüm məlumatların toplandığı qiymətli vəsaitdir. 12 bölmədən ibarət olan kitab müəlliflər tərəfindən ölkəmizin bir çox təhsil müəssisələrinin, həmçinin Mədəniyyət Nazirliyinin tabeliyində olan bir çox kitabxanalara hədiyyə edilib. Zamanın səsinə səs verən kitabla bağlı həm bir sıra orta məktəblilər, həmçinin C.Naxçıvanski adına Hərbi Liseyin kursantları arasında şeir, esse və inşa müsabiqəsi keçirilib. 73 nəfərin iştirak etdiyi müsabiqədə şeir üzrə 18 nəfər, esse və inşa müsabiqəsində isə 8 nəfər qalib olmuşdur. Yazıçı-publisist, politoloq Reyhan Mirzəzadə kitabın ithaf olunduğu alimləri əbədi məşələ bənzədərək qeyd etdi ki, Yusuf Məmmədəliyev böyük şəxsiyyət idi və alman faşizmininə qarşı mübarizədə onun elmə, benzin buraxılışına, SSRİ-nin hərbi sənayesinə böyük köməyi dəymişdir. Yusuf Məmmədəliyev dünyanı sülhə çağırırdı, dünya xalqlarının sülh içərisində yaşamasını arzulayırdı. Reyhan xanım daha sonra kitab haqqında fikirlərini bölüşərək dedi ki, insan təbiət gözəlliklərindən güc alır. Meşələr, yaşıllıqlar olmasa insanın şüuru, zehni inkişaf edə bilməz. “Ekoloji sivilizasiyanın astanasında: yaşıl enerjiyə keçid” kitabının müəllifləri insanları təbiəti qorumağa və ondan güc almağa çağırır. Fəlsəfə elmləri doktoru, professor, Azərbaycan Milli Elmlər Akademiyasının müxbir üzvü Sevda Məmmədəliyeva tədbirin təşkilatçılarına, tədbir iştirakçılarına, kitabın müzakirəsində, ekologiyaya həsr olunmuş müsabiqədə iştirak edən şagird və kursantlara təşəkkürünü bildirdi. Sevda xanım daha sonra bildirdi ki, akademik Yusuf Məmmədəliyev yüksəkoktanlı benzini ixtira etdikdən sonra, Hitlerin göstərişi ilə Y.Məmmədəliyevi öldürmək və onun laboratoriyasını partladmaq üçün Bakıya alman kəşfiyyatçılarından ibarət diversiya qrupu göndərildi. Bu faktı professor, Beynəlxalq Şərq Neft Akademiyasının vitse-prezidenti, geologiya-mineralogiya elmlər doktoru Çapay Sultanov yazdığı kitabda qeyd edib. Sevda Məmmədəliyeva çıxışını sevilən şair Bəxtiyar Vahabzadənin atasının 50 illiyinə həsr etdiyi şeiri ilə yekunlaşdırdı. YUNESKO-nun eksperti, Rusiya Federasiyasının Prezidenti yanında Dövlət Qulluğu Akademiyasının professoru Nizami Məmmədov çıxış edərək bildirdi ki, kitabın təqdimatı müxtəlif məkanlarda keçirilsə də, bügünkü tədbir xüsusilə möhtəşəmdir. Professor N.Məmmədov elmi işlərindən, iştirak etdiyi konfranslardan, kitabın ərsəyə gəlməsindən ətraflı söz açdı. Qeyd etdi ki, “Ekoloji sivilizasiyanın astanasında: yaşıl enerjiyə keçid” kitabının davamı olaraq, bu il daha yeni bir kitabımız işıq üzü görəcək. Kitabın müəllifləri Nizami Məmmədova və Sevda Məmmədəliyevaya, C.Naxçıvanski adına Hərbi Liseyin rəisi, Vətən Müharibəsi Qəhrəmanı, polkovnik Anar Mirzəyevə M.Ş.Vazeh adına Mərkəzi Kitabxananın Fəxri oxucusu diplomları təqdim olundu. “Dəyirmi masa”da müsabiqələrin qalibləri olan kursantlar, Vüsal Hüseynov, Əli Hümbətov, Nicat Zərbəliyev, Həsən Qürbətzadə, Yusif Həşimov, Xəzər Əliməmmədli, məktəblilər, Natella Rəhimli, Aylin Rüstəmli, Nuray Şahəliyeva, Zəhra Fərəcova, Əli Ağamoğlan, Nuray Mirzəzadə, Aylin Hüseynzadə, Tərlan Mirzəyeva, Səidə Məmmədli, Əsnad Əlimərdanova, Fidan Qənizadə, Nihad Ələsgərov, Şəfəq Əlizadə, Vəzifə Məmmədalıyeva diplomlarla təltif edildi və onlara “Ekoloji sivilizasiyanın astanasında: yaşıl enerjiyə keçid” kitabı hədiyyə olundu. C.Naxçıvanski adına Hərbi Liseyin tərbiyə üzrə tabor komandirinin müavini Mehrab Əmirova kitab, liseyin qiraət və natiqlik dərnəyinin rəhbəri Gülsəda Amana təşəkkürnamə təqdim olundu. Tədbirin bədii hissəsində Respublika və Beynəlxalq müsabiqələr laureatı, muğam ustası Maya Cəbrayılova muğamlar, Respublika və Beynəlxalq müsabiqələr laureatı, Azərbaycan Milli Konservatoriyası və Bakı Musiqi Akademiyasının məzunu müğənni-vokalçı İslam Qasımov “Azərbaycan” və “Ey Vətən”, Bakı Musiqi Akademiyasının magistri Leyli Əşrəfi “Deyir ayrılma məndən”, “Kəpənək”, Səbinə Qocayeva “Juravli”, “Moy mir” mahnılarını ifa edərək, müsabiqə qalibi olan kursantlar və məktəblilər təbiətə aid şeirlərlə tədbirə rəng qatdılar. Azərbaycan Milli Konservatoriyası tərkibində İncəsənət Gimnaziyasının, 7, 18, 76, 11, 175 nömrəli tam orta məktəblərin şagirdləri Nəzrin və Tuncay Babazadələr, Tamella Məmmədova, Nəzrin Rzazadə, Yusif Yaqubov, Kənan Hüseynzadə, Aminə Talıbova, Cahan Qurban, Aysun Zeynallı və Aişə Butt Sultanə “Dünyanı xilas edək” və “Məhəbbət çırağı” mahnılarını ifa etdilər. Uşaq yazıçısı, professor Solmaz Amanova çıxışında vurğuladı ki, ekoloji baxımdan çətin vaxtda təbiətimizi qorumasaq, bunu bizim üçün heç kim etməyəcək. Təbiəti tullantılardan təmizləmək üçün uşaqları da tərbiyə etmək lazımdır. Tədbirdə “Ekoloji sivilizasiyanın astanasında: yaşıl enerjiyə keçid” kitabına və bu dəyərli vəsaitlə bağlı keçirilən müsabiqəyə həsr olunmuş videoçarxlar nümayiş etdirildi. Rəhim MƏHƏRRƏMLİ
