Kamran Əsədov: "Azərbaycanda ali təhsil əlçatandır və dövlət yükün böyük hissəsini öz üzərinə götürüb"
Dövlət ali və orta ixtisas təhsili müəssisələrində dövlət sifarişli yerlərin sayının artırılması və tələbə yataqxanalarının tikilməsi təklif edilib. Bu, Azərbaycanın İnsan Hüquqları üzrə Müvəkkilinin (ombudsmanın) 2023-cü il üzrə məruzəsində əksini tapıb.
Məruzədə qeyd edilib ki, ehtiyaca uyğun olaraq, yeni tələbə yataqxanalarının inşa edilməsi istiqamətində aparılan işlərin davam etdirilməsi önəmlidir.
"Təhsil alanların sosial vəziyyətinin yaxşılaşdırılması üçün tələbə yataqxanalarının sayı artmalıdır"
Mövzu ilə bağlı fikir bildirən təhsil eksperti Kamran Əsədov "Bakı-Xəbər"ə açıqlamasında qeyd etdi ki, 51 ali təhsil müəssisəsində 187 min tələbə təhsil alır. 110 minə yaxın tələbə ödənişli təhsil alır. Son 4 il ərzində Azərbaycan ali təhsil müəssisələrində ödənişsiz plan yerlərinin sayı kəskin şəkildə artıb: "Belə ki, Prezident İlham Əliyevin 2019-cu ildə imzaladığı sərəncama əsasən? ödənişsiz əsaslarla təhsil alanların sayı artmalıdır. Artıq bu sahədə fərq hiss olunur. Ödənişsiz plan yerlərində təhsil alanların sayı ötən illərlə müqayisədə artıb.
Onu da deyim ki, ödənişli ixtisaslarda təhsil alanların bir qisminin ödənişi dövlət tərəfindən həyata keçirilir. Təxminən, 29000 tələbə ödənişli ixtisasla təhsil alsa da, onların pulunu dövlət ödəyir. Bu kateqoriyaya Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olmuş və Azərbaycan Respublikasının azadlığı, suverenliyi və ərazi bütövlüyü uğrunda həlak olan, hərbi əməliyyatla əlaqədar itkin düşən və məhkəmə tərəfindən ölmüş elan edilən vətəndaşların uşaqlarının, şəhid ailəsi statusunu almış ailənin üzvləri, hər iki valideyninin himayəsindən məhrum olmuş uşaqlar, bir valideyni vəfat etmiş və o biri valideyni I və II qrup əlil olan 18 yaşınadək şəxslər və s. aid edilir"
Həmsöhbətimiz hesab edir ki, təhsil alanların sosial vəziyyətinin yaxşılaşdırılması üçün tələbə yataqxanalarının sayı artmalıdır: "Artıq Qarabağ problemi həll olunub. Məcburi köçkünlər yataqxanalarda deyil, öz doğma yurdlarında yaşamağa üstünlük verir. Həmin yataqxanalar təmir olunmalı, müasir standartlara uyğun şəkildə hazırlanaraq tələbələrə verilməlidir. Tələbələrin sosial vəziyyətinin yaxşılaşdırılması təhsilin keyfiyyətinə də müsbət təsir edir və edəcək".
K.Əsədov son olaraq bildirdi ki, Azərbaycanda ali təhsil əlçatandır və dövlət yükün böyük hissəsini öz üzərinə götürüb.
Günel CƏLİLOVA
