Dövlət qulluğunun "müsahibə pilləsindən" narazılıqlar başlayıb...
Kamran Əsədov: "Dövlət qurumları imtahanın müsahibə mərhələsinin obyektivliyinə çox ciddi kölgə salırlar"
Azərbaycanda dövlət qulluğuna iddialı şəxslər müəyyən baryerlər aşmaqla müvafiq vəzifələrdə çalışa bilərlər. Dövlət qulluğuna qəbul üçün qanunvericiliyin tələblərindən irəli gələn iki mərhələli baryer sistemi iddialı şəxslərin dövlət orqanlarına işə qəbulunda müəyyən problemlər yaradır.
Belə ki, "Dövlət qulluğu haqqında" Qanuna görə, dövlət qulluğuna qəbulun birinci mərhələsi test üsulu ilə həyata keçirilir. İkinci tur qurumun mütəxəssisi və müstəqil ekspertin iştirakı ilə müsahibə mərhələsidir.
Ancaq qeyd edək ki, dövlət qulluğu ilə bağlı çoxlu narazılıqlar var. Əsasən də iddialı şəxslər müsahibə mərhələsindən narazılıq edir. Narazılıq edənlər sosial şəbəkə vasitəsilə yazaraq qeyd edir ki, müsahibə mərhələsində lazımi bal toplamaq üçün kimlərsə tapşırılır. Yəni tanışı, dostu olan şəxs müsahibə mərhələsini rahat şəkildə keçir.
"İmtahanların birinci mərhələsindən keçid balını yığan iştirakçıların ikinci mərhələdə uğursuz olması haqlı olaraq …"
Təhsil eksperti Kamran Əsədov "Bakı-Xəbər"ə açıqlamasında qeyd etdi ki, 2016-cı ilin aprel ayından dövlət qulluğuna qəbul imtahanları DİM-ə həvalə edilib. Bununla da imtahanın test mərhələsindəki mövcud problemləri aradan qaldırılıb: "DİM tərəfindən həyata keçirilən bütün imtahanların şəffaf və ədalətli olduğuna da heç bir şübhə yoxdur. Ancaq dövlət qulluğuna qəbul imtahanlarının ikinci mərhələsi ilə bağlı eyni sözləri deyə bilməyəcəm. Çünki dövlət qurumları imtahanın müsahibə mərhələsinin obyektivliyinə çox ciddi kölgə salırlar. Elm və Təhsil Nazirliyinin elan etdiyi vakansiya üzrə test mərhələsindən keçən gənc qərəzli bir şəkildə müsahibə mərhələsindən kəsilir. Çünki qurum həmin yerə öz adamlarını imtahansız qəbul edir. Bu, dəhşətli və dözülməz bir haldır. Qeyd olunan dəyişikliklərlə DİM ikinci mərhələdə yol verilən qeyri-şəffaflığın qarşısını almağa çalışır. Çünki imtahanların birinci mərhələsindən keçid balını yığan iştirakçıların ikinci mərhələdə uğursuz olması haqlı olaraq iştirakçılarda imtahanların formal olaraq keçirilməsi, əslində isə öncədən nəzərdə tutulan şəxslərin qəbul olunacağı fikrini formalaşdırır".
Təhsil eksperti onu da əlavə etdi ki, dövlət qulluğuna qəbul imtahanında sualların sayında da dəyişiklik edilməlidir: " Hazırda tələb olunan keçid balları yüksəkdir. Kateqoriyalar üzrə keçid ballarının ən azı 10 bal aşağı salınmasına ehtiyac var".
Günel CƏLİLOVA
