Kamran Əsədov: “Bu sərəncam təkcə say artımını deyil, həm də Azərbaycan təhsilinin beynəlxalq miqyasda mövqeyinin möhkəmləndirilməsi niyyətini ortaya qoyur”
Ali təhsil sahəsində tətbiq edilən beynəlxalq ikili diplom proqramlarının sayı artırılıb. Bununla bağlı Prezident İlham Əliyev Sərəncam imzalayıb.
Sərəncama əsasən, ali təhsil sahəsində tətbiq edilən beynəlxalq ikili diplom proqramlarının sayı “Azərbaycan Respublikasının 2022-2026-cı illərdə sosial-iqtisadi inkişaf Strategiyası”na uyğun olaraq 6-dan 8-ə çatdırılıb və onların icrası 2030-cu ilədək təmin ediləcək.
Mövcud və yeni tətbiq ediləcək beynəlxalq ikili diplom proqramlarının maliyyələşdirilməsi, Azərbaycan Dövlət Neft Fondunun vəsaiti hesabına təmin ediləcək.
Nazirlər Kabineti dörd ay müddətində beynəlxalq ikili diplom proqramlarının həyata keçiriləcəyi xarici tərəfdaş ali təhsil müəssisələrinin, ixtisaslar üzrə təhsil proqramlarının və təhsil səviyyələrinin seçimi qaydasını təsdiq edib Azərbaycan Prezidentinə məlumat verəcək.
“İkili diplom proqramlarının təşviqi isə bu siyasətin növbəti mərhələsidir”
Təhsil eksperti Kamran Əsədov “Bakı-Xəbər”ə bildirdi ki, Prezident İlham Əliyevin ali təhsildə beynəlxalq ikili diplom proqramlarının sayının artırılması ilə bağlı imzaladığı sərəncam ali təhsil sistemində keyfiyyətə, qlobal inteqrasiyaya və rəqabətqabiliyyətli insan kapitalının formalaşmasına yönəlmiş növbəti strateji addım kimi qiymətləndirilməlidir: “Bu sərəncam təkcə say artımını deyil, həm də Azərbaycan təhsilinin beynəlxalq miqyasda mövqeyinin möhkəmləndirilməsi niyyətini ortaya qoyur.
Son illərdə Prezident İlham Əliyevin təhsil sahəsinə göstərdiyi diqqət sistemli və ardıcıl siyasətlə müşahidə olunur. Təsadüfi deyil ki, 2004-cü ildən bu yana həyata keçirilən “2007-2015-ci illər üçün Azərbaycan gənclərinin xarici ölkələrdə təhsili üzrə Dövlət Proqramı”, daha sonra “2022-2026-cı illər üçün Təhsildə Keyfiyyətin Artırılması üzrə Dövlət Proqramı” məhz Prezidentin təşəbbüsü ilə reallaşan və ölkənin insan kapitalı strategiyasına uyğunlaşdırılmış sənədlərdir. İkili diplom proqramlarının təşviqi isə bu siyasətin növbəti mərhələsidir”.
K.Əsədov qeyd etdi ki, ikili diplom modeli tələbənin həm Azərbaycan universitetində, həm də xarici ali təhsil müəssisəsində paralel və ya ardıcıl təhsil almasına imkan yaradır: “Bu sistem təkcə diplom sayının artması deyil, həm də tədrisin məzmununun beynəlxalq akkreditasiyadan keçməsi, təhsil alanların xarici metodologiyalarla tanış olması, akademik mobilliyin artması, dil və kommunikasiya bacarıqlarının inkişafı deməkdir. Bu gün Bakı Ali Neft Məktəbi ilə Heriot-Watt Universiteti, ADA Universiteti ilə Corc Vaşinqton Universiteti və ya İqtisad Universiteti ilə Montpellier Business School arasında qurulan əlaqələr bu istiqamətdə uğurlu nümunələrdir.
Qlobal təcrübə göstərir ki, belə proqramlar bir çox inkişaf etmiş ölkələrin - Almaniya, Fransa, Cənubi Koreya, Çin və Malayziyanın ali təhsil sistemində geniş tətbiq olunur. Hətta bəzi ölkələr bu model vasitəsilə ölkəyə xarici tələbə cəlb edir və beynəlxalq səviyyədə diplomlarının nüfuzunu gücləndirirlər. Azərbaycan da bu siyasətlə həm yerli tələbənin dünyaya çıxış imkanlarını genişləndirir, həm də təhsilin keyfiyyət meyarlarını beynəlxalq standartlara yaxınlaşdırır. Bu, eyni zamanda universitetlər üçün də ciddi inkişaf platformasıdır: tədris planları yenilənir, müəllim heyəti inkişaf edir, tədqiqat imkanları artır.
Prezident İlham Əliyevin təhsilə yanaşmasında əsas vurğu sadəcə infrastrukturun qurulmasına deyil, məzmunun və nəticələrin təkmilləşdirilməsinə yönəlib. Xüsusilə 44 günlük Vətən müharibəsindən sonra müəyyən edilən “postmüharibə quruculuğu və inkişaf mərhələsi” çərçivəsində insan kapitalı prioritet sahə kimi dəyərləndirilir. Prezidentin son çıxışlarında da dəfələrlə vurğuladığı kimi, Azərbaycanın gələcəyi savadlı, peşəkar və müasir dünyada rəqabətə davamlı gənclərin üzərində qurulacaq.
Ali təhsildə ikili diplom proqramlarının sayının artırılması bu vizionun tərkib hissəsidir. Bu addım yalnız tələbələrə deyil, cəmiyyətə, iqtisadiyyata, texnologiyaya və diplomatik imicə müsbət təsir edir. Eyni zamanda göstərir ki, Prezident İlham Əliyev təhsili yalnız sosial xidmət deyil, strateji milli təhlükəsizlik və inkişaf faktoru kimi qəbul edir”.
K.Əsədov vurğuladı ki, bu cür proqramların genişləndirilməsi Azərbaycanın intellektual potensialının gücləndirilməsi, innovasiya əsaslı iqtisadiyyat qurmaq üçün təməldir: “Beləliklə, bu sərəncam bir daha sübut edir ki, Prezidentin təhsilə qayğısı təsadüfi və simvolik deyil, ardıcıl və məqsədyönlü dövlət siyasətidir. Bu siyasət sayəsində Azərbaycan gəncləri yalnız ölkə daxilində deyil, dünya səviyyəsində rəqabətə hazır olacaq”.
İradə SARIYEVA
