Məhərrəm Zülfüqarlı: “Bu. məqsədli şəkildə dövriyyəyə buraxılmış ideoloji təxribatdır”
Azərbaycanın tarixi şəxsiyyətləri haqqında uydurma məlumatların tirajlandığı sosial şəbəkələrdə, xarici ölkələrdə açılan və antiazərbaycan fəaliyyəti ilə məşğul olan saytlarda, səhifələrdə olduqca əsassız iddialar yer alır. Xüsusən də bəzi xarici qüvvələr feyk xəbərlər yayır və Azərbaycanın bəzi tarixi şəxsiyyətlərinin milli mənsubiyyəti barədə qeyri-real fiklirlər irəli sürürlər.
Son zamanlar təəssüf ki, Azərbaycan dramaturgiyasının banisi, böyük mütəfəkkir, ictimai xadim Mirzə Fətəli Axundovun (Axundzadə) şəxsiyyətini, milli mənsubiyyətini də müzakirə mövzusuna çevirənlər tapılır.
Muta Ağayev adlı sosial şəbəkə istifadəçisi iddia edir ki, Mirzə Fətəli Axundov guya türk olmadığını iki dəfə “öz dəsti-xətti ilə yazıb”. “Əsərlərindən göründüyü kimi, o bir İran övladı və aşiqi idi” - deyən həmin istifadəçi iddia edir ki, guya Axundov 1871-ci ildə Tehranda yaşayan zərdüşt dostu Manuqçu Sahibə yazdığı məktubda “qoy bütün iranlılar bir həqiqəti başa düşərək desinlər ki, biz parsların övladıyıq” deyə yazıb. Həmin şəxs iddia edir ki, M.F.Axundov guya milliyyətcə talış olduğunu iddia edir. Axundov guya yazıb ki, mən özüm zahirən türk olsam da əslim İran nəslindədir. Guya o, talış millətinə mənsub olduğunu yazıb.
Bu gün antiazərbaycan qüvvələr gecə-gündüz yatmayıb indi də böyük şəxsiyyətlərimizin milli mənsubiyyətinə, soy-kökünə dil uzadır, saxtalaşdırma ilə məşğul olur.
Azərbaycan çoxmillətli dövlətdir. Əlbəttə, bu ölkənin hər milləti gözəldir - türkü, talışı, ləzgisi və sair də dəyərlidir. Ancaq hər bir tanınmış şəxsiyyətin milli mənsubiyyəti düzgün göstərilməlidir. Axundovun milliyyətini dəyişmək cəhdləri yaxşı niyyətdən xəbər vermir.
“Mirzə Fəfəli Axundovun “talış” elan edilməsi növbəti çirkin təxribatdır və yolverilməzdir”
Tarix elmləri doktoru, professor Məhərrəm Zülfüqarlı “Bakı-Xəbər”ə “Bu, məqsədli şəkildə dövriyyəyə buraxılmış ideoloji təxribatdır. Bu cür ideoloji təxribatlar adətən ya dövlət zəif olanda, ya da güclənərək müstəqil siyasət yeridəndə baş verir”-deyə bildirdi.
M.Zülfüqarlının sözlərinə görə, məsələn, 1993-cü ildə Azərbaycan zəifləmişdi, hər tərəfdən təxribatlarla üzləşmişdi, separatçılıq baş qaldırmışdı, Cənubda “Talış Muğan Respublikası”, Şimalda “Sadval” ayaq asıb yeriyirdi, birini İran, birini Rusiya qızışdırırdı. İndi həmin prosesin getdiyini deyən M.Zülfüqarlı əlavə etdi ki, son dövrlər çox böyük və təhlükəli ideoloji təxribata imza atılır, bu da separatizmdən daha təhlükəlidir. “Azərbaycanda müəyyən regionçuluğun inkişaf etdirilməsində maraqlı olanlar var. Separatçılıq və regionçuluq birbaşa Azərbaycançılıq ideologiyasına zərbə vurmaq, Azərbaycanı zəiflətmək məqsədi daşıyır. Mənə elə gəlir, aidiyyəti qurumlar bu işlə ciddi məşğul olmalıdır”.
Mirzə Fətəli Axundovla bağlı iddialara gəlincə, M.Zülfüqarlı bunun absurd olduğunu dedi: “Mirzə Fəfəli Axundovun “talış” elan edilməsi növbəti çirkin təxribatdır və bu yolverilməzdir. Mən özüm bu işlə məşğul olmuşam, tədqiqat aparmışam. Biz əgər Şimalda yaşayan xalqların mütləq əksəriyyətinin şəcərəsini dəqiq bilsək, bunların 100-də 90-nın Cənubi Azərbaycanla əlaqəsi var. Mən özüm yaxında memuar yazmışam, ata tərəfimin Cənubi Azərbaycanın Qaradağ mahalından gəldiyini, ana tərəfimin isə Şimali Azərbaycandan, Buzovna kəndindən olduğunu qeyd etmişəm. Yəni biz parçalanmış bir vətənin övladlarıyıq. Ona görə də kimin babasının Cənubdan gəlməsi, burda məskunlaşması təxribatçılara tarixi saxtalaşdırmaq üçün müəyyən imkan verir.
Fətəli Xan Xoyskinin də babası Xoy Xanı olub, Cənubi Azərbaycandan Şəkiyə gəlib burda yaşayıb. Azərbaycan uğrunda mübarizə aparıb və Azərbaycan uğrunda da həlak olub. Mirzə Fətəli Axundov da Cənubi Azərbaycanın Xəmnə şəhərində anadan olub sonra Şəkiyə köçüb burda yaşayıb. Birincisi onu qeyd etməliyik ki, Azərbaycanın əhalisinin 90 faizindən çoxu türkdür, 10 faizi isə milli azlıqlardan ibarətdir. Amma biz bütöv bir xalqıq və bütövlükdə güclü oluruq. Yəni biz milli azlıqların nümayəndələrinin fəaliyyətindən bəhs etmək istəsək, məsələn, Müslüm Maqomayev kimi böyük bir şəxsiyyət Azərbaycanı dünyaya tanıdıb. O, milli azlıqların nümayəndəsidir. Milli Qəhrəman Albert Aqarunov milli azlığın nümayəndəsidir və vətən uğrunda şəhid olub.
İndi belə cılız insanlar var ki, xalqımızın böyük şəxsiyyətlərinin etnik mənsubiyyətini saxtalaşdırmaqla vətəndaşlarımızı qarşı-qarşıya qoymaq istəyirlər. Bu mümkün deyil. Çünki Azərbaycançılıq ideologiyası artıq inkişaf edib və 44 günlük Vətən müharibəsində iştirak edən qəhrəmanlarımız arasında da çox sayda milli azlıqların nümayəndələri var.
Mirzə Fətəliyə gəlincə, o, əsasən ateist təbliğatı aparıb, dini xurafata qarşı mübariz olub. Ona görə də dindarlar Axundova qarşı mübarizə aparırdılar, onu “kafir” elan etmişdilər. İndi belə bir şəxsiyyətin milliyyətini etnik separatçılığı yayan insanların saxtalaşdırması gülüş doğurur. Bilirsiz ki, Azərbaycanda separatizmin artıq kökü kəsilib, onun bazası yoxdur. Bu işlə məşğul olanlar xaricdə oturan, müxtəlif institutlardan, fondlardan maliyyələşən və bulanıq suda balıq tutmaq istəyən insanlardır. Bunların da cavabı verilməlidir. Yəni hər bir insan özünü necə hiss edirsə o millətin nümayəndəsidir. Azərbaycan əhalisi də Azərbaycançılıq ideologiyasının inkişafı ilə özünü bir millətin nümayəndəsi, bir vətənin övladı hesab edir. Bu səbəbdən də bu cür cılız saxtalaşdırmanın Azərbaycana heç bir təsiri olmayacaq, gələcəkdə elə insanlar öz əməllərindən utanıb geri çəkiləcəklər” - deyə M.Zülfüqarlı bildirdi.
İradə SARIYEVA
