Ramil Hüseynov: “Bu, sülh sazişinin imzalanmasına, bu yöndə proseslərin sürətlənməsinə təkan verəcək”
Beynəlxalq Respublikaçılar İnstitutunun (İRİ) 2025-ci il iyunun 16-dan 25-dək keçirdiyi sosioloji sorğunun nəticələrinə görə, Ermənistan vətəndaşlarının 47 faizi Azərbaycanla sülh müqaviləsinin imzalanmasını tam və ya qismən dəstəkləyir, 40 faizi isə əleyhinədir.
Sülh müqaviləsinin imzalanması ilə bağlı ən yüksək fikir ayrılığı gənclər arasında qeydə alınıb: 18 yaşdan 35 yaşa qədər 48% - əleyhinə, 38% - lehinə. Yaşlı yaş qruplarından olan vətəndaşlar arasında isə əksinə, təşəbbüsə daha çox dəstək var: 56 və daha yuxarı yaşda olan respondentlərin 58%-i sazişin imzalanmasının tərəfdarıdır.
Araşdırma çərçivəsində Ermənistan vətəndaşlarının ölkənin xarici siyasi tərəfdaşları haqqında fikirləri də öyrənilib. Böyük əksəriyyət - 53% - İranı Ermənistanın siyasi tərəfdaşı hesab edir. Ondan sonra Fransa (48%) və Hindistan (43%) gəlir. Respondentlərin 45%-i Rusiyanı siyasi tərəfdaş adlandırıb, 27%-i isə onu siyasi təhlükə hesab edib.
Bütün bunların fonunda görünən odur ki, Ermənistan əhalisinin yarısı Azərbaycanla sülh tərəfdarıdır. Bu amil revanşist qüvvələrə qarşı necə bir fakt sayıla bilər? Sülh sazişinin imzalanmasını istəməyən qüvvələrə qarşı necə bir fakt sayıla bilər? Yəni əhalinin yarısının sülh istəməsi Paşinyanın siyasi perspektivinin möhkəmləndirilməsində və Azərbaycanla sülh sazişinin imzalanmasında necə rol oynayacaq?
“Eyni zamanda bu, Paşinyanın mövqelərini möhkəmləndirəcək”
Sözügedən məsələyə aydınlıq gətirən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, Ermənistan kimi aqressiv əhval-ruhiyyəyə malik cəmiyyəti olan ölkədə belə nəticə müsbət göstəricidir: “Biz nəzərə almalıyıq ki, uzun illər ərazilərimiz işğal altında olub. 44 günlük Vətən müharibəsindən sonra bir neçə dəfə hərbi toqquşma olub. Sonuncu hərbi əməliyyatlar 19 sentyabr 2023-cü ildə antiterror əməliyyatları zamanı olub. Azərbaycan Qarabağda öz suverenliyini tam bərqərar edəndən sonra revanşistlərin tərəfdarları azalıb. Çünki Ermənistan həm ərazicə, həm də əhali sayına görə kiçik dövlətdir. Üstəlik, Ermənistana himayadarlıq edən dövlətlər də qüvvələr nisbətinin fərqindədir. Bu baxımdan erməni cəmiyyətinin müəyyən hissəsi başqa dövlətlərə bel bağlamağın perspektivinin olmadığını gördü. Halbuki, İkinci Qarabağ müharibəsinə qədər erməni cəmiyyətində daşlaşmış fikir var idi ki, Azərbaycan müharibəyə başlasa, dünya gücləri buna imkan verməz. Belə gözləntilər darmadağın oldu. O üzdən, sülh tərəfdarlarının sayı artıb. Ümumən bu, sülh sazişinin imzalanmasına, bu yöndə proseslərin sürətlənməsinə təkan verəcək. Eyni zamanda bu, Paşinyanın mövqelərini möhkəmləndirəcək. Çünki Ermənistanda, digər siyasi qüvvələrdən fərqli olaraq, yalnız Paşinyan hökuməti sülh sazişinin imzalanmasında qərarlı görünür. Bu səbəbdən seçim imkanı məhduddur. Ona görə də, Paşinyanı sevməyənlərin bir qismi sülh gündəliyinə görə Nikoldan yana seçim edəcək”.
Vidadi ORDAHALLI
