Süni intellekt bir çox sahələrdə sürətlə inkişaf edir. Bu isə gələcəkdə bir çox ixtisasların, peşələrin sıradan çıxması deməkdir. Bəzi ekspertlər bununla bağlı perspektivli ixtisaslara yönəlməyin daha məqsədəuyğun olduğunu tövsiyə edirlər.
İddialara görə, nəqliyyat sürücüsü, operator, məlumat mərkəzlərində vətəndaşları qəbul edən şəxs, işıqçı, qrimçi, aktyor, montajçı videoqraf, fotoqraf, dizayner, bank işçisi, telemarketoloq və digər sahələr süni intellekt tərəfindən idarə olunacaq.
Abituriyentlər hansı sahə üzrə təhsil almalıdırlar ki, gələcəkdə rahatlıqla iş tapa bilsinlər?
Kamran Məmmədli: "Süni intellektin inkişafı sürətlənib və qarşıdakı illərdə bu, hər kəsin həyatına daha çox təsir edəcək"
Iqtisadçı Kamran Məmmədli "Bakı-Xəbər"ə şərhində bildirdi ki, süni intellektin inkişafı sürətlənib və qarşıdakı illərdə bu, hər kəsin həyatına daha çox təsir edəcək: "Bu həm də yeni bir fenomendir. İndiki halda bu istiqamətdə deyilən fikirlərin əksəriyyəti subyektivdir. Süni intellektin inkişafı həyatımızda bütün peşələrə təsir edəcək. Məncə, daha çox mühasiblərin işinə müdaxilə edəcək. Belə ki, bu gün sırf insanların iştirakı ilə görülən bəzi işləri gələcəkdə kodlaşdırma ilə reallaşdırmaq mümkün olacaq. Gələcəkdə robotların inkişafını nəzərə alsaq, əl əməyi tələb edən müəyyən peşələrə də təsir gücü ola bilər. Ona görə də hökumətlər, inkişaf etməkdə olan və əmək bazarında ciddi problem yaşanan ölkələr bu hala indidən hazırlaşmalıdırlar. Süni intellektin ölkə iqtisadiyyatına mənfi və müsbət təsirləri olacaq".
Ilqar Orucov: "Ərzaq təhlükəsizliyi, iqlim istiləşməsi və bu kimi digər bir çox qlobal problemlərin həlli istiqamətində fəaliyyət göstərəcək kadrlara çox böyük ehtiyac yaranacaq"
Elm və Təhsil Nazirliyi yanında İctimai Şuranın üzvü, Azərbaycan Gənc Alim, Aspirant və Magistrlər Cəmiyyətinin sədri İlqar Orucov hesab edir ki, rəqəmsal dünya bütövlükdə cəmiyyətin inkişafında birmənalı olaraq təsiredici faktor rolu oynayacaq: "Gələcəkdə əmək bazarında hansı ixtisaslara daha çox ehtiyacın olması cəmiyyəti maraqlandırır. Təbii ki, dünyada rəqəmsallaşma sürətlə artır. İnformasiya texnologiyaları (İT), rəqəmsallaşma ilə bağlı olan ixtisasların üstünlük təşkil edəcəyi gözlənilir. Çünki bu ixtisasların artmasına ciddi ehtiyaclar yaranacaq. Bundan başqa, bir neçə fənnin kəsişməsindən yaranan yeni ixtisaslara da zərurət yaranacaq. Məsələn, biofizika, nanotexnologiya, gen mühəndisliyi və s. Ümumilikdə, mühəndisliklə bağlı ixtisaslar bir neçə yerə şaxələnərək bölünəcək. Bundan başqa, qlobal problemlərin həlli üçün müəyyən ixtisaslar da bu istiqamətdə yarana bilər. Çünki bu sahələrdə kadrlara ehtiyac olacaq. Məsələn, ərzaq təhlükəsizliyi, iqlim istiləşməsi və bu kimi digər bir çox qlobal problemlərin həlli istiqamətində fəaliyyət göstərəcək kadrlara çox böyük ehtiyac yaranacaq. Bundan başqa, COVID-19 kimi pandemiya təhlükəli xəstəliklərin qarşısını almaq üçün yeni tibbi ixtisasların yaranması da gözləniləndir".
Günel CƏLİLOVA
